പേരിന്റെ പൊരുള്‍ തേടി

നടന്നു വന്നവഴി ഭാഗം (83) / കൂക്കാനം റഹ് മാന്‍

(www.kasargodvartha.com 18.12.2018) ഞാന്‍ ജനിച്ചുവളര്‍ന്ന നാടിനെക്കുറിച്ചോര്‍ക്കുമ്പോള്‍ മനസ്സില്‍ സംശയങ്ങളുടെ നൂലാമാലകള്‍ പൊങ്ങിവരും. പ്രദേശത്തിന്റെ പ്രകൃതിയെക്കുറിച്ച്, ജനജീവിതത്തെക്കുറിച്ച്, മണ്‍മറഞ്ഞുപോയ വ്യക്തികളെക്കുറിച്ച്, അവരുടെ പേരിനെക്കുറിച്ച് ഒക്കെ സംശയങ്ങള്‍ ഒരുപാട് ഉണ്ടാവും. സ്വയം അതിന്റെ ഉത്തരം കണ്ടത്താന്‍ ശ്രമിക്കും. പക്ഷേ കൃത്യമായ ഉത്തരമായോ, തീരുമാനമായോ അതിനെ കാണാന്‍ പറ്റില്ലെന്ന് എനിക്കറിയാം. ഞാന്‍ ഉന്നയിക്കുന്ന പ്രശ്‌നങ്ങള്‍ വരും തലമുറയെങ്കിലും പഠിക്കാന്‍ തയ്യാറായാല്‍ അത് നാടിന്റെ ചരിത്ര നിര്‍മ്മിതിയിലേക്ക് വഴി തെളിയിക്കും.

ഒരു ചെറിയ പ്രദേശത്തിന്റെ കാര്യമാണ് ഇവിടെ സൂചിപ്പിക്കുന്നത്. കൂക്കാനമെന്നാണ് ദേശത്തിന്റെ പേര്. വടക്ക് കുണ്ടുപൊയില്‍ തെക്ക് പലിയേരിക്കൊവ്വല്‍ കിഴക്ക് കുറുവന്‍കുന്ന് പടിഞ്ഞാറ് വെള്ളവയല്‍. പൊയിലും,കൊവ്വലും,കുന്നും,വയലും ചെറുസ്ഥലങ്ങളുടെ പേരിനോപ്പമുണ്ട്. ശാന്ത സുന്ദരമായ ഒരുഗ്രാമം. വിശാലമായ പറമ്പുകള്‍ക്ക് മണ്‍കയ്യാല അതിരുകളാക്കി തിരിച്ചിട്ടുണ്ട്. ഇടുങ്ങിയ ഇടവഴികളുണ്ട്. കുറുവന്‍ കുന്നില്‍ നിന്ന് ആരംഭിച്ച് പലിയേരി കൊവ്വലിന് സമീപത്ത് കൂടെ മഴക്കാലത്ത് മാത്രം ഒഴുകുന്ന 'കൊല്ലി' എന്നറിയപ്പെടുന്ന തോടുണ്ട്.

അറുപത്തിയഞ്ച് വര്‍ഷം മുമ്പത്തെ കഥയാണ് പറയുന്നത്. ഔപചാരികവിദ്യാഭ്യാസം തീരെ ലഭ്യമല്ലാത്തവരാണ് തദ്ദേശവാസികള്‍. പക്ഷേ മനുഷ്യത്വപരമായ നന്മകളുടെ വിളനിലമായിരുന്നു ഇവിടുത്തുകാരില്‍ ഓരോ വ്യക്തിയും. കൃഷിയെ മാത്രം ആശ്രയിച്ചുള്ള ജീവിതം. വസ്ത്രം, ഭക്ഷണം, ജീവിതസൗകര്യങ്ങള്‍ എന്നിവ വളരെ പരിമിതം. മിക്കവീടുകളിലും അക്കാലത്ത് റാക്ക് വാറ്റുണ്ടായിരുന്നു. രാത്രിയിലെ സുഖമായ ഉറക്കത്തിന് ശക്തികിട്ടാന്‍ വേണ്ടിമാത്രമുള്ള മദ്യഉപയോഗം.

നാടിന്റെ പേരിനെക്കുറിച്ച് എങ്ങനെ ആപേരുണ്ടായി എന്ന് പലപ്പോഴും ചിന്തിക്കാറുണ്ട്. അതേപോലെ ഈ ചെറിയ പ്രദേശത്ത് ജീവിച്ചു വന്ന വ്യക്തികളുടെ പേരും പഠനത്തിന് വിധേയമാക്കേണ്ടതാണ്. മിക്ക പുരുഷന്മാരുടെ പേരും 'അമ്പു' എന്നാണ് 'അമ്പ്' എന്നത് 'കൃപ' എന്നര്‍ത്ഥം വരുന്നതാവുമോ? ചിലര്‍ക്ക് വെറും 'അമ്പു' എന്നും, അതിന്റെ വ്യത്യസ്ത രുപമായ ചെറിയമ്പു, വലിയമ്പു,വെളുത്തമ്പു,കറുത്തമ്പു, കുഞ്ഞമ്പു, തുടങ്ങിയ പേരുകള്‍. അമ്പുകഴിഞ്ഞാല്‍ വേറൊരു പേര് കണ്ണന്‍ ആണ്. കുഞ്ഞികണ്ണന്‍, ചെറിയകണ്ണന്‍,വലിയകണ്ണന്‍, കറുത്തകണ്ണന്‍, തുടര്‍ന്ന് രാമന്‍,കുഞ്ഞിരാമന്‍ മാരാണ്. സ്ത്രീകളുടെ പേര് പാട്ടി, കുഞ്ഞാക്കം, ചിരി, മാതൈ, എന്നൊക്കെയായിരുന്നു അന്ന്.

തോര്‍ത്ത് മുണ്ടും, അരയിലൊരു പിച്ചാത്തിയും, തലയില്‍ തൊപ്പിപ്പാളയും ധരിച്ചു നടന്ന പുരുഷ•ാര്‍, ബ്ലൗസിടാതെ പുടവയുടുത്ത് സധൈര്യം പുറത്തിറങ്ങി നടക്കുന്ന സ്ത്രീകള്‍ ഇത് കൂക്കാനത്തെ സ്ഥിരം കാഴ്ചയായിരുന്നു. ഇവിടെ അന്ന് മൂന്നോ നാലോ മുസ്ലിം വീട് ഒഴിച്ചാല്‍ ബാക്കി മുഴുവനും ഹിന്തു വിഭാഗമായിരുന്നു. ആ വിഭാഗത്തില്‍പെട്ട തീയ്യ, വാണിയ, കൊല്ലന്‍ സമുദായക്കാര്‍ മാത്രമെ അന്ന് കൂക്കാനം പ്രദേശത്തുള്ളു. പിന്നെ ദളിത് വിഭാഗമായ പുലയ, ചെരുപ്പുകുത്തി വിഭാഗക്കാരും ജീവിച്ചു വന്നിട്ടുണ്ട്. ദളിത് വിഭാഗത്തിലെ സ്ത്രീപുരുഷപേരുകളു, അവരുടെ ദയനീയാവസ്ഥ വിലിച്ചോതുന്നതായിരുന്നു. ചപ്പില, കാക്ക, തിമ്മന്‍,തമ്മണ്ണന്‍, തുടങ്ങിയവയായിരുന്നു അന്ന് ജീവിച്ചുവന്നരുടെ പേര്.

പേരിനൊപ്പം പക്ഷി, മൃഗം,ഇഴജന്തു, മത്സ്യം, ഉദയജീവി എന്നിവയുടെ പേരു ചേര്‍ത്താണ് പലരേയും അറിയപ്പെടുന്നത്. അതില്‍ എന്റെ മനസ്സില്‍ തട്ടിയ ചിലരുടെ പേരുകള്‍ ഒര്‍ത്തുപോവുന്നു. അവരുടെ രുപവും ഭാവവും എന്റെ സ്മൃതി പഥത്തിലുണ്ട്. പന്നികുഞ്ഞപ്പു,കുറുക്കന്‍ കണ്ണന്‍, പൂച്ചരാമന്‍, തവള ചന്തു, നങ്കന്‍ രാമന്‍, ചുരുട്ട അമ്പു, നമ്പോലന്‍ ഗോപാലന്‍, കോയ്യന്‍ ചിരുകണ്ടന്‍ നരിക്കുട്ടി തുടങ്ങിയ പേരുകള്‍ ഇവര്‍ക്കെങ്ങിനെ കിട്ടിയിട്ടുണ്ടാവും? തറവാട്ടു പേരായിരിക്കുമോ? കുഞ്ഞായിരിക്കുമ്പോള്‍ ഓമനയായി വിളിച്ചതാവുമോ? അവരുടെ പ്രവൃത്തിയില്‍ പേരിനൊപ്പമുള്ള ജീവിയുടെ ചേഷ്ടകളോ,രുപസാദൃശ്യമോ കണ്ടിട്ടാവുമോ? കുഞ്ഞുന്നാളില്‍ കുട്ടുകാര്‍ വിളിച്ചു കളിയാക്കിയതാവുമോ? എങ്ങനെയാണ് ഇത്രയും വട്ടത്തിലുള്ള പ്രദേശത്തുകാരില്‍ ഇങ്ങനെയുള്ള പേരുവിളികിട്ടിയത്? പഠിക്കേണ്ടതാണ്. സത്യത്തില്‍ ഇവരുടെ യഥാര്‍ത്ഥ പേര് ഇതല്ല. രേഖകളിലൊകൊ തറവാട്ടു പേരായിരിക്കും ഉണ്ടാവുക.

ഈ നാട്ടില്‍ നേതാക്കളുടെ പേരില്‍ അറിയപ്പെടുന്നവരുമുണ്ട്. അവരൊന്നും ഇന്ന് ജീവിച്ചിരിപ്പില്ല. അവര്‍ക്കെങ്ങിനെ ആ പേര് കിട്ടിയതെന്ന് എനിക്കറിയാം. ഇ.എം.എസ്.അമ്പു, എ.കെ. ജി നാരായണന്‍. മാവോ കുഞ്ഞിരാമന്‍. അമ്പുവേട്ടന് വിക്കുണ്ട്. അതിനാല്‍ ഇ. എം.എസ്.ആയി. നാരായണന്‍ ചെറിയ കുട്ടിയായിരിക്കുമ്പോള്‍ പറമ്പുകളിലും കിളയിലൂടെയും നടക്കുമ്പോള്‍ 'എ.കെ.ജി. സിന്ദാബാദ്' എന്ന് എപ്പോഴും വിളിച്ചു നടക്കും. അങ്ങിനെ ഏ. കെ.ജി.യായി. പാര്‍ട്ടിസാഹിത്യവും മറ്റും ധാരാളം വായിക്കുകയും പഠിക്കുകയും, ചര്‍ച്ചനടത്തുകയും ചെയ്യുന്നതിനാല്‍ കുഞ്ഞിരാമേട്ടനെ മാവോ കുഞ്ഞിരാമനാക്കി.

ഇങ്ങിനെ നേരിട്ടറിഞ്ഞ കാര്യങ്ങള്‍ ചിലതുണ്ട്. ചെരുപ്പുകുത്തി വിഭാഗത്തില്‍ പെട്ട 'തമ്മണ്ണന്‍' എന്ന വ്യക്തിക്ക് മാരിയമ്മകുടിയിട്ട് സ്വയം ദേഹം മുഴുവന്‍ ചൂരല്‍ പ്രയോഗം നടത്തുന്നത് കണ്ടിട്ടുണ്ട്. അവസാനം അദ്ദേഹം തളര്‍ന്നു വിഴും.  എന്തിനാണിതെന്ന് അന്നും ഇന്നും അറിയില്ല. കൂക്കാനം ഉച്ചന്‍ വളപ്പില്‍വലിയൊരു പറങ്കിമാവിന്‍ ചുവട്ടില്‍ 'തെയ്യം കല്ലായിമറിഞ്ഞത'് കണ്ടിട്ടുണ്ട്. ചുറ്റും കല്ലുകളൊന്നു മില്ലാത്ത സ്ഥലമാണിത്. തെയ്യത്തിന്റെ രൂപത്തില്‍ വലിയൊരു പാറക്കല്ല,് ചുറ്റും രണ്ട് മൂന്ന് ചെറിയ ഉയരത്തിലുള്ളകല്ല്. കേട്ടറിവാണിത്. ഇതിന്റെ പിന്നിലെ ചരിത്രവും അറിയാനുണ്ട്.
 
എന്റെ തറവാട് വീട് നില്‍ക്കുന്ന സ്ഥലത്തിന് വെള്ളം ഒലിക്കും, ചാല്‍ (വെള്ളരിക്കന്‍ ചാല്‍) എന്നാണ് പേര്. എന്നെങ്കിലും ഒരു ചാല് പറമ്പിലൂടെ കടന്നു പോയിട്ടുണ്ടാവാം അതായിരിക്കും പേരങ്ങിനെ. ഉച്ചന്‍വളപ്പിന്റെ പേര് വന്നത് ആന്ധ്രയില്‍ നിന്ന് കുടിയേറിവന്ന 'ഉച്ചന്‍' എന്നുപേരായ ഒരു ചെരുപ്പുകുത്തി ഉണ്ടായിരുന്നെന്നും, അദ്ദേഹം കുടുംബസമേതം അവിടെയാണ് താമസിച്ചതെന്നും പറഞ്ഞു കേള്‍ക്കുന്നു. അങ്ങിനെ ആ പറമ്പ് ഉച്ചന്‍ വളപ്പായി മാറിയതാണു പോലും. ഉച്ചന്‍ വളപ്പിനെ കുറിച്ചും പഠിക്കണം.
 
ഇവിടുത്തുകാര്‍ ഈശ്വര വിശ്വാസികളായിരുന്നെങ്കിലും ആരുടെയും ആരാധനാലയങ്ങള്‍ ഇവിടെ ഉണ്ടായിരുന്നില്ല. വീടുകളില്‍ തെയ്യം കെട്ടി ആടിക്കാറുണ്ട്. കുണ്ടത്തില്‍ തറവാട്ടില്‍ കുറത്തിത്തെയ്യവും, ചിലവീടുകളില്‍ പൊട്ടന്‍ തെയ്യവും കെട്ടിയാടിക്കാറുണ്ട്. ആധുനിക കാലത്ത് കൂക്കാനത്ത് ഇതിനൊക്കെ മാറ്റംവന്നു. മുത്തപ്പന്‍ തറയും,മുസ്ലിം പള്ളിയും ഇവിടെ അടുത്തടുത്തായി ഉയര്‍ന്നു വന്നു. ഇരു സ്ഥലത്തും ആരാധനകള്‍ തകൃതിയായി നടക്കുന്നു. ഇത് വിശ്വാസത്തിന്റെ പേരിലാണോ അതോ സംഘാടകരുടെ മേന്‍മകാണിക്കാനാണോ?

വിശാലമായ പലിയേരിക്കൊവ്വല്‍ നാമാവശേഷമായി. ഉയര്‍ന്നു നിന്ന കുറുവന്‍കുന്ന് ഇടിച്ചു നിരത്തിക്കഴിഞ്ഞു. വെള്ളവയല്‍ വെള്ളപ്പറമ്പുകളായി മാറി, കുണ്ടു പൊയിലില്‍ തല ഉയര്‍ത്തിനില്‍ക്കുന്ന നിരവധി കോണ്‍ക്രീറ്റ് മന്ദിരങ്ങളുണ്ടായി. എല്ലാംമാറിക്കഴിഞ്ഞു. ഇതില്‍ സൂചിപ്പിച്ച പഴയ ആളുകളൊക്കെ മണ്‍മറഞ്ഞുപോയി...

കൂക്കാനത്തിന്റെ പഴയചരിത്രം പഠിക്കാനും. എങ്ങിനെ മാറ്റംവന്നു എന്ന് അറിയാനും ഇന്നത്തെ സ്ഥലവാസികളായ ചെറുപ്പക്കാര്‍ ശ്രമിക്കുമെങ്കില്‍...