ചേടി മണ്ണിലൊരു വീട് വൃത്തി

റമദാനിന്റെ ആഗമനം വലിയ ആദരവോടെയാണ് കണ്ടിരുന്നത്. റമദാനിനെ സ്വീകരിക്കാന്‍ ശഅ്ബാന്‍ പകുതിയില്‍ ഒരുങ്ങും. ബറാഅത്ത് കഴിഞ്ഞാല്‍ റമദാന്‍ ആഗതമാവുന്നതിന്റെ സന്തോഷത്തിലാണ്. വീടും പരിസരവും വസ്ത്രങ്ങളും പായയും പലകയുമെല്ലാം കഴുകി വൃത്തിയാക്കും. വീടിന്റെകവും പുറവും ചേടിമണ്ണ് കലക്കിതേച്ചാണ് വൃത്തിയാക്കുന്നത്. നാട്ടിന്‍ പുറങ്ങളില്‍ ചേടിമണ്ണിനായി കറങ്ങും. റമദാന്‍ പോലെയുള്ള വിശേഷ ദിനങ്ങളില്‍ ചേടിമണ്ണ് കൊണ്ട് വൃത്തിയാക്കല്‍ നാട്ടില്‍ പതിവാണ്. പലക കഴുകാന്‍ പുഴയിലോ തോട്ടിലോ പോകും. കൂട്ടുകാര്‍ക്കൊപ്പമുള്ള ഈ പോക്ക് കുട്ടിക്കാലത്തെ ആനന്ദമായിരുന്നു. പള്ളികള്‍ പെയിന്റടിച്ച് മിനുക്കും. റമദാനിന്റെ പ്രതീതി മനസില്‍ സന്തോഷം ചൊരിയും.

റമദാന്‍ പിറവിയറിയാന്‍ ഏറെ കഷ്ടമായിരുന്നു. ചിലപ്പോള്‍ പിറ്റേ ദിവസമാണ് അറിയുക. മുതിര്‍ന്നവര്‍ ഇംസാക് ചെയ്യും. ചെറിയവര്‍ നോമ്പ് പിടിക്കില്ല. ആദ്യ നോമ്പ് പലപ്പോഴും അറിയാതെ പോകുന്നത് പതിവാണ്.

കോഴിക്കോട് ഖാസിയാര്‍ തന്നെയാണ് കുടകിലെ ഖാസി. കോഴിക്കോട് നിന്നും ടെലിഗ്രാം വഴിയാണ് വിവരം അറിഞ്ഞിരുന്നത്. കോഴിക്കോടില്‍ നിന്ന് കണ്ണൂരിലേക്കും അവിടെന്ന് ബീരാജ്‌പേട്ടയിലേക്കും വിവരം എത്തും. ബീരാജ്‌പേട്ടയില്‍ നിന്നാണ് കുടകിലെ എല്ലാ മഹല്ലിലേക്കും വിവരം എത്തുക.

നോമ്പ് തുറക്കാവശ്യമായ സാധനങ്ങള്‍ പരിമിതമാണ്. പട്ടിണിയായിരുന്നു ആ കാലം. ഒരു കാരക്കകൊണ്ട് അഞ്ചാറ് കീറുണ്ടാകിയാണ് എല്ലാവരും കഴിക്കാറ്. പച്ചവെള്ളമാണ് കുടിക്കാന്‍ കിട്ടുക. നോമ്പ് തുറ കഴിഞ്ഞ് കഴിക്കാനായി പത്തിരിയും കോഴിക്കറിയും ഉണ്ടാകും. തറാവീഹിന് പോക്ക് രസമാണ്. പകല്‍ സമയങ്ങളില്‍ ഉസ്താദുമാരുടെ വയളുണ്ടാകും. ളുഹ്‌റിനും അസറിനും തറാവീഹിന് ശേഷമാണ് പ്രധാനമായും വയള് നടക്കാറ്. വയള് കേള്‍ക്കാനായി ആളുകള്‍ ഇരിക്കുകയും അതില്‍ നിന്നും പാഠ മുള്‍കൊണ്ട് ജീവിതത്തില്‍ പകര്‍ത്തുകയും ചെയ്യുമായിരുന്നു.

അത്താഴത്തിന് നക്ഷത്രം നോക്കിയാണ് സമയം അറിയുന്നത്. നിലാകൊറ്റ് നോക്കിയാണ് സമയം മനസിലാക്കുന്നത്. ടൗണുകളില്‍ അത്താഴ നേരത്ത് വിളിച്ചുണര്‍ത്താന്‍ പാട്ടും പാടി വരുന്ന സംഘമുണ്ടായിരുന്നു. എല്ലാദിവസവും പാട്ടും പാടി അവര്‍ വീടാന്തരം കയറിയിറങ്ങും.

റമദാന്‍ 17ന് പള്ളിയില്‍ ഗംഭീരമായി ബദര്‍ മൗലിദ് നടന്നിരുന്നു. ഓരോ വീടുകളില്‍ നിന്നും 17 പത്തിരിയും ഒരു കോഴിയും പള്ളിയില്‍ കൊണ്ട് പോകണം. ജീവനുള്ള കോഴിയാണ് കൊണ്ട് പോകേണ്ടത്. പള്ളിയില്‍ മൊല്ലാക്ക അതിനെ അറുത്ത് തരും. തൊലി വലിച്ച് ക്ലീനാക്കി കൊടുക്കേണ്ടത് കൊണ്ടുപോയ വീട്ടുകാരാണ്. മൗലിദ് കഴിഞ്ഞാല്‍ ചീരണിയുമായി വീട്ടില്‍ പോകാം.

തറാവീഹ് കഴിഞ്ഞാല്‍ പള്ളിയില്‍ വിത്രിയാ ബൈത്ത് പാടും. എല്ലാരും ഒന്നിച്ച് പാടുന്ന വിത്രിയ മനസില്‍ പ്രവാചക പ്രേമത്തിന്റെ പേമാരി പെയ്യിക്കും. വീട്ടിലാണെങ്കില്‍ ഖുര്‍ആനോത്ത് നിര്‍ബന്ധമാണ്. നോമ്പിന്റെ കാര്യത്തില്‍ ഉപ്പ ഒരു വിട്ടുവീഴ്ചക്കും തയ്യാറല്ല. നോമ്പ് പിടിക്കാത്തവരെ വീട്ടില്‍ നിന്ന് പുറത്താക്കും. അത്രയും കണിശമായിരുന്നു ദീനീ കാര്യത്തില്‍ വാപ്പയുടെ നിലപാട്.

Keywords : Article, Ramadan, PM Abbas Musliyar Manjanady, NKM Belinja.