വിജയാ ബാങ്ക് കവര്‍ച്ച: പ്രതികള്‍ തെളിവെടുപ്പിനെത്തിയത് ഒരു കൂസലുമില്ലാതെ; പുഴയിലും തെളിവെടുപ്പിന് കൊണ്ടുവരും

ചെറുവത്തൂര്‍: (www.kasargodvartha.com 14/10/2015) വിജയബാങ്ക് ചെറുവത്തൂര്‍ ശാഖയുടെ തറതുരന്ന് കവര്‍ച്ച നടത്തിയ പ്രതികളെ ചൊവ്വാഴ്ച തെളിവെടുപ്പിന് കൊണ്ടുവന്നു. ഉച്ചയ്ക്ക് ശേഷം റെയില്‍വേ സ്‌റ്റേഷന്‍ റോഡില്‍ സ്ഥിചെയ്യുന്ന ബാങ്കിലേക്ക് പ്രതികളുമായി നീലേശ്വരം സി ഐ കെ ഇ പ്രേമചന്ദ്രന്റെ നേതൃത്വത്തിലുള്ള പോലിസ് സംഘം എത്തിയപ്പോള്‍ വന്‍ ജനാവലിയായിരുന്നു സ്ഥലത്ത് തടിച്ച് കൂടിയത്. യാതൊരു കൂസലുമില്ലാതെയാണ് പ്രതികള്‍ പോലീസിനോട് എല്ലാ വിവരങ്ങളും വിവരിച്ചുകൊടുത്തത്.

രണ്ടു വാഹനങ്ങളിലായാണ് പോലിസ് അകമ്പടിയോടെ നാലു പ്രതികളെയും സൈറ്റില്‍ എത്തിച്ചത്. പ്രധാന പ്രതിയായ അബ്ദുല്‍ ലത്വീഫ്, കൂട്ടു പ്രതികളായ മുബഷീര്‍, സുലൈമാന്‍, രാജേഷ്  മുരളിധരന്‍ എന്നിവരെ നേരെ ബാങ്കിന്റെ താഴത്തെ ഒഴിഞ്ഞ മുറിയിലേക്കാണ് ആദ്യം പോലീസ് കൊണ്ട് പോയത്. സ്‌ട്രോങ്ങ് റൂമിന്റെ കോണ്‍ക്രീറ്റ് തറ തുരന്ന രീതിയും മുകളിലേക്ക് കയറിയതും മുരളിയും ലത്വീഫും വിവരിച്ചുകൊടുത്തു.

ഇടുക്കി സ്വദേശി രാജേഷ് മുരളിയായിരുന്നു തറ തുരപ്പന്‍ ജോലി നിര്‍വ്വഹിച്ചത്. ലത്വീഫായിരുന്നു തുരന്ന ദ്വാരത്തില്‍ക്കൂടി മുകളിലേക്ക് കയറിയത്. പിന്നീട് ബാങ്കിന്റെ സ്‌ട്രോങ്ങ് മുറിക്കകത്തേക്ക് കൊണ്ടുപോയി. അകത്തേക്ക് കയറിയതും സെയ്ഫ് തുറന്നതും സ്വര്‍ണ്ണാഭരണങ്ങള്‍ കൈക്കലാക്കിയ രീതികളെല്ലാം ലത്തീഫ് അന്വേഷണ ചുമതലയുള്ള നീലേശ്വരം സി ഐ കെ ഇ പ്രേമചന്ദ്രനോട് വിവരിച്ചു. താഴത്തെ ഷട്ടര്‍ ഇട്ടശേഷം അബ്ദുല്‍ ലത്വീഫ് മാത്രമാണ് സ്‌ട്രോങ്ങ് റൂമിലേക്ക് കയറിയത്.

രണ്ടു ദിവസങ്ങളിലായി മൂന്നു തവണ സ്‌ട്രോങ്ങ് റൂമിലേക്ക് പ്രവേശിച്ചു. ആദ്യത്തെ സെയ്ഫ് കുത്തിത്തുറന്നപ്പോള്‍ അതിനകത്ത് നിന്ന് താക്കോല്‍ കൂട്ടം കിട്ടി. ഇത് രണ്ടാമത്തെ സേഫ് തുറക്കാന്‍ എളുപ്പമായി. ആദ്യ തവണ കയറിയപ്പോള്‍ അലാറം മുഴങ്ങി. തുടര്‍ന്ന് സ്ഥലത്ത് നിന്ന് പെട്ടെന്ന് തിരിച്ചു പോയി. വീണ്ടു വന്ന് അലാറത്തിന്റെ കണക്ഷന്‍ വേര്‍പെടുത്തിയശേഷമാണ് ശരിക്കുമുള്ള ഓപ്പറേഷന്‍ നടത്തിയതെന്നും ലത്തീഫ് പറഞ്ഞു.

അര മണിക്കൂറിലധികം സമയം ഇവിടെ തെളിവെടുപ്പ് നടത്തിയെങ്കിലും പൂര്‍ണ്ണമായിട്ടില്ലെന്ന് സി ഐ പറഞ്ഞു. അടുത്ത ദിവസം തന്നെ കാര്യങ്കോട് പുഴയിലും തെളിവെടുപ്പ് നടക്കും. ബാങ്കിന്റെ തറ തുരക്കാനുള്ള ഉപകരണങ്ങളും മറ്റും ഈ പുഴയില്‍ വലിച്ചെറിഞ്ഞതിന്റെ പശ്ചാത്തലത്തിലാണ് വീണ്ടും തെളിവെടുപ്പിന് കൊണ്ടുവരിക. ബാങ്കിന്റെ തറ തുരന്ന് 20 കിലോയോളം സ്വര്‍ണാഭരണങ്ങളും 2.95 ലക്ഷം രൂപയുമാണ് കവര്‍ച്ച ചെയ്തത്. ബാങ്കിന്റെ സുരക്ഷ വീഴ്ചയാണ് കവര്‍ച്ചക്കാര്‍ക്ക് സൗകര്യമായതെന്ന് പോലീസിന്റെ നിരീക്ഷണം ഉറപ്പിക്കുന്നതാണ് പ്രതികളുടെ മൊഴികള്‍.