റിയാസ് മൗലവിയെ കൊലപ്പെടുത്തിയതിന്റെ കാരണമെന്ത്? പ്രതികളെ ചോദ്യം ചെയ്തുവരുന്നതായി പ്രത്യേക അന്വേഷണ സംഘത്തലവന്‍ ഡോ. എ ശ്രീനിവാസ്

കാസര്‍കോട്: (www.kasargodvartha.com 23/03/2017) പഴയ ചൂരി ഇസ്സത്തുല്‍ ഇസ്ലാം മദ്രസയിലെ അധ്യാപകനും പള്ളി മുഅദ്ദിനുമായ കുടക് സ്വദേശി റിയാസ് മൗലവി (30) യുടെ കൊലപാതകവുമായി ബന്ധപ്പെട്ട് പിടിയിലായ പ്രതികളെ വിശദമായി ചോദ്യംചെയ്തു വരികയാണെന്ന് പ്രത്യേക അന്വേഷണ സംഘത്തലവന്‍ ഡോ. എ ശ്രീനിവാസ് കാസര്‍കോട് വാര്‍ത്തയോട് പറഞ്ഞു. പ്രതികളെ കൊലയിലേക്ക് നയിക്കാന്‍ കാരണം എന്താണെന്ന കാര്യം പരിശോധിച്ചു വരികയാണ്. പിടിയിലായ പ്രതികള്‍ പോലീസ് നേരത്തെ സംശയിച്ചിരുന്ന പ്രതികള്‍ തന്നെയാണെന്ന് അദ്ദേഹം സൂചിപ്പിച്ചു.

കൊലയ്ക്ക് ഉപയോഗിച്ച ആയുധങ്ങളും മറ്റും കണ്ടെടുക്കുന്നതിനായി വിശദമായി ചോദ്യംചെയ്യേണ്ടതുണ്ട്. കേസില്‍ മറ്റു പ്രതികളുണ്ടോയെന്ന കാര്യവും അന്വേഷിക്കും. പ്രതികളുടെ മൊഴിയുടെ അടിസ്ഥാനത്തില്‍ മാത്രമേ തുടര്‍ന്നുള്ള അന്വേഷണം മുന്നോട്ടുകൊണ്ടുപോകാന്‍ കഴിയുകയുള്ളൂ. എല്ലാ വശങ്ങളും പരിശോധിച്ചു വരികയാണ്. പ്രതികളുടെ അറസ്റ്റ് സംബന്ധിച്ചുള്ള കാര്യങ്ങള്‍ പിന്നീട് മാത്രമേ വ്യക്തമാക്കാന്‍ കഴിയുകയുള്ളൂവെന്നും അദ്ദേഹം പറഞ്ഞു.

കാസര്‍കോട്ട് വെച്ചുതന്നെയാണ് പ്രതികള്‍ പിടിയിലായത്. സംഭവത്തിന് ശേഷം രണ്ട് പേര്‍ നാട്ടില്‍ നിന്നും അപ്രത്യക്ഷരായതായി വിവരം ലഭിച്ചതോടെയാണ് അന്വേഷണം ഇവരിലേക്ക് നീണ്ടത്. ഇവരെ പിടികൂടിയതിന് ശേഷമാണ് മൂന്നാമനും പോലീസ് കസ്റ്റഡിയിലായത്. കാസര്‍കോട്ട് മുമ്പുണ്ടായ അക്രമ സംഭവങ്ങളിലെ പ്രതികളെ പോലീസ് ചോദ്യം ചെയ്തിരുന്നു. ഇവര്‍ക്ക് കേസുമായി ബന്ധമില്ലെന്ന സൂചനയാണ് ലഭിച്ചത്.

പ്രതികള്‍ കൃത്യം നടത്താന്‍ എത്തിയത് ബൈക്കിലാണെന്നാണ് സംശയിക്കുന്നത്. ഇവര്‍ രക്ഷപ്പെട്ട വഴികളും പോലീസിന് വ്യക്തമായിട്ടുണ്ട്. ആയുധങ്ങള്‍ കണ്ടെടുക്കുന്നതിനും, കൊലപാതകം നടത്തുമ്പോള്‍ ഇവര്‍ ധരിച്ചിരുന്ന വസ്ത്രങ്ങള്‍ കണ്ടെടുക്കുന്നതിനും പോലീസ് പല സ്ഥലത്തും അന്വേഷണം നടത്തുന്നുണ്ട്. പ്രതികളുടെ വിരലടയാളങ്ങളും കൊലനടന്ന മുറിയില്‍ നിന്നും ലഭിച്ച വിരലടയാളങ്ങളും പരിശോധിക്കുന്നുണ്ട്.

(ശ്രദ്ധിക്കുക: ഗൾഫ് - വിനോദം - ടെക്നോളജി - സാമ്പത്തികം- പ്രധാന അറിയിപ്പുകൾ-വിദ്യാഭ്യാസം-തൊഴിൽ വിശേഷങ്ങൾ ഉൾപ്പെടെ മലയാളം വാർത്തകൾ നിങ്ങളുടെ മൊബൈലിൽ ലഭിക്കാൻ കെവാർത്തയുടെ പുതിയ ആൻഡ്രോയിഡ് ആപ്പ് ഇവിടെ ക്ലിക്ക് ചെയ്ത് ഡൗൺലോഡ് ചെയ്യുക. ഉപയോഗിക്കാനും ഷെയർ ചെയ്യാനും എളുപ്പം 😊)