നിങ്ങളെന്നെ കമ്മ്യൂണിസ്റ്റാക്കിയെന്ന് റിട്ട. എസ് പി ഹബീബ് റഹ് മാന്‍ ഫേസ്ബുക്കില്‍

കാസര്‍കോട്: (www.kasargodvartha.com 20/05/2016) നിങ്ങളെന്നെ കമ്മ്യൂണിസ്റ്റ് ആക്കിയെന്ന് റിട്ട. എസ് പി ഹബീബ് റഹ് മാന്‍ ഫേസ്ബുക്കില്‍ കുറിച്ചു. ഉദുമയില്‍ കെ.കുഞ്ഞിരാമന്റെ വിജയം ആഘോഷിക്കുന്നതിന്റെ ഫോട്ടോ പോസ്റ്റു ചെയ്തുകൊണ്ടാണ് അദ്ദേഹം നിങ്ങളെന്നെ കമ്മ്യൂണിസ്റ്റ് ആക്കിയെന്ന് ഫേസ്ബുക്കില്‍ കുറിച്ചിരിക്കുന്നത്.

നേരത്തെ ഹബീബ് റഹ് മാന് മുസ്ലിം ലീഗില്‍ അംഗത്വം നല്‍കുന്നതിന് മുസ്ലിം ലീഗ് സംസ്ഥാന നേതൃത്വം ശ്രമം നടത്തിയിരുന്നു. ചെമ്മനാട് ശാഖാ നേതൃത്വവും ഹബീബ് റഹ് മാന് അംഗത്വം നല്‍കുന്നതിന് അനുകൂല നിലപാടാണ് സ്വീകരിച്ചിരുന്നത്. എന്നാല്‍ എസ്.കെ.എസ്.എസ്.എഫ്, യൂത്ത് ലീഗ് തുടങ്ങിയ സംഘടനകളുടെ ശക്തമായ എതിര്‍പ്പിനെ തുടര്‍ന്ന് മുസ്ലിം ലീഗ് ജില്ലാ നേതൃത്വം ഹബീബ് റഹ് മാന് അംഗത്വം നല്‍കുന്ന സമ്മേളനം തടയുകയായിരുന്നു. പിന്നീട് ഈ വിഷയം കെട്ടടങ്ങിയെങ്കിലും ഇപ്പോള്‍ ഹബീബ് റഹ് മാന്‍ സിപിഎമ്മുമായി അടുത്തത് മുസ്ലിം ലീഗിന് ചെമ്മനാട്ട് തിരിച്ചടിയായി മാറിയിട്ടുണ്ട്.

തിരഞ്ഞെടുപ്പിന് മുമ്പു തന്നെ താനും തങ്ങള്‍ക്കൊപ്പമുള്ള യുവാക്കളും സിപിഎമ്മിന് വേണ്ടി പ്രവര്‍ത്തിക്കാന്‍ തുടങ്ങിയിരുന്നുവെന്നും സിപിഎം പ്രാദേശിക നേതാക്കളായ ടി.വി കുഞ്ഞിരാമന്‍, നാരായണന്‍ എന്നിവര്‍ പാര്‍ട്ടിയുമായി സഹകരിക്കുന്നതില്‍ പൂര്‍ണപിന്തുണയാണ് നല്‍കിയിരുന്നതെന്നും ഹബീബ് റഹ് മാന്‍ കാസര്‍കോട് വാര്‍ത്തയോട് പറഞ്ഞു.

ചെമ്മനാട്ടെ 1,2 ബൂത്തില്‍ കെ.കുഞ്ഞിരാമന് 400 ഓളം വോട്ട് ലഭിച്ചത് തങ്ങളുടെ പ്രവര്‍ത്തനം കൊണ്ടാണെന്ന് ഹബീബ് റഹ് മാന്‍ പറയുന്നു. മുമ്പ് 100 ല്‍ താഴെ വോട്ടുമാത്രമാണ് ചെമ്മനാട്ട് സിപിഎമ്മിന് ലഭിച്ചിരുന്നത്. ലീഗിന് മാത്രം നിര്‍ണായക സ്വാധീനമുള്ള ചെമ്മനാട്ട് എല്‍ ഡി എഫ് സ്ഥാനാര്‍ത്ഥി കെ.കുഞ്ഞിരാമന് കാര്യമായ പിന്തുണ ലഭിച്ചത് കെ. സുധാകരന്റെ പരാജയത്തിന് ആക്കം കൂട്ടിയതായും സിപിഎം പ്രാദേശിക നേതൃത്വം കരുതുന്നു. യുഡിഎഫ് ചെമ്മനാട് പഞ്ചായത്തില്‍ മാത്രം 12,000 വോട്ടാണ് അധികമായി പ്രതീക്ഷിച്ചത്. എന്നാല്‍ 8000 ല്‍ താഴെ വോട്ടുമാത്രമാണ് കെ. സുധാകരന് ചെമ്മനാട് പഞ്ചായത്തില്‍ നിന്നും ലഭിച്ചത്. വോട്ടെടുപ്പ് കഴിഞ്ഞയുടന്‍ തന്നെ ചെമ്മനാട്ടെ പോളിംഗ് ശതമാനം കണക്കുകൂട്ടി യുഡിഎഫ് പരാജയം മണത്തിരുന്നു. അത് ശരിവെക്കുന്നതായിരുന്നു തിരഞ്ഞെടുപ്പ് ഫലം.