പുലിയന്നൂര്‍ ജാനകി വധം; അന്വേഷണം ബന്ധുക്കളിലേക്ക് തന്നെ

ചീമേനി: (www.kasargodvartha.com 22.01.2018) റിട്ട. പ്രധാനാധ്യാപിക പുലിയന്നൂരിലെ പി വി ജാനകിയെ കഴുത്തറുത്ത് കൊലപ്പെടുത്തിയ കേസില്‍ പോലീസ് അന്വേഷണം വീണ്ടും ബന്ധുക്കളിലേക്ക് തിരിഞ്ഞു. ഘാതകര്‍ പോലീസിന് കണ്‍മുന്നില്‍ തന്നെയുണ്ടെന്ന് പോലീസ് വിളിച്ചു കൂട്ടിയ നാട്ടുകാരുടെ യോഗത്തില്‍ വിമര്‍ശനമുയര്‍ന്നു.

സംഭവവുമായി എന്തെങ്കിലും വിവരം അറിയാവുന്നവര്‍ പോലീസിനെ അറിയിക്കണമെന്ന് യോഗത്തിന് നേതൃത്വം കൊടുത്ത ക്രൈംബ്രാഞ്ച് ഡിവൈഎസ്പി പി പ്രദീപ്കുമാര്‍ ആവശ്യപ്പെട്ടപ്പോള്‍ പരിസരവാസിയായ ഒരു യുവതി ഉള്‍പ്പെടെ തങ്ങള്‍ക്കറിയാവുന്ന ചില വിവരങ്ങള്‍ അന്വേഷണ സംഘത്തിന് എഴുതി നല്‍കിയിരുന്നു. ഇതിലെ ചില കുറിപ്പുകളിലാണ് ജാനകി വധത്തിന് പിന്നില്‍ ഇവരുമായി വളരെ അടുപ്പമുള്ളവരാണെന്ന് സൂചന നല്‍കിയത്.

അതേ സമയം കൊലക്ക് പിന്നില്‍ പുറമെ നിന്നുള്ളവരല്ലെന്നു തന്നെയാണ് അന്വേഷണ സംഘവും വിശദമാക്കുന്നത്. അതുകൊണ്ട് തന്നെ ഇപ്പോള്‍ അന്വേഷണം പുലിയന്നൂരും പരിസരപ്രദേശങ്ങളും കേന്ദ്രീകരിച്ചാണ് നടക്കുന്നത്. ജാനകിയുടെ ദേഹത്തും ഭര്‍ത്താവ് കൃഷ്ണന്‍ മാസ്റ്ററുടെ ദേഹത്തും ഉണ്ടായിരുന്ന മുറിവുകളില്‍ വൈരുധ്യമുണ്ടെന്നും വിദഗ്ധ പരിശോധനയില്‍ തെളിഞ്ഞിട്ടുണ്ട്.

അന്വേഷണം പ്രതികളോട് അടുത്തെത്തി നില്‍ക്കുന്നുണ്ടെങ്കിലും തെളിവുകള്‍ കൂട്ടിയോജിപ്പിക്കാന്‍ പറ്റാത്തതാണ് അറസ്റ്റ് വൈകുന്നതെന്നാണ് സൂചന. എന്നാല്‍ ഉന്നതങ്ങളില്‍ നിന്നുള്ള കടുത്ത സമ്മര്‍ദ്ദമാണ് അന്വേഷണ സംഘത്തിനുള്ളതെന്നും സൂചനയുണ്ട്. അതുകൊണ്ട് തന്നെ അന്വേഷണത്തിന് നേതൃത്വം കൊടുക്കുന്ന ഉദ്യോഗസ്ഥരിലും കടുത്ത അതൃപ്തിയുണ്ട്.

ഇതിനിടയില്‍ നിലവിലുണ്ടായിരുന്ന അന്വേഷണ സംഘത്തലവന്‍ കാഞ്ഞങ്ങാട് ഡിവൈഎസ്പി കെ ദാമോദരന്റെ മുകളിലായി ക്രൈംബ്രാഞ്ച് ഡിവൈഎസ്പി പി പ്രദീപ്കുമാറിനും ചുമതല നല്‍കിയിട്ടുണ്ട്.

Related News:
പുലിയന്നൂര്‍ ജാനകി വധക്കേസില്‍ വീടുമായി ബന്ധമുള്ളവരിലേക്ക് അന്വേഷണം വേണമെന്ന് നാട്ടുകാര്‍; യുവതി രഹസ്യവിവരങ്ങളടങ്ങിയ കുറിപ്പ് അന്വേഷണസംഘത്തിന് കൈമാറി