ജാനകി വധം; കണ്ണൂര്‍ ഡി വൈ എസ് പി പി പി സദാനന്ദന് അന്വേഷണ ചുമതല നല്‍കിയേക്കും

കാസര്‍കോട്:(www.kasargodvartha.com 16/01/2018) ചീമേനി പുലയന്നൂരിലെ റിട്ട. അധ്യാപിക ജാനകിയെ ക്രൂരമായി കഴുതറുത്ത് കൊലപ്പെടുത്തിയ കേസില്‍ അന്വേഷണം കണ്ണൂര്‍ ഡി വൈ എസ് പി പി പി സദാനന്ദന് നല്‍കിയേക്കും. കൊലപാതകം നടന്ന് ഒരു മാസം കഴിഞ്ഞിട്ടും അന്വേഷണത്തില്‍ യാതൊരു തുമ്പും കണ്ടെത്താന്‍ കഴിയാത്ത സാഹചര്യത്തിലാണ് ഇപ്പോഴത്തെ അന്വേഷണ ഉദ്യോഗസ്ഥനെ മാറ്റി കണ്ണൂര്‍ ഡി വൈ എസ് പിക്ക് അന്വേഷണ ചുമതല കൈമാറാന്‍ തീരുമാനിച്ചിരിക്കുന്നത് എന്നാണ് വിവരം.

അടിക്കടി ഉണ്ടായ കൊലപാതകത്തില്‍ പ്രതികളെ പിടികൂടാന്‍ കഴിയാത്തത് ആഭ്യന്തരവകുപ്പിന് തന്നെ നാണക്കേട് ഉണ്ടാക്കിയിരുന്നു. പി വി ജാനകിയെ കവര്‍ച്ചസംഘം ക്രൂരമായി കൊലപ്പെടുത്തിയ സംഭവം നടന്ന് ഒരു മാസം പിന്നിട്ടിട്ടും നിലവിലെ അന്വേഷണ ഉദ്യോഗസ്ഥര്‍ക്ക് പ്രതികളെ കുറിച്ച് ഒരു സൂചനയും കിട്ടാത്ത സാഹചര്യത്തിലാണ് ജിഷ കൊലക്കേസിലടക്കം അന്വേഷണത്തിന് പ്രധാന പങ്ക് വഹിച്ച ഉദ്യോഗസ്ഥനെ പുതിയ ടീമിന്റെ മേല്‍നോട്ടം എല്‍പ്പിക്കാന്‍ തീരുമാനിച്ചിരിക്കുന്നത്.


പാര്‍ട്ടി ഗ്രാമത്തില്‍ നടന്ന കൊലപാതകത്തില്‍ ഒരു തുമ്പുമുണ്ടാക്കാന്‍ കഴിയാത്ത നിലവിലെ അന്വേഷണ സംഘത്തിനെതിരെ ജില്ലാ സമ്മേളനത്തില്‍ അടക്കം വലിയ വിമര്‍ശനങ്ങളാണ് ഉയര്‍ന്നത്. ഈ സാഹചര്യത്തില്‍ കൂടിയാണ് പുതിയ അന്വേഷണ ഉദ്യോഗസ്ഥനെ നിയോഗിക്കുന്നതെന്നാണ് വിവരം. അടുത്തിടെ മലയാളികളുടെ ദാഇഷ് ബന്ധങ്ങള്‍ ഉള്‍പ്പടെയുള്ള നിര്‍ണായക കേസുകളില്‍ തെളിവുകള്‍ കണ്ടെത്തിയ ഉദ്യോഗസ്ഥനാണ് സദാനന്ദന്‍.