ജാനകി വധത്തില്‍ തനിക്ക് പങ്കുണ്ടെന്ന വ്യാജപ്രചാരണം മാനസികമായി തളര്‍ത്തി; മരിച്ചാല്‍ വരെയെന്ന് ചിന്തിച്ചു, പ്രതികള്‍ ഒടുവില്‍ പിടിയിലായപ്പോള്‍ നിരപരാധിത്വം തെളിഞ്ഞതില്‍ സന്തോഷമെന്ന് കൃഷ്ണന്‍ മാസ്റ്റര്‍

കാഞ്ഞങ്ങാട്: (www.kasargodvartha.com 22.02.2018) പുലിയന്നൂരിലെ റിട്ട. അധ്യാപിക ജാനകി വധവുമായി ബന്ധപ്പെട്ട് ഉയര്‍ന്ന ഊഹാപോഹങ്ങള്‍ മാനസികമായി തളര്‍ത്തിയ ഭര്‍ത്താവ് കൃഷ്ണന്‍ മാസ്റ്റര്‍ക്ക് ഇനി ആശ്വാസത്തിന്റെ ദിനങ്ങള്‍. ജാനകി വധവുമായി കൃഷ്ണന്‍ മാസ്റ്റര്‍ക്ക് ബന്ധമുണ്ടെന്ന തരത്തിലുള്ള പ്രചാരണങ്ങള്‍ ഉയര്‍ന്നു വന്നത് അദ്ദേഹത്തെയും കുടുംബത്തെയും മാനസികമായി തളര്‍ത്തിയിരുന്നു.

കൃഷ്ണന്‍ മാസ്റ്ററെ നുണ പരിശോധനയ്ക്ക് വിധേയമാക്കുമെന്ന പത്രവാര്‍ത്തകള്‍ കൂടി വന്നതോടെ ഇദ്ദേഹത്തിനെതിരായ സംശയം വര്‍ദ്ധിക്കുകയും ചെയ്തു. ഒരാഴ്ചയായി കടുത്ത മാനസിക സംഘര്‍ഷത്തില്‍ കഴിഞ്ഞുവരികയായിരുന്നു താനെന്നും ചോര വാര്‍ന്ന് താനും മരിച്ചാല്‍ മതിയായിരുന്നുവെന്ന് വരെ ചിന്തിച്ചിരുന്നുവെന്നും സത്യം തെളിഞ്ഞതില്‍ സന്തോഷമുണ്ടെന്നും കൃഷ്ണന്‍ മാസ്റ്റര്‍ പറയുന്നു. 33 വര്‍ഷം കുട്ടികളെ പഠിപ്പിച്ച അധ്യാപകനെന്ന പരിഗണന പോലും ചില ഭാഗത്തു നിന്നും ലഭിച്ചില്ല.

പ്രതികളെ പിടികൂടണമെന്നാവശ്യപ്പെട്ട് കുടുംബത്തോടൊപ്പം മുഖ്യമന്ത്രിയെ കാണാന്‍ കൃഷ്ണന്‍ മാസ്റ്റര്‍ തീരുമാനിച്ചിരുന്നു. സംഭവത്തിനു ശേഷം പുലിയന്നൂരിലെ വീട്ടിലേക്ക് പോയിരുന്നില്ല. രണ്ടുമാസമായി ഉദിനൂര്‍ കോരംകുളത്തെ മകളുടെ വീട്ടിലാണ് കൃഷ്ണന്‍ മാസ്റ്റര്‍ താമസിക്കുന്നത്.
(ശ്രദ്ധിക്കുക: ഗൾഫ് - വിനോദം - ടെക്നോളജി - സാമ്പത്തികം- പ്രധാന അറിയിപ്പുകൾ-വിദ്യാഭ്യാസം-തൊഴിൽ വിശേഷങ്ങൾ ഉൾപ്പെടെ മലയാളം വാർത്തകൾ നിങ്ങളുടെ മൊബൈലിൽ ലഭിക്കാൻ കെവാർത്തയുടെ പുതിയ ആൻഡ്രോയിഡ് ആപ്പ് ഇവിടെ ക്ലിക്ക് ചെയ്ത് ഡൗൺലോഡ് ചെയ്യുക. ഉപയോഗിക്കാനും ഷെയർ ചെയ്യാനും എളുപ്പം 😊)
< !- START disable copy paste -->