കാലിയാ റഫീഖും സംഘവും യാത്രചെയ്ത കാര്‍ കീഴൂര്‍ സ്വദേശിയുടേത്

By Desk DeltaFeb 18, 2017, 14:45 IST

മംഗളൂരു: (www.kasargodvartha.com 18/02/2017) കൊലപ്പെട്ട ഉപ്പള മണിമുണ്ടയിലെ കാലിയാ റഫീഖും(38) സംഘവും സഞ്ചരിച്ച റിറ്റ്‌സ് കാര്‍ കീഴൂര്‍ സ്വദേശിയുടേതാണെന്ന് സൂചന. കീഴൂര്‍ സ്വദേശിയില്‍നിന്നും ബന്ധുവായ മേല്‍പറമ്പ് സ്വദേശി ഓടിക്കാന്‍ വാങ്ങിയ ഈ കാറിലാണ് കാലിയാ റഫീഖും സംഘവും ആയുധങ്ങള്‍ വാങ്ങാനായി പൂനയിലേക്ക് പുറപ്പെട്ടതെന്നാണ് വിവരം.

വിവാഹ വീട്ടില്‍നിന്നും സ്വര്‍ണം കവര്‍ന്ന കേസിലടക്കം പ്രതിയായ മേല്‍പറമ്പ് സ്വദേശിയും മറ്റൊരു യുവാവുമാണ് കാലിയാ റഫീഖിനോടൊപ്പം ഈ കാറിലുണ്ടായിരുന്നതെന്നാണ് അറിയുന്നത്. റഫീഖിന് നേരെ അക്രമം ഉണ്ടായ ഉടനെ മേല്‍പറമ്പ് സ്വദേശിയും കൂട്ടാളികളും സ്ഥലത്തുനിന്നും രക്ഷപ്പെട്ടിരുന്നു. കാറിലുണ്ടായിരുന്ന ഒരു യുവാവ് ബാഗുമായാണ് കാറില്‍നിന്നും രക്ഷപ്പെട്ടത്. ഈ കാറില്‍ പണമുണ്ടായിരുന്നതായും സൂചനയുണ്ട്. ഇതിന് ശേഷം ഇതുവരെ ഇവര്‍ പോലീസിനെ ബന്ധപ്പെട്ടിട്ടില്ല. കാറിലുണ്ടായിരുന്ന വികലാംഗനായ മണിമുണ്ടയിലെ സിയാദ് മാത്രമാണ് അക്രമികളെ ചെറുത്തത്. ഇതിനിടയില്‍ സിയാദിന് കൈക്ക് വെട്ടേറ്റിരുന്നു. കാലിയാ റഫീഖിന്റെ വിശ്വസ്തനായ കൂട്ടാളിയാണ് സിയാദ്.

മേല്‍പറമ്പ് സ്വദേശികള്‍ മാസങ്ങള്‍ക്ക് മുമ്പാണ് കാലിയാ റഫീഖുമായി ബന്ധം സ്ഥാപിച്ചതെന്നും സൂചനയുണ്ട്. ഇവര്‍ ഒറ്റുകാരായാണോ കാലിയാ റഫീഖിന്റെ സംഘത്തില്‍ ചേര്‍ന്നതെന്ന് പോലീസ് അന്വേഷിക്കുന്നുണ്ട്.