കുഡ്‌ലു ബാങ്ക് കൊള്ള: നീര്‍ച്ചാല്‍ സ്വദേശി എവിടെ? പോലീസ് കുഴങ്ങുന്നു

കാസര്‍കോട്: (www.kasargodvartha.com 08/09/2015) കുഡ്‌ലു സര്‍വ്വീസ് സഹകരണ ബാങ്കില്‍ നിന്നും 21 കിലോ സ്വര്‍ണവും 13 ലക്ഷം രൂപയുമടക്കം 5.28 കോടി രൂപയുടെ മുതലുകള്‍ കൊള്ളയടിച്ച സംഭവത്തില്‍ നീര്‍ച്ചാല്‍ സ്വദേശിയെ പോലീസ് തിരയുന്നു. കവര്‍ച്ച നടന്ന ബാങ്കിന് പുറത്ത് ബൈക്കില്‍ കടന്നുകളയാനുള്ള ശ്രമത്തിനിടെ നീര്‍ച്ചാല്‍ സ്വദേശിയെ ഇവിടെ ജോലിചെയ്യുന്ന ഒരു കടയിലെ ജീവനക്കാരന്‍ കണ്ടിരുന്നതായി പോലീസിന് വ്യക്തമായ മൊഴി ലഭിച്ചിട്ടുണ്ട്.

ഇയാളില്‍നിന്നും വിവരം ലഭിച്ചതിന്റെ അടിസ്ഥാനത്തില്‍ പോലീസ് നീര്‍ച്ചാല്‍ സ്വദേശിയെ അന്വേഷിച്ചെങ്കിലും ഇയാള്‍ മൂന്ന് ദിവസമായി നാട്ടിലില്ലെന്നാണ് വിവരം ലഭിച്ചത്. ഇയാളുടെ മൊബൈല്‍ നമ്പറില്‍ ബന്ധപ്പെടാനും കഴിഞ്ഞിട്ടില്ല. അതുകൊണ്ടുതന്നെ കവര്‍ച്ചയില്‍ ഇയാള്‍ക്ക് എന്തെങ്കിലും പങ്കുണ്ടെന്നുതന്നെയാണ് പോലീസ് സംശയിക്കുന്നത്. ഇയാളെ കണ്ടെത്താന്‍ അന്വേഷണം ഊര്‍ജിതമാക്കിയിട്ടുണ്ട്. മുമ്പ് നിരവധി കവര്‍ച്ചാ കേസില്‍ ഉള്‍പെട്ടയാളാണ് ഇയാളെന്നും അന്വേഷണസംഘം സൂചിപ്പിച്ചു.

ഇയാളുടെ സംഘത്തില്‍പെട്ട ചിലരെകുറിച്ചും പോലീസ് അന്വേഷണം ആരംഭിച്ചിട്ടുണ്ട്. കവര്‍ച്ചചെയ്യപ്പെട്ട സ്വര്‍ണം ജില്ലയില്‍നിന്നും പുറത്തെത്താതിരിക്കാന്‍ പോലീസ് വ്യാപകമായ പരിശോധനയും അന്വേഷണവും നടത്തിവരികയാണ്. ഇതിനിടയില്‍ സ്‌പെഷ്യല്‍ ടീമിലെ ഒരുസംഘം കര്‍ണാടകയുടെ വിവധ ഭാഗങ്ങളിലേക്ക് തിരിച്ചിട്ടുണ്ട്. പ്രതികള്‍ വൈകാതെ തന്നെ പിടിയലാകുമെന്ന ഉറച്ചവിശ്വാസത്തിലാണ് പോലീസ്.