സലാം ഹാജി വധക്കേസിലെ പൂച്ചക്കണ്ണന്‍ പ്രതിയെ പോലീസ് തെരയുന്നു

ചെറുവത്തൂര്‍: ഗള്‍ഫ് വ്യാപാരി തൃക്കരിപ്പൂര്‍ വെള്ളാപ്പിലെ എ.ബി. അബ്ദുല്‍ സലാം ഹാജിയെ കൊലപ്പെടുത്തി ആഭരങ്ങളും പണവും കവര്‍ച്ച ചെയ്ത കേസില്‍ അറസ്റ്റിലായ പ്രതികളെ ബുധനാഴ്ച കോടതിയില്‍ ഹാജരാക്കി.

കേസിലെ മുഖ്യ പ്രതികളായ നീലേശ്വരം ആനച്ചാല്‍ എടക്കാവിലെ ഇ.കെ. മുഹമ്മദ് നൗഷാദ് (34), ഇയാളുടെ മാതൃസഹോദരിയുടെ മകന്‍ ഇ.കെ. മുഹമ്മദ് റമീസ് (28) എന്നിവരെയാണ് പോലീസ് കൊലപാതകവുമായി ബന്ധപ്പെട്ട് അറസ്റ്റ് ചെയ്തത്. ഇവരുടെ അറസ്റ്റ് ഔദ്യോഗികമായി ചൊവ്വാഴ്ചയാണ് രേഖപ്പെടുത്തിയത്.

കൊലപാതക സംഘത്തില്‍ ഏഴുപേര്‍ ഉണ്ടായിരുന്നതായി ഇവര്‍ നല്‍കിയ മൊഴിയില്‍ പറയുന്നു. ഇവരെ കണ്ടെത്താനുള്ള ശ്രമങ്ങള്‍ ആരംഭിച്ചതായി പോലീസ് പറഞ്ഞു. എന്നാല്‍ ഇവരെ കൂടാതെ കൊലപാതക സംഘത്തിലുണ്ടായിരുന്ന രണ്ടുപേരെ കൂടി പോലീസ് അറസ്റ്റ് ചെയ്തതായും സൂചനയുണ്ട്. പോലീസ് അന്വേഷിക്കുന്ന പ്രതികളില്‍ ഒരാള്‍ പൂച്ചക്കണ്ണനായ ഒരു ആജാനബാഹുവാണെന്നും വിവരമുണ്ട്. കൊലപാതകത്തിനും കവര്‍ച്ചയ്ക്കും നേതൃത്വം നല്‍കിയതും ഇയാളാണെന്നാണ് കരുതുന്നത്.

ഇയാളെ തിരിച്ചറിയാതിരിക്കാനായി കൃത്രിമമായി ലെൻസ് വെച്ചതാണോ പൂച്ചക്കണ്ണെന്നും സംശയിക്കുന്നു. ഇയാളെ കണ്ടെത്തുന്നതോടെ കൊലപാതകത്തിന്റെ ചുരുളഴിക്കാന്‍ കഴിയുമെന്നാണ് പോലീസ് പറയുന്നത്.

Related News: