ദേവകി വധം; ഘാതകരെ കുടുക്കാന്‍ ക്രൈംബ്രാഞ്ച് അന്വേഷണസംഘം ചെന്നൈയില്‍

കാസര്‍കോട്: (www.kasargodvartha.com 05.11.2017) പനയാല്‍ കാട്ടിയടുക്കത്തെ ദേവകി (68)യെ കഴുത്തുഞെരിച്ച് കൊലപ്പെടുത്തിയ കേസില്‍ ക്രൈംബ്രാഞ്ച് അന്വേഷണം അവസാന ഘട്ടത്തില്‍. പ്രതികളെക്കുറിച്ച് സൂചന ലഭിച്ചതിന്റെ അടിസ്ഥാനത്തില്‍ ക്രൈംബ്രാഞ്ചിന്റെ പ്രത്യേക അന്വേഷണ സംഘം ചെന്നൈയിലെത്തി. ദേവകിയുടെ ഘാതകരെന്ന് സംശയിക്കുന്ന രണ്ടുപേര്‍ ഇപ്പോള്‍ ചെന്നൈയിലുണ്ടെന്നാണ് വിവരം. ഇവരെ പിടികൂടാനായാല്‍ കേസ് വേഗത്തില്‍ തെളിയിക്കാനാകുമെന്ന് ക്രൈംബ്രാഞ്ച് കണക്കുകൂട്ടുന്നു.

ഇക്കഴിഞ്ഞ ജനുവരി 13 നാണ് അടച്ചുറപ്പില്ലാത്ത വീട്ടില്‍ തനിച്ച് താമസിക്കുകയായിരുന്ന ദേവകിയെ കൊല്ലപ്പെട്ട നിലയില്‍ കണ്ടെത്തിയത്. കഴുത്തു ഞെരിച്ചും തലയണ കൊണ്ട് ശ്വാസം മുട്ടിച്ചുമാണ് കൊല നടത്തിയതെന്ന് പരിയാരം മെഡിക്കല്‍ കോളേജ് ആശുപത്രിയില്‍ നടത്തിയ പോസ്റ്റുമോര്‍ട്ടത്തില്‍ തെളിഞ്ഞിരുന്നു. ലോക്കല്‍ പോലീസ് മാസങ്ങളോളം അന്വേഷണം നടത്തിയെങ്കിലും പ്രതികളെക്കുറിച്ച് സൂചനയൊന്നും ലഭിച്ചില്ല. ഇതേ തുടര്‍ന്ന് സി പി എം നേതൃത്വത്തില്‍ ആക്ഷന്‍ കമ്മിറ്റി രൂപീകരിച്ച് സമരം നടത്തിയതോടെയാണ് കേസ് കണ്ണൂര്‍ ക്രൈംബ്രാഞ്ച് എസ് പി ഡോ. എ ശ്രീനിവാസന്റെ നേതൃത്വത്തിലുള്ള പ്രത്യേക അന്വേഷണസംഘത്തിന് കൈമാറിയത്.

ഡിവൈ എസ് പി യു.വി പ്രേമന്റെ നേതൃത്വത്തിലാണ് അന്വേഷണം പുരോഗമിക്കുന്നത്. പ്രേമന്റെ നേതൃത്വത്തിലുള്ള അന്വേഷണസംഘം  ദേവകിയുടെ വീടിന് സമീപത്തെ വീട്ടില്‍ ക്യാമ്പ് ഓഫീസ് തുറന്നാണ് അന്വേഷണം നടത്തിവരുന്നത്. അന്വേഷണത്തിന്റെ ഭാഗമായി നിരവധി പേരില്‍ നിന്ന് മൊഴിയെടുക്കുകയും ചെയ്തു. കൊലയ്ക്കു ശേഷം കാട്ടിയടുക്കത്ത് നിന്നും സമീപ പ്രദേശങ്ങളില്‍ നിന്നും കാണാതായവരെ കേന്ദ്രീകരിച്ചായിരുന്നു പ്രധാന അന്വേഷണം. ഇതിനിടയിലാണ് കൊലപാതകവുമായി ബന്ധമുണ്ടെന്ന് സംശയിക്കുന്ന രണ്ടുപേര്‍ ഇപ്പോള്‍ ചെന്നൈയിലുണ്ടെന്ന സൂചന ലഭിച്ചത്.