ദേവകി വധം: ക്രൈംബ്രാഞ്ചിനും തുമ്പുണ്ടാക്കാന്‍ കഴിഞ്ഞില്ല, കൊലയാളി ഇന്നും വലയ്ക്ക് പുറത്ത്

പെരിയാട്ടടുക്കം : (www.kasargodvartha.com 08.09.2017) പനയാല്‍ കാട്ടിയടുക്കത്തെ ദേവകി (68)യെ കൊലപ്പെടുത്തിയ കേസില്‍ അന്വേഷണം നടത്തിയ ക്രൈംബ്രാഞ്ചിനും ഒരു തുമ്പുണ്ടാക്കാന്‍ കഴിഞ്ഞില്ല. നിരവധി പേരെ ക്രൈംബ്രാഞ്ച് അന്വേഷണ സംഘം ചോദ്യം ചെയ്തിരുന്നുവെങ്കിലും ഇതുവരെ കൊലപാതകം തെളിയിക്കാന്‍ സാധിച്ചിട്ടില്ല. ഇത് നാട്ടുകാര്‍ക്കിടയില്‍ പ്രതിഷേധത്തിനിടയാക്കിയിട്ടുണ്ട്. നേരത്തെ ലോക്കല്‍ പോലീസിന് കേസില്‍ ഒരു തുമ്പുമുണ്ടാക്കാന്‍ കഴിയാത്തതിനെ തുടര്‍ന്ന് കേസ് ക്രൈംബ്രാഞ്ചിനെ ഏല്‍പിക്കുകയായിരുന്നു. എന്നാല്‍ ക്രൈംബ്രാഞ്ച് അന്വേഷണവും സമാനരീതിയിലാണ്.

ദേവകിയെ ഇക്കഴിഞ്ഞ ജനുവരി 13നാണ് താമസസ്ഥലത്ത് കൊല്ലപ്പെട്ട നിലയില്‍ കണ്ടെത്തിയത്. സംഭവത്തില്‍ ലോക്കല്‍ പോലീസ് മാസങ്ങളോളം അന്വേഷിച്ചെങ്കിലും കൊലയാളിയെ കണ്ടെത്താന്‍ കഴിഞ്ഞില്ല. ഇതോടെ സിപിഎം നേതൃത്വത്തില്‍ രൂപീകരിച്ച ആക്ഷന്‍ കമ്മിറ്റിയും ബി.ജെ.പിയും പ്രക്ഷോഭം നടത്തുകയും ചെയ്തു. കൊലപാതകവുമായി ബന്ധമുണ്ടെന്നു സംശയിക്കുന്നവരെയെല്ലാം ശാസ്ത്രീയ രീതിയില്‍ ചോദ്യം ചെയ്യലിനു വിധേയമാക്കിയെങ്കിലും തുമ്പൊന്നും ലഭിച്ചില്ല. തുടര്‍ന്ന് ആക്ഷന്‍ കമ്മിറ്റി കെ. കുഞ്ഞിരാമന്‍ എം.എല്‍.എയുടെ നേതൃത്വത്തില്‍ മുഖ്യമന്ത്രിയെ കണ്ട് നിവേദനം നല്‍കി. തുടര്‍ന്നാണ് കേസ് ക്രൈംബ്രാഞ്ചിനു വിട്ടത്.

കണ്ണൂര്‍ ക്രൈംബ്രാഞ്ച് എസ് പി ഡോ. എ. ശ്രീനിവാസിന്റെ നേതൃത്വത്തിലുള്ള സംഘമാണ് അന്വേഷണം ഏറ്റെടുത്തത്. അന്വേഷണത്തിന്റെ ഭാഗമായി ക്രൈംബ്രാഞ്ച് ഡിവൈ.എസ്.പിയുടെ നേതൃത്വത്തില്‍ സംഘത്തെ നിയോഗിച്ചു. എന്നാല്‍ അന്വേഷണം ആരംഭിച്ചതിനു തൊട്ടു പിന്നാലെ ഡിവൈ.എസ്.പിയെ സ്ഥലം മാറ്റി. ഇതെന്തിനാണെന്ന കാര്യത്തില്‍ വ്യക്തത ഉണ്ടായിട്ടില്ല. പിന്നീട് മറ്റൊരു ഡിവൈ.എസ്.പിയുടെ നേതൃത്വത്തില്‍ അന്വേഷണം തുടങ്ങുകയും കൊലപാതകം നടന്ന വീടിനു വിളിപ്പാടകലെ ക്യാമ്പ് ഓഫീസ് തുറക്കുകയും നിരവധി പേരെ വിളിച്ചു വരുത്തി ചോദ്യം ചെയ്തുവെങ്കിലും കൊലയാളിയിലേയ്ക്കു വിരല്‍ ചൂണ്ടുന്ന ഒരു തെളിവും കണ്ടെത്താന്‍ കഴിഞ്ഞിട്ടില്ല.

കൊല നടന്നിട്ട് എട്ട് മാസമായിട്ടും കൊലയാളിയെ പിടിക്കാന്‍ കഴിയാത്തതിനെതിരെ പ്രതിഷേധം ശക്തമാണ്.
ദേവകി വധം; ക്രൈംബ്രാഞ്ച് അന്വേഷണം ആരംഭിച്ചു