സുബൈദ വധക്കേസിലെ പ്രതികളുടെ ചിത്രങ്ങള്‍ സോഷ്യല്‍ മീഡിയയിലൂടെ പ്രചരിക്കുന്നു; പിന്നില്‍ അന്വേഷണസംഘത്തിലെ ഒരു പോലീസുദ്യോഗസ്ഥനാണെന്ന് ആരോപണം

കാഞ്ഞങ്ങാട്: (www.kasargodvartha.com 05.02.2018) പെരിയ ആയമ്പാറ ചെക്കിപ്പള്ളത്തെ സുബൈദ വധക്കേസില്‍ അറസ്റ്റിലായ പ്രതികളുടെ ചിത്രങ്ങള്‍ സോഷ്യല്‍ മീഡിയയിലൂടെ പ്രചരിക്കുന്നു. പ്രതികളായ പട്ള കോട്ടക്കണ്ണിയിലെ കെ എം അബ്ദുല്‍ ഖാദര്‍ (26), പട്ള കുതിരപ്പാടിയിലെ പട്ള അസീസ് എന്ന അബ്ദുല്‍ അസീസ് എന്നിവരുടെ ചിത്രങ്ങളാണ് നവമാധ്യമങ്ങളില്‍ വൈറലാകുന്നത്.

രണ്ട് പ്രതികളുടെ ഫോട്ടോകള്‍ നവമാധ്യമങ്ങളിലൂടെ പുറത്തുവിട്ട സംഭവത്തിനുപിന്നില്‍ അന്വേഷണസംഘത്തിലെ ഒരു പോലീസുദ്യോഗസ്ഥനാണെന്നാണ് ആരോപണം. രണ്ട് പ്രതികളെയും തിരിച്ചറിയല്‍ പരേഡിന് വിധേയമാക്കേണ്ടതിനാല്‍ മുഖംമൂടി ധരിപ്പിച്ചാണ് തെളിവെടുപ്പ് നടത്തുകയും കോടതിയില്‍ ഹാജരാക്കുകയും ചെയ്തത്. തിരിച്ചറിയല്‍ പരേഡിന് മുമ്പ് ഇവരുടെ ചിത്രം പരസ്യപ്പെടുത്തിയാല്‍ അന്വേഷണത്തെ ബാധിക്കുമെന്നതിനാല്‍ ചിത്രമെടുക്കാനോ പ്രസിദ്ധീകരിക്കാനോ പാടില്ലെന്ന് ഡിജിപി മാധ്യമങ്ങളോടുള്‍പ്പെടെ അഭ്യര്‍ത്ഥിച്ചിരുന്നു. എന്നാല്‍ ഈ രണ്ട് ചിത്രങ്ങളുമാണ് കഴിഞ്ഞ ദിവസങ്ങളില്‍ നവമാധ്യമങ്ങളില്‍ വൈറലായത്.

അന്വേഷണ സംഘത്തില്‍പ്പെട്ട ഉദ്യോഗസ്ഥരില്‍ നിന്നു തന്നെയാണ് ചിത്രം നവമാധ്യമങ്ങളില്‍ പ്രചരിപ്പിച്ചതെന്നാണ് പോലീസിന്റെ നിഗമനം. ഇതേ തുടര്‍ന്നാണ് ആരില്‍ നിന്നുമാണ് ചിത്രം പുറത്തായതെന്നതിനെക്കുറിച്ച് അന്വേഷിക്കാന്‍ ജില്ലാ പോലീസ് മേധാവി നിര്‍ദേശം നല്‍കിയത്. അന്വേഷണ സംഘത്തിലെ മുഴുവന്‍ അംഗങ്ങളുടെയും മൊബൈല്‍ ഫോണുകള്‍ പരിശോധിക്കാനും നിര്‍ദേശം നല്‍കിയിട്ടുണ്ട്.
സുബൈദ വധക്കേസ് പ്രതികള്‍ റിമാന്‍ഡില്‍; തിരിച്ചറിയല്‍ പരേഡിനും കസ്റ്റഡിയില്‍ കിട്ടാനും പോലീസ് കോടതിയില്‍ റിപോര്‍ട്ട് നല്‍കും