ജിഷ വധം; പുനരന്വേഷണം നടത്തുന്ന ക്രൈംബ്രാഞ്ച് പ്രതി മദന്‍മാലികിനെ ജയിലില്‍ ചോദ്യം ചെയ്തു

കാഞ്ഞങ്ങാട്: (www.kasargodvartha.com 08.12.2017) മടിക്കൈ ജിഷ വധക്കേസില്‍ പുനരന്വേഷണം നടത്തുന്ന ക്രൈംബ്രാഞ്ച് പ്രതി ഒഡീഷ സ്വദേശി മദന്‍മാലിക്കിനെ ജയിലില്‍ ചോദ്യം ചെയ്തു. വെള്ളിയാഴ്ച രാവിലെ അന്വേഷണത്തിന് നേതൃത്വം നല്‍കുന്ന ക്രൈംബ്രാഞ്ച് എസ്പി ഡോ. എ ശ്രീനിവാസന്‍, ഡിവൈഎസ്പി യു പ്രേമന്‍ എന്നിവരാണ് കാസര്‍കോട് സബ് ജയിലിലെത്തി ചോദ്യം ചെയ്തത്. മദനനെ ജയിലില്‍ ചോദ്യം ചെയ്യാന്‍  കാസര്‍കോട് അഡീഷണല്‍ സെഷന്‍സ് കോടതി കഴിഞ്ഞ ദിവസം അനുമതി നല്‍കിയിരുന്നു. ഇതിന്റെ അടിസ്ഥാനത്തിലാണ് ക്രൈംബ്രാഞ്ച് സംഘം ജയിലിലെത്തി മദനനെ ചോദ്യം ചെയ്തത്.

ജിഷ വധക്കേസില്‍ ജിഷയുടെ ഭര്‍തൃസഹോദരന്‍ ചന്ദ്രന്‍, ഭാര്യ ശ്രീലേഖ എന്നിവരെ കൂടി പ്രതിചേര്‍ക്കാനുള്ള ജില്ലാ സെഷന്‍സ് കോടതിയുടെ ഉത്തരവിട്ടതിനെ തുടര്‍ന്ന് കേസില്‍ വഴിത്തിരിവുണ്ടായത്. തങ്ങളെ പ്രതിയാക്കാനുള്ള ഉത്തരവിനെതിരെ ചന്ദ്രനും ഭാര്യയും സമര്‍പ്പിച്ച ഹരജിയെ തുടര്‍ന്ന് കീഴ്കോടതി വിധി ഹൈക്കോടതി താല്‍ക്കാലികമായി റദ്ദാക്കിയിരുന്നു. ഇതിനു ശേഷമാണ് കേസ് പുനരന്വേഷണം നടത്താന്‍ ക്രൈംബ്രാഞ്ച് എസ്പി ഡോ. എ ശ്രീനിവാസനോട് നിര്‍ദ്ദേശം നല്‍കിയത്. അന്വേഷണത്തിന്റെ ഭാഗമായി എസ്പിയും സംഘവും കേസിന്റെ ഫയലുകള്‍ പരിശോധിക്കുകയും മദന്‍ മാലിക്കിനെ അറസ്റ്റു ചെയ്ത അന്നത്തെ നീലേശ്വരം സിഐയും ഇപ്പോഴത്തെ ഹൊസ്ദുര്‍ഗ് സിഐയുമായ സി കെ സുനില്‍കുമാര്‍ തുടര്‍ന്ന് അന്വേഷണം നടത്തിയ സര്‍ക്കിള്‍ ഇന്‍സ്പെക്ടര്‍ ബാബു പെരിങ്ങോത്ത് എന്നിവരില്‍ നിന്നും വിവരങ്ങള്‍ ശേഖരിക്കുകയും ചെയ്തിരുന്നു. ജിഷ കൊല്ലപ്പെട്ട വീടും പരിസരവും  അന്വേഷണ സംഘം പരിശോധിച്ചിരുന്നു.