റിയാസ് മൗലവി വധക്കേസില്‍ യു എ പിഎ ചുമത്തണമെന്ന ഭാര്യയുടെ ഹരജിയില്‍ വിധി തിങ്കളാഴ്ച

കാസര്‍കോട്: (www.kasargodvartha.com 23.02.2018) കര്‍ണാടക കുടക് സ്വദേശിയും പഴയചൂരിയില്‍ മദ്രസാ അധ്യാപകനുമായ മുഹമ്മദ് റിയാസ് മൗലവിയെ കൊലപ്പെടുത്തിയ കേസില്‍ യു എ പി എ ചുമത്തണമെന്ന ഭാര്യയുടെ ഹരജിയില്‍ ഫെബ്രുവരി 26 തിങ്കളാഴ്ച കോടതി വിധി പറയും. കേസിലെ മൂന്ന് പ്രതികള്‍ക്കെതിരെ ഭീകരപ്രവര്‍ത്തനം തടയല്‍ നിയമം (യുഎപിഎ) ചുമത്തണമെന്ന് ആവശ്യപ്പെട്ട് ഭാര്യ കര്‍ണാടക കുടക് ജില്ല ഹൊഡബയിലെ എം ഇ സെയ്ദ (22)യാണ് അഡ്വ. സി ഷുക്കൂര്‍ മുഖേന ജില്ലാ സെഷന്‍സ് കോടതിയില്‍ ഹരജി ഫയല്‍ ചെയ്തത്.


2017 മാര്‍ച്ച് 21ന് രാത്രിയാണ് റിയാസ് മൗലവിയെ ചൂരി പള്ളിയിലെ മുറിയില്‍ അതിക്രമിച്ചുകയറിയ മൂന്നംഗസംഘം കഴുത്തറുത്തു കൊലപ്പെടുത്തിയത്. കേസിലെ പ്രതികള്‍ ഇപ്പോള്‍ ജുഡീഷ്യല്‍ കസ്റ്റഡിയിലാണ്. ഈ കേസില്‍ മാര്‍ച്ച് 5നു വിചാരണ ആരംഭിക്കാനിരിക്കെയാണ് ഹരജി. സ്‌പെഷ്യല്‍ പ്രോസിക്യൂട്ടറായി കോഴിക്കോട് സ്വദേശി അഡ്വ. അശോകനെ നേരത്തേ സര്‍ക്കാര്‍ നിയോഗിച്ചിട്ടുണ്ട്. ഇപ്പോള്‍ പ്രതികള്‍ക്കെതിരേ കൊലപാതകത്തിനു മാത്രമാണ് കേസെടുത്തിട്ടുള്ളത്. എന്നാല്‍ സാമുദായിക കലാപം ഇളക്കിവിടാനാണ് നീക്കം നടത്തിയതെന്നാണ് ഹരജിയില്‍ ആരോപിക്കുന്നത്.

കണ്ണൂര്‍ ക്രൈംബ്രാഞ്ച് പോലീസ് സൂപ്രണ്ട്, കാസര്‍കോട് സിഐ, അന്വേഷണ ഉദ്യോഗസ്ഥനായ തളിപ്പറമ്പ് സിഐ സുധാകരന്‍, സംസ്ഥാന ആഭ്യന്തര സെക്രട്ടറി, പ്രതികളായ കേളുഗുഡ്ഡെയിലെ അജേഷ് എന്ന അപ്പു (20), നിതിന്‍ (19), കേളുഗുഡ്ഡെ ഗംഗൈ റോഡിലെ അഖിലേഷ് എന്ന അഖില്‍ (25) എന്നിവരെ എതിര്‍ കക്ഷികളാക്കിയാണ് ഹരജി നല്‍കിയത്. കോടതി എതിര്‍കക്ഷികള്‍ക്ക് ഹാജരാകാനായി നോട്ടീസ് നല്‍കിയിട്ടുണ്ട്.

Related News: