മന്‍സൂര്‍ അലിയുടെ കൊലയ്ക്ക് കാരണം മറ്റു ലക്ഷ്യങ്ങളോ? പ്രതികള്‍ രണ്ട് പേര്‍ മാത്രമെന്ന് പോലീസ്; പ്രബലരായ രണ്ടുപേര്‍ക്കും പങ്കുണ്ടെന്ന് ബന്ധുക്കള്‍: പോലീസ് പലതും മറച്ചുവെക്കുന്നത് എന്തിന്?

മാരുതിവാന്‍ കടന്നുപോകുന്നതിന് തൊട്ടുമുമ്പ് രണ്ടുപേര്‍ നടന്നുപോകുന്നത് സി സി ടി വി ദൃശ്യത്തില്‍ വ്യക്തമായിരുന്നു. ഒരാള്‍ ഉയരംകൂടിയ ആളും മറ്റൊരാള്‍ കുറുകിയ മനുഷ്യനുമാണെന്ന് സി സി ടി വി ദൃശ്യത്തില്‍നിന്നും വ്യക്തമായിരുന്നു. നാട്ടുകാര്‍ക്ക് ഈ രണ്ടുപേരെ മുന്‍പരിചയമില്ല. ഇവര്‍ സ്ഥലവാസികളുമല്ലെന്ന് നാട്ടുകാര്‍ വെളിപ്പെടുത്തിയിരുന്നു.

എങ്കില്‍പിന്നെ ഈ രണ്ടുപേര്‍ ആരാണെന്നും എന്തിന് ഇവിടെ കൊലപാതകം നടന്ന ദിവസം തന്നെ വന്നുവെന്നും വ്യക്തമാക്കേണ്ടത് അന്വേഷണം നടത്തുന്ന പോലീസാണ്. സംശയമുള്ള ചിലരുടെ പേരുകള്‍ മന്‍സൂര്‍ അലിയുടെ ബന്ധുക്കള്‍ പോലീസിന് നല്‍കിയിരുന്നു. എന്നാല്‍ ഇപ്പോള്‍ അറസ്റ്റിലായ രണ്ടുപേരില്‍മാത്രം ഒതുക്കി കേസ് അവസാനിപ്പിക്കാനാണ് പോലീസിന്റെ നീക്കമെന്ന് ബന്ധുക്കള്‍ ആരോപിക്കുന്നു. അറസ്റ്റിലായ അഷറഫിനോടും സലാമിനോടും പത്തു ദിവസം മാറി നില്‍ക്കാനും അതിനിടയില്‍ കേസ് നടപടികള്‍ തങ്ങള്‍ നോക്കിക്കൊള്ളുമെന്നാണ് രണ്ടു പേര്‍ പറഞ്ഞതെന്നും പിടിയിലായ അഷറഫ് സൂചിപ്പിച്ചതായി ബന്ധുക്കള്‍ വ്യക്തമാക്കുന്നു.

ഇത്രയും ചെറിയ പണത്തിനു വേണ്ടി മാത്രം ഇവര്‍ കൊല നടത്തിയെന്നതും രണ്ടാം പ്രതി സലാം നാട്ടില്‍ നിന്നും മുങ്ങാതിരുന്നതും വിശ്വസിക്കാന്‍ കഴിയില്ലെന്ന് ബന്ധുക്കള്‍ പറഞ്ഞു. കൊല നടന്ന് ഒരു ദിവസം കഴിഞ്ഞപ്പോള്‍ ഒരു ഫോര്‍ച്യൂണര്‍ കാര്‍ സലാമിന്റെ വീടിന് സമീപം കണ്ടിരുന്നതായും നാട്ടുകാരെ കണ്ടപ്പോള്‍ അതിവേഗം ഓടിച്ചു പോയിരുന്നതായും നാട്ടുകാരും വെളിപ്പെടുത്തുന്നു.  www.kasargodvartha.com

കേസില്‍ മറ്റു പ്രതികളില്ലെന്നും എത്രയുംപെട്ടെന്നുതന്നെ കുറ്റപത്രം സമര്‍പ്പിക്കുമെന്നും കേസന്വേഷണത്തിന് മേല്‍നോട്ടംവഹിക്കുന്ന കാസര്‍കോട് ഡി വൈ എസ് പി എം വി സുകുമാരന്‍ കാസര്‍കോട് വാര്‍ത്തയോട് വെളിപ്പെടുത്തി. വ്യാഴാഴ്ച വൈകിട്ട് അഷ്‌റഫിന്റെ അറസ്റ്റുവിവരം ഉണ്ടോയെന്ന് ചോദിച്ച് കാസര്‍കോട് വാര്‍ത്തയില്‍നിന്നും അന്വേഷണ ഉദ്യോഗസ്ഥനായ കുമ്പള സി ഐ വി വി മനോജിനെ ബന്ധപ്പെട്ടപ്പോള്‍ അഷ്‌റഫ് തങ്ങളുടെ പിടിയിലായിട്ടേയില്ലെന്നായിരുന്നു അദ്ദേഹത്തിന്റെ മറുപടി. എന്നാല്‍ വൈകിട്ടോടെ അഷ്‌റഫിന്റെ അറസ്റ്റ് രേഖപ്പെടുത്തിയ പോലീസ് പലതും മറച്ചുവെക്കാന്‍ ശ്രമിക്കുന്നുവെന്ന
സംശയം ബലപ്പെടുത്തുന്നു.


(ശ്രദ്ധിക്കുക: ഗൾഫ് - വിനോദം - ടെക്നോളജി - സാമ്പത്തികം- പ്രധാന അറിയിപ്പുകൾ-വിദ്യാഭ്യാസം-തൊഴിൽ വിശേഷങ്ങൾ ഉൾപ്പെടെ മലയാളം വാർത്തകൾ നിങ്ങളുടെ മൊബൈലിൽ ലഭിക്കാൻ കെവാർത്തയുടെ പുതിയ ആൻഡ്രോയിഡ് ആപ്പ് ഇവിടെ ക്ലിക്ക് ചെയ്ത് ഡൗൺലോഡ് ചെയ്യുക. ഉപയോഗിക്കാനും ഷെയർ ചെയ്യാനും എളുപ്പം 😊)