ഫഹദ് വധം; പ്രതി മാനസിക രോഗിയാണെന്ന് സ്ഥാപിക്കാനുള്ള ശ്രമം കോടതി അംഗീകരിച്ചില്ല; വിധിയില്‍ പൂര്‍ണ തൃപ്തനല്ലെന്നും പ്രതി ബുദ്ധിമാനായ കൊലയാളിയാണെന്നും പിതാവ്

കാസര്‍കോട്: (www.kasargodvartha.com 18.06.2018) പ്രമാദമായ ഫഹദ് വധക്കേസില്‍ പ്രതി വിജയന്‍ മാനസിക രോഗിയാണെന്ന് സ്ഥാപിക്കാനുള്ള ശ്രമം കോടതി അംഗീകരിച്ചില്ല. താന്‍ മാനിസക അസ്വാസ്ഥ്യമുള്ള ആളാണെന്നും ഇതിനു വേണ്ടിയുള്ള ചില ചികിത്സാ രേഖകള്‍ കോടതിയില്‍ ഹാജരാക്കിയെങ്കിലും കോടതി ഇത് തള്ളിക്കളയുകയായിരുന്നുവെന്ന് കേസില്‍ പ്രോസിക്യൂഷനു വേണ്ടി ഹാജരായ അഡീ. പബ്ലിക് പ്രോസിക്യൂട്ടര്‍ പി. രാഘവന്‍ മാധ്യമ പ്രവര്‍ത്തകരോട് പറഞ്ഞു.

അന്നത്തെ ഹൊസ്ദുര്‍ഗ് സിഐയായിരുന്ന യു. പ്രേമന്‍ കേസ് അന്വേഷണത്തില്‍ കൃത്യമായ തെളിവുകളും മറ്റു കാര്യങ്ങളും ശേഖരിക്കുകയും പഴുതടച്ച കുറ്റപത്രം നല്‍കുകയും ചെയ്തതു കൊണ്ടാണ് പ്രതിക്ക് ശിക്ഷ വാങ്ങിക്കൊടുക്കാന്‍ കഴിഞ്ഞതെന്നും പബ്ലിക് പ്രോസിക്യൂട്ടര്‍ വ്യക്തമാക്കി. മുമ്പ് ഒരു കേസില്‍ ഉള്‍പെട്ട പ്രതി വിജയനെ കൊല്ലപ്പെട്ട ഫഹദിന്റെ പിതാവ് അബ്ബാസ് പോലീസിന് കാട്ടിക്കൊടുത്തതിന്റെ വൈരാഗ്യമാണ് കൊലയ്ക്ക് കാരണമായതെന്നാണ് പ്രോസിക്യൂഷന്‍ കണ്ടെത്തിയത്. എല്ലാ തെളിവുകളും പ്രതിക്ക് എതിരായിരുന്നതും ദൃക്‌സാക്ഷികളടക്കം കോടതിയില്‍ കൃത്യമായ മൊഴി നല്‍കുകയും ചെയ്തത് പ്രതിക്ക് കടുത്ത ശിക്ഷ ലഭിക്കാന്‍ കാരണമായി.

കൊലപാതകത്തെ അപൂര്‍വ്വങ്ങളില്‍ അപൂര്‍വ്വമായി കണ്ട് പ്രതിക്ക് വധശിക്ഷ നല്‍കണമെന്ന് പ്രോസിക്യൂഷന്‍ ശക്തമായി വാദിച്ചിരുന്നു. എന്നാല്‍ കോടതി വധശിക്ഷ നല്‍കിയില്ല. അതിനിടെ വിധിയില്‍ പൂര്‍ണതൃപ്തനല്ലെന്ന് ഫഹദിന്റെ പിതാവ് അബ്ബാസ് മാധ്യമപ്രവര്‍ത്തകരോട് പറഞ്ഞു. പ്രതി വിജയന്‍ ബുദ്ധിമാനായ കൊലയാളിയാണെന്നും പരമാവധി ശിക്ഷയായ വധശിക്ഷ അര്‍ഹിക്കുന്നുവെന്നും അബ്ബാസ് പറഞ്ഞു. ഏറെ കോളിളക്കം സൃഷ്ടിച്ച ഈ കേസില്‍ പ്രതിക്ക് വധ ശിക്ഷ ലഭിക്കുന്നതിന് അപ്പീല്‍ പോകുന്ന കാര്യവും ആലോചിക്കുമെന്നും പിതാവ് അറിയിച്ചു.

WATCH VIDEO

Related News:
ഫഹദ് വധം; പ്രതി വിജയനെ ജീവപര്യന്തം തടവിനും 50,000 രൂപ പിഴയടക്കാനും ശിക്ഷിച്ചു, മാനസിക പ്രശ്‌നങ്ങളുണ്ടെന്നും ശിക്ഷയില്‍ ഇളവ് നല്‍കണമെന്നും പ്രതി