മുബഷിറയെയും ഒപ്പമുള്ള വിദ്യാര്‍ഥിയെയും തിങ്കളാഴ്ച ഹൈക്കോടതിയില്‍ ഹാജരാക്കും; തട്ടിക്കൊണ്ടുപോയെന്ന പരാതിയില്‍ പതിനേഴുകാരനെതിരെ കേസെടുക്കുമെന്ന് പോലീസ്

മുബഷിറയുടെ ബന്ധുക്കള്‍  നല്‍കിയ ഹേബിയസ് കോര്‍പസ് ഹരജിയെ തുടര്‍ന്ന് ജനുവരി 10നകം പെണ്‍കുട്ടിയെ ഹാജരാക്കണമെന്നാണ് ഹൈക്കോടതി അന്വേഷണ ഉദ്യോഗസ്ഥന് നിര്‍ദേശം നല്‍കിയിരുന്നതെങ്കിലും അതിന് സാധിച്ചിരുന്നില്ല. കൂടുതല്‍ സമയം അനുവദിക്കണമെന്ന് അപേക്ഷ പോലീസ് ഹൈക്കോടതിയില്‍ സമര്‍പ്പിക്കുകയായിരുന്നു. ഇതേ തുടര്‍ന്ന് ജനുവരി 16 വരെ കോടതി സമയം അനുവദിച്ചു. തുടര്‍ന്ന് പോലീസ് നടത്തിയ ഊര്‍ജിതമായ അന്വേഷണത്തിലാണ് ഇവര്‍ ചെന്നൈയിലുള്ളതായി വിവരം ലഭിച്ചത്. ഇതിന്റെ അടിസ്ഥാനത്തില്‍ പോലീസ് സംഘം ചെന്നൈയിലേക്ക് പോകുകയായിരുന്നു. 

ഇക്കഴിഞ്ഞ ഡിസംബര്‍ ഒമ്പതിന് രാവിലെയാണ് ഇരുവരേയും കാണാതായത്. മുബഷിറയെ കാണാതായ സംഭവത്തില്‍ വീട്ടുകാര്‍ നല്‍കിയ പരാതിയില്‍ അന്വേഷണംനടത്തുന്നതിനിടയിലാണ് ഇതേകോളജിലെ വിദ്യാര്‍ത്ഥിയായ നിയാസിനേയും കാണാതായതായി വ്യക്തമായത്. ഹൈക്കോടതിയില്‍ ഹാജരാക്കിയ ശേഷം ഇരുവരേയും കാഞ്ഞങ്ങാട്ടേക്ക് കൊണ്ടുവന്ന് ജുവനല്‍ കോടതിയില്‍ ഹാജരാക്കും. പ്രായപൂര്‍ത്തിയാകാത്ത പെണ്‍കുട്ടിയെ തട്ടിക്കൊണ്ടുപോയെന്ന പരാതിയുള്ളതിനാല്‍ മുഹമ്മദ് നിയാസിനെതിരെ കേസെടുക്കുന്ന കാര്യം പരിഗണനയിലാണെന്ന് പോലീസ് പറഞ്ഞു.