ബഹിരാകാശം കീഴടക്കി ശുഭാംശു ശുക്ല ഭൂമിയിൽ തിരിച്ചെത്തി; 'ഗഗൻയാൻ' ദൗത്യത്തിന് നിർണായക നാഴികക്കല്ല്, മോദി സ്വാഗതം ചെയ്തു
● ക്രൂ ഡ്രാഗൺ ഗ്രേസ് പേടകം ശാന്തസമുദ്രത്തിൽ ലാൻഡ് ചെയ്തു.
● ഐ.എസ്.എസ്.എല്ലിൽ 18 ദിവസം ചെലവിട്ടു.
● ഇന്ത്യയുടെ ആദ്യത്തെ ബഹിരാകാശ സഞ്ചാരി.
● മടക്കയാത്ര 22.5 മണിക്കൂർ നീണ്ടു.
ന്യൂഡൽഹി: (KasargodVartha) ബഹിരാകാശ ദൗത്യം വിജയകരമായി പൂർത്തിയാക്കി ഇന്ത്യൻ വ്യോമസേന ഗ്രൂപ്പ് ക്യാപ്റ്റൻ ശുഭാംശു ശുക്ല ഭൂമിയിൽ സുരക്ഷിതമായി തിരിച്ചെത്തി. ശുഭാംശു അടക്കമുള്ള നാല് ബഹിരാകാശ യാത്രികരെയും വഹിച്ചുകൊണ്ടുള്ള ആക്സിയം 4 (Axiom 4) ദൗത്യത്തിലെ 'ഗ്രെയ്സ്' എന്നുവിളിക്കുന്ന ക്രൂ ഡ്രാഗൺ പേടകം കാലിഫോർണിയൻ തീരത്തെ ശാന്തസമുദ്രത്തിൽ വിജയകരമായി ലാൻഡ് ചെയ്തു. ശുഭാംശുവിന്റെ സുരക്ഷിതമായ തിരിച്ചുവരവ് 'ഗഗൻയാൻ' ദൗത്യത്തിലേക്കുള്ള ഒരു സുപ്രധാന നാഴികക്കല്ലാണെന്ന് പ്രധാനമന്ത്രി നരേന്ദ്ര മോദി എക്സിൽ കുറിച്ചു.
അന്താരാഷ്ട്ര ബഹിരാകാശ നിലയം സന്ദർശിച്ച ഇന്ത്യയുടെ ആദ്യത്തെ ബഹിരാകാശ സഞ്ചാരി എന്ന നിലയിൽ, തൻ്റെ അർപ്പണബോധം, ധീരത, മുന്നേറ്റ മനോഭാവം എന്നിവയിലൂടെ അദ്ദേഹം കോടിക്കണക്കിന് ജനങ്ങളുടെ സ്വപ്നങ്ങൾക്ക് പ്രചോദനമായെന്നും മോദി എക്സ് പോസ്റ്റിൽ വ്യക്തമാക്കി.
അന്താരാഷ്ട്ര ബഹിരാകാശ നിലയത്തിൽ (ഐ.എസ്.എസ്.) 18 ദിവസം ചെലവിട്ട ശേഷമാണ് മിഷൻ പൈലറ്റ് ശുഭാംശു ഉൾപ്പെടെ 'ആക്സിയം-4' ദൗത്യത്തിലെ നാലുപേരടങ്ങുന്ന സംഘം തിങ്കളാഴ്ച ഭൂമിയിലേക്ക് യാത്ര തിരിച്ചത്. ഇന്ത്യൻസമയം തിങ്കളാഴ്ച വൈകീട്ട് 4:45-ന് നിലയവുമായുള്ള ബന്ധം വേർപെടുത്തി. നിശ്ചയിച്ചതിലും 10 മിനിറ്റ് വൈകിയായിരുന്നു ഈ അൺഡോക്കിങ്.
I join the nation in welcoming Group Captain Shubhanshu Shukla as he returns to Earth from his historic mission to Space. As India’s first astronaut to have visited International Space Station, he has inspired a billion dreams through his dedication, courage and pioneering…
— Narendra Modi (@narendramodi) July 15, 2025
നിലയത്തിൽ തങ്ങുന്ന ഏഴു ശാസ്ത്രജ്ഞരോടും യാത്രപറഞ്ഞ് നാലുപേരും ഡ്രാഗൺപേടകത്തിലേക്ക് പറന്നുകയറി. ഉച്ചയ്ക്ക് 2:37-ഓടെ പേടകത്തെ നിലയവുമായി ബന്ധിപ്പിച്ച വാതിലടഞ്ഞു (ഹാച്ചിങ് ക്ലോഷർ). 4:45-ന് ഭൂമിയിലേക്കുള്ള 22.5 മണിക്കൂർ നീണ്ട യാത്രതുടങ്ങി ചൊവ്വാഴ്ച (15.07.2025) വൈകീട്ട് 3:01-ഓടെ കാലിഫോർണിയൻ തീരത്ത് ശാന്തസമുദ്രത്തിലാണ് പേടകം ഇറങ്ങിയത്.
ശുഭാംശു ശുക്ലയുടെ ഈ മഹത്തായ നേട്ടത്തിൽ നിങ്ങൾക്കെന്ത് തോന്നുന്നു? ഇന്ത്യൻ ബഹിരാകാശ ഗവേഷണ രംഗത്ത് ഈ ദൗത്യം എത്രത്തോളം സ്വാധീനം ചെലുത്തും? കമന്റ് ചെയ്യുക.
Article Summary: Shubhanshu Shukla's space mission complete; fresh boost for Gaganyaan.
#ShubhanshuShukla #Axiom4 #Gaganyaan #ISRO #SpaceMission #India
