രാജ്യത്തെ ആദ്യ സ്വകാര്യ ബഹിരാകാശ റോക്കറ്റ് വിക്രം 1 ശ്രീഹരിക്കോട്ടയിൽ നിന്ന് വിക്ഷേപിച്ചു; സ്കൈറൂട്ട് എയറോസ്പേസിൻ്റെ 'മിഷൻ ആഗമൻ' ദൗത്യത്തിൻ്റെ വിവരങ്ങൾ അറിയാം

ശ്രീഹരിക്കോട്ട: (KasargodVartha) രാജ്യത്തെ ആദ്യ സ്വകാര്യ ബഹിരാകാശ റോക്കറ്റ് വിക്രം 1 വിക്ഷേപിച്ചു. ശ്രീഹരിക്കോട്ടയിലെ ഐഎസ്ആർഒയുടെ സതീഷ് ധവാൻ സ്പേസ് സെൻ്ററിലെ ഒന്നാം ലോഞ്ച് പാ‍ഡിൽ നിന്നാണ് വിക്ഷേപണം നടന്നത്. ശനിയാഴ്ച(18.07.2026)യാണ് 'മിഷൻ ആഗമൻ' എന്ന് പേരിട്ടിരിക്കുന്ന ഈ ദൗത്യം നടന്നത്. റോക്കറ്റ് വിക്ഷേപിക്കുന്നതിന് മുൻപ് മുൻകരുതൽ നടപടിയായി സ്കൈറൂട്ട് കൗണ്ട്ഡൗൺ അഞ്ച് മിനിറ്റ് നിർത്തിവെച്ചിരുന്നു.

ദൗത്യത്തിൻ്റെ പ്രത്യേകതകൾ

ഇൻസ്പേസിൻ്റെ പിന്തുണയോടെയാണ് വിക്ഷേപണം നടത്തിയത്. പൂർണമായി ഘര ഇന്ധനം ഉപയോഗിക്കുന്ന മൂന്ന് ഘട്ടങ്ങളുള്ള റോക്കറ്റാണ് വിക്രം 1. 22 മീറ്റ‌ർ ഉയരമുള്ള റോക്കറ്റിന് താഴ്ന്ന ഭൂ ഭ്രമണപഥത്തിലേക്ക് 350 കിലോഗ്രാം ഭാരം എത്തിക്കാൻ കഴിയുമെന്നാണ് കമ്പനിയുടെ അവകാശവാദം. ആദ്യ ദൗത്യത്തിൽ ഭൂമിയിൽ നിന്ന് 450 കിലോമീറ്റ‌ർ അകലെ എത്താനാണ് റോക്കറ്റ് ലക്ഷ്യമിടുന്നത്. ആദ്യ പരീക്ഷണ ദൗത്യമായതിനാൽ വലിയ ഉപഗ്രഹങ്ങളൊന്നും ഇത്തവണ അയക്കുന്നില്ല. 15 മിനിറ്റും 46 സെക്കൻഡും കൊണ്ടാണ് ദൗത്യം പൂർത്തിയാകുക.

പ്രധാന പേ ലോഡുകൾ

നാല് പ്രധാന പേ ലോഡുകളാണ് ദൗത്യത്തിലുള്ളത്. ബംഗ്ളൂരിൽ ആസ്ഥാനമായ സ്റ്റാർട്ടപ്പ് ഗ്രഹാ സ്പേസിൻ്റെ സോളാരസ് എസ് ത്രീ, മറ്റൊരു സ്റ്റാർട്ടപ്പ് കോസ്മോസെർവ് സ്പേസിൻ്റെ എംബ്രേസ് എന്ന ബഹിരാകാശ റോബോ കൈ, സ്കൈറൂട്ടിൻ്റെ സ്വന്തം സ്കോപ്പ് സാറ്റ് എന്നിവയാണ് അതിൽ പ്രധാനം. ജർമൻ കമ്പനി ഡിക്യൂബ്ഡ് സ്പേസിൻ്റെ സാങ്കേതിക വിദ്യാ പരീക്ഷണവും ഇതിൻ്റെ ഭാഗമാണ്.

ബഹിരാകാശത്തേക്ക് പ്രത്യേക ശിൽപങ്ങളും

വിക്രം സാരാഭായ്, സി വി രാമൻ, ഡോ. എ പി ജെ അബ്ദുൽ കലാം എന്നിവരുടെ പ്രതിമകളും ബഹിരാകാശത്തേക്ക് അയക്കുന്നുണ്ട്. ഒരു അരിമണിയേക്കാൾ ചെറുതാണ് ഈ ശിൽപങ്ങൾ. ലാബ് നി‌ർമിത ഡയമണ്ട് ആഭരണവും പ്രധാനമന്ത്രി നരേന്ദ്ര മോദിയുടെ ആശംസാ കാ‌ർഡുകളും റോക്കറ്റിൽ ഉൾപ്പെടുത്തിയിട്ടുണ്ട്.

സ്കൈറൂട്ട് എയറോസ്പേസ്

ഐഎസ്ആർഒയിൽ നിന്ന് രാജി വെച്ച പവൻ കെ ചന്ദനയും ഭരത് ഡാക്കയും ചേർന്ന് 2018 ലാണ് സ്കൈറൂട്ട് എയറോസ്പേസ് സ്ഥാപിച്ചത്. രാജ്യത്താദ്യമായി ഒരു സ്വകാര്യ റോക്കറ്റ് നിർമിച്ച് പരീക്ഷിച്ചതും സ്കൈറൂട്ടാണ്. 2022 നവംബർ 18 നായിരുന്നു 'മിഷൻ പ്രാരംഭ്' എന്ന് പേരിട്ട ആദ്യ ദൗത്യം നടന്നത്. വിക്രം എസ് എന്ന ചെറു റോക്കറ്റാണ് അന്ന് വിക്ഷേപിച്ചത്. പേ ലോഡുകൾ ബഹിരാകാശത്തേക്ക് അയക്കാത്ത സബ് ഓർബിറ്റൽ ദൗത്യമായിരുന്നു അത്. വിക്രം 1 വിക്ഷേപിച്ചതോടെ ഐഎസ്ആർഒയ്ക്ക് പുറത്ത് ഉപഗ്രഹ വിക്ഷേപണത്തിന് കെൽപ്പ് നേടുന്ന ആദ്യ സ്വകാര്യ സ്ഥാപനമായി സ്കൈറൂട്ട് മാറി.

ശാസ്ത്ര സാങ്കേതിക വാർത്തകളും മറ്റ് അപ്ഡേറ്റുകളും അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ താഴെ കമൻ്റായി രേഖപ്പെടുത്തുക.

Article Summary: India's first private space rocket, Vikram 1 by Skyroot Aerospace, was launched from ISRO's Sriharikota facility.

#Vikram1 #SkyrootAerospace #ISRO #IndianSpaceMission #MissionAagaman #PrivateSpaceRocket #SriharikotaNews #SpaceTechnology #RenuNews