മത സൗഹാര്‍ദ്ധത്തിന്റെ മഹിത സന്ദേശമോതി വീണ്ടും അവര്‍ ആയിരം ജുമാഅത്ത് പള്ളിയിലെത്തി

By Desk EpsilonApr 20, 2018, 20:51 IST

മഞ്ചേശ്വരം: (www.kasargodvartha.com 20.04.2018) മത സൗഹാര്‍ദ്ധത്തിനു പുതിയ മാനം നല്‍കി പതിവു തെറ്റാതെ മഞ്ചേശ്വരം മാട അരസു മഞ്ചിഷ്ണാര്‍ ക്ഷേത്ര കമ്മിറ്റി ഭാരവാഹികള്‍ ഇക്കുറിയും ഉദ്യാവാര്‍ ആയിരം ജുമാഅത്ത് പള്ളിയില്‍ എത്തി. ഏതാണ്ട് എണ്ണുറ് വര്‍ഷകാലത്തിലധികമായി തുടരുന്ന പതിവ് വരവ് ഇന്നാണുണ്ടായത്. വിഷു കഴിഞ്ഞുള്ള ആദ്യ വെളളിയാഴ്ച്ചയാണ് ഉത്സവത്തിനു ക്ഷണിച്ചു കൊണ്ട് ക്ഷേത്ര ഭാരവാഹികളും ആചാര സ്ഥാനികരും എത്താറുള്ളത്.

മതത്തിന്റെ പേരില്‍ മനുഷ്യര്‍ പരസ്പരം കൊന്നു തള്ളുമ്പോള്‍ മഞ്ചിഷ്ണാര്‍ ക്ഷേത്രോത്സവം സൗഹാര്‍ദ്ധത്തിനു പുതിയ പാഠമാകുന്നത്. ഇന്ന് ജുമുഅ നിസ്‌കാരം കഴിഞ്ഞ ഉടന്‍ വെളിച്ചപാടും ആരവങ്ങളുമായി പള്ളിമുറ്റത്ത് എത്തി പിന്നീട് പള്ളി കമ്മിറ്റി ഭാരവാഹികളേയും മറ്റും ക്ഷണിച്ചു കൊണ്ടാണ് തിരിച്ചു പോയത്.