ലഡാക്കിലെ പ്രതിഷേധത്തെ അനുകൂലിച്ച് ഉമര്‍ അബ്ദുള്ളയും മെഹബൂബ മുഫ്തിയും; 'കേന്ദ്രസര്‍ക്കാരാണ് സംഘര്‍ഷങ്ങള്‍ക്ക് ഉത്തരവാദി'

ശ്രീനഗര്‍: (KasargodVartha) ലഡാക്കിലെ പ്രതിഷേധത്തെ അനുകൂലിച്ച് ജമ്മു കശ്മീര്‍ മുഖ്യമന്ത്രി ഉമർ അബ്ദുള്ളയും പിഡിപി നേതാവ് മെഹബൂബ മുഫ്തിയും രംഗത്തെത്തി. കേന്ദ്രസർക്കാരാണ് നിലവിലെ സംഘർഷങ്ങൾക്ക് ഉത്തരവാദിയെന്ന് ഇരുവരും ആരോപിച്ചു. ലഡാക്കിനായി എന്തുചെയ്തുവെന്ന് കേന്ദ്രം ആത്മപരിശോധന നടത്തണമെന്ന് നേതാക്കൾ ആവശ്യപ്പെട്ടു. സംസ്ഥാന പദവി വാഗ്ദാനം ചെയ്ത് കശ്മീരിനെയും വഞ്ചിച്ചെന്നും നേതാക്കൾ കുറ്റപ്പെടുത്തി.

സംസ്ഥാന പദവി ആവശ്യപ്പെട്ട് ഇന്നലെ ലഡാക്കിൽ യുവജന സംഘടന നടത്തിയ പ്രതിഷേധത്തിൽ വൻ സംഘർഷമാണുണ്ടായത്. ഇതിൽ നാലുപേർ കൊല്ലപ്പെടുകയും 70 പേർക്ക് പരിക്കേൽക്കുകയും ചെയ്തു. പ്രതിഷേധക്കാർ ലേയിലെ ബിജെപി ഓഫീസ് കത്തിച്ചു. സംസ്ഥാന പദവിക്കായി നിരാഹാരം നടത്തുന്ന പരിസ്ഥിതി പ്രവർത്തകൻ സോനം വാങ്ചുക്കിന് പിന്തുണ പ്രഖ്യാപിച്ചായിരുന്നു ഈ പ്രതിഷേധം. സംഘർഷം കണക്കിലെടുത്ത് ലഡാക്കിൽ നിരോധനാജ്ഞ പ്രഖ്യാപിച്ചിരിക്കുകയാണ്.

കേന്ദ്രഭരണ പ്രദേശമായ ലഡാക്കിന് സംസ്ഥാന പദവി നൽകണമെന്നും ഭരണഘടനയുടെ ആറാം ഷെഡ്യൂളിൽ ഉൾപ്പെടുത്തണമെന്നും ആവശ്യപ്പെട്ടാണ് ലേയിൽ പ്രതിഷേധം നടന്നത്. സംസ്ഥാന പദവിയും ഭരണഘടനാപരമായ സംരക്ഷണവും ആവശ്യപ്പെട്ട് നൂറുകണക്കിന് പ്രതിഷേധക്കാർ തെരുവിലിറങ്ങി. പൊലീസുകാർക്ക് നേരെ കല്ലേറുണ്ടായതിനെ തുടർന്ന് കണ്ണീർ വാതകവും ലാത്തിച്ചാർജും പ്രയോഗിച്ചു.

സെപ്റ്റംബർ 10 മുതൽ സോനം വാങ്ചുക്കിന്റെ നേതൃത്വത്തിൽ നിരാഹാര സമരം തുടങ്ങിയിരുന്നു. ഇതിന് പിന്തുണച്ചാണ് ലേ അപെക്സ് ബോഡിയുടെ യുവജന വിഭാഗം പ്രതിഷേധത്തിനും ബന്ദിനും ആഹ്വാനം ചെയ്തത്. സംഘർഷങ്ങൾ എത്രയും വേഗം അവസാനിപ്പിക്കണമെന്ന് സോനം വാങ്ചുക് പ്രതികരിച്ചു. അതോടൊപ്പം, തന്റെ നിരാഹാര സമരം അവസാനിപ്പിക്കുകയാണെന്നും സോനം പ്രഖ്യാപിച്ചു.

ഇതിനിടെ, സ്ഥിതിഗതികൾ കണക്കിലെടുത്ത് കനത്ത സുരക്ഷ ലേയിൽ തുടരുകയാണ്. പ്രതിഷേധങ്ങൾക്കും വിലക്കേർപ്പെടുത്തിയിട്ടുണ്ട്. കഴിഞ്ഞ നാല് വർഷമായി പ്രക്ഷോഭം നടത്തുന്ന കാർഗിൽ ഡെമോക്രാറ്റിക് അലയൻസും - ലേ അപെക്സ് ബോഡിയും ചേർന്ന് ആഭ്യന്തര മന്ത്രാലയവുമായി സംസ്ഥാന പദവിയെ സംബന്ധിച്ച് ചർച്ച തുടരുകയാണ്. അടുത്തമാസം ആറിന് വീണ്ടും ചർച്ച നടത്തുമെന്ന് കേന്ദ്രസർക്കാർ പ്രഖ്യാപിച്ചിരുന്നു. ഇതിനിടെ നടന്ന സംഘർഷത്തെ ഏറെ ഗൗരവത്തോടെയാണ് കേന്ദ്രം കാണുന്നത്.
 

ലഡാക്കിലെ പ്രതിഷേധം എങ്ങനെയാണ് രാഷ്ട്രീയ വിഷയമായി മാറുന്നത്? നിങ്ങളുടെ അഭിപ്രായം പങ്കുവയ്ക്കുക.

Article Summary: Leaders criticize Central Government over Ladakh protests.

#LadakhProtests #KashmirPolitics #OmarAbdullah #MehboobaMufti #SonamWangchuk #CentralGovernment