കൈക്കൂലി ഡോക്ടര്‍മാരെ തെരുവിലിട്ട് തല്ലുമെന്ന് യൂത്ത് ലീഗ്

കാസര്‍കോട്: (www.kasargodvartha.com 04/08/2016) കൈക്കൂലി വാങ്ങുന്ന ഡോക്ടര്‍മാരെ തെരുവിലിട്ട് തല്ലുമെന്ന് യൂത്ത് ലീഗിന്റെ മുന്നറിയിപ്പ്. മധൂര്‍ ചേനക്കോട്ടെ ദളിത് യുവതിയായ സരസ്വതിക്ക് ഗര്‍ഭപാത്രം പുറത്തേക്ക് തള്ളിയതിനെ തുടര്‍ന്ന് കൈക്കൂലി നല്‍കാതെ ശസ്ത്രക്രിയ നടത്താന്‍ കൂട്ടാക്കാതെ ഇറക്കിവിട്ട ഡോക്ടര്‍മാരുടെ നടപടിയില്‍ പ്രതിഷേധിച്ച് കാസര്‍കോട് ജനറല്‍ ആശുപത്രിയിലേക്ക് നടത്തിയ മാര്‍ച്ചിനിടെയാണ് യൂത്ത് ലീഗ് ഈ മുന്നറിയിപ്പ് നല്‍കിയത്.

കൈക്കൂലി വാങ്ങുന്ന ഡോക്ടര്‍മാരെ ഒരു ദാക്ഷിണ്യവും ഇല്ലാതെ തെരുവിലിട്ട് തല്ലുമെന്നാണ് പ്രകടനത്തില്‍ യൂത്ത് ലീഗ് പ്രവര്‍ത്തകര്‍ മുന്നറിയിപ്പ് നല്‍കിയിരിക്കുന്നത്. പ്രകടനത്തിനു ശേഷം എന്‍ എ നെല്ലിക്കുന്ന് എം എല്‍ എയുടെ നേതൃത്വത്തില്‍ യൂത്ത് ലീഗ് നേതാക്കള്‍ ആരോഗ്യവകുപ്പ് ഉദ്യോഗസ്ഥരെ ഉപരോധിക്കുകയും ചെയ്തു.

ജില്ലാ പ്രസിഡണ്ട് മൊയ്തീന്‍ കൊല്ലമ്പാടി, എം എസ് എഫ് സംസ്ഥാന വൈസ് പ്രസിഡണ്ട് ഹാഷിം ബംബ്രാണി, മമ്മു ചാല, ആരിഫ്, സിദ്ദീഖ്, അഷ്‌റഫ്, അബ്ദുര്‍ റഹ് മാന്‍, ഷമീര്‍ എന്നിവരുടെ നേതൃത്വത്തിലാണ് ആരോഗ്യ വകുപ്പ് ഉദ്യോഗസ്ഥരെ ഉപരോധിച്ചത്. ഇക്കാര്യത്തില്‍ ഉജിതമായ അന്വേഷണം നടത്തി നടപടിയുണ്ടാകുമെന്ന ഉറപ്പിന്‍മേലാണ് യൂത്ത് ലീഗ് പ്രവര്‍ത്തകര്‍ പിരിഞ്ഞുപോയത്.

ഡിവൈഎഫ്‌ഐ, ബിജെപി തുടങ്ങിയ പാര്‍ട്ടികളും ജനറല്‍ ആശുപത്രിയിലേക്ക് മാര്‍ച്ച് നടത്തിയിരുന്നു.
ജനറല്‍ ആശുപത്രിയിലെ അഴിമതിയും കെടുകാര്യസ്ഥതയും അന്വേഷണ വിധേയമാക്കണം: ജില്ലാ ജനകീയ വികസന സമിതി