സാമ്പത്തിക സഹായത്തിനായി കൊല്ലപ്പെട്ട സഫിയയുടെ മാതാപിതാക്കള്‍ മുഖ്യമന്ത്രിയെ കണ്ടു

കാസര്‍കോട്: (www.kasargodvartha.com 16/08/2015) ഗോവയിലെ ഫ്ലാറ്റില്‍ ക്രൂരമായി കൊലചെയ്യപ്പെട്ട മടിക്കേരി അയ്യങ്കേരിയിലെ സഫിയയുടെ മാതാപിതാക്കള്‍ മുഖ്യമന്ത്രി ഉമ്മന്‍ ചാണ്ടിയെ കണ്ടു. ദാരിദ്ര്യം കാരണം ജീവിതം മുന്നോട്ട് കൊണ്ടുപോകാന്‍ കഴിയാത്ത സാഹചര്യത്തില്‍ സാമ്പത്തിക സഹായം ലഭിക്കുന്നതിനാണ് അയ്യങ്കേരിയിലെ മൊയ്തു ആഇശ ദമ്പതികള്‍ ശനിയാഴ്ച രാവിലെ മുഖ്യമന്ത്രിയെ അദ്ദേഹത്തിന്റെ പുതുപ്പള്ളിയിലെ വസതിയില്‍ വെച്ച് കണ്ടത്.

ജില്ലാ പബ്ലിക് പ്രോസിക്യൂട്ടര്‍ അഡ്വ. സി. ഷുക്കൂര്‍, പൊതുപ്രവര്‍ത്തകരായ അമ്പലത്തറ കുഞ്ഞികൃഷ്ണന്‍, സുബൈര്‍ പടുപ്പ് എന്നിവരാണ് മൊയ്തുവിനെയും ആഇശയെയും മുഖ്യമന്ത്രിയുടെ സമീപം എത്തിച്ചത്. തിരക്കുകള്‍ക്കിടയില്‍ രാവിലെ ഒമ്പത് മണിയോടെ മുഖ്യമന്ത്രി ഇവരെ കാണാന്‍ തയ്യാറായി. സഫിയ വധവുമായി ബന്ധപ്പെട്ട കേസിന്റെ കാര്യങ്ങളും കുടുംബത്തിന്റെ ഇപ്പോഴത്തെ അവസ്ഥയും മുഖ്യമന്ത്രി വിശദമായി ചോദിച്ചറിഞ്ഞു.

അങ്ങേയറ്റം ദയനീയമാണ് ഇവരുടെ അവസ്ഥയെന്ന് പബ്ലിക് പ്രോസിക്യൂട്ടറും പൊതുപ്രവര്‍ത്തകരും മുഖ്യമന്ത്രിയെ ബോധ്യപ്പെടുത്തി. സഫിയയുടെ കുടുംബത്തിന് ആവശ്യമായ സാമ്പത്തിക സഹായം ലഭ്യമാക്കുന്നതിന് നടപടി സ്വീകരിക്കുമെന്ന് മുഖ്യമന്ത്രി ഉറപ്പുനല്‍കി.

Related News: