കെ. നീലകണ്ഠനെ ഒറ്റപ്പെടുത്താനുള്ള എ ഗ്രൂപ്പ് നീക്കത്തിനെതിരെ ഐ വിഭാഗം രംഗത്ത്
Nov 28, 2012, 21:56 IST
 |
| കാസര്‍കോട്ട് നടത്തിയ പത്രസമ്മേളനത്തില്‍ എ ഗ്രൂപ്പ് നേതാക്കള്‍ |
യഥാര്‍ത്ഥത്തില്‍ അംഗത്വ ഫോറങ്ങള്‍ തട്ടിയെടുത്തത് എ ഗ്രൂപ്പ് പ്രവര്‍ത്തകര്‍ തന്നെയാണെന്നും ഇതേ കുറിച്ച് അന്വേഷണം നടത്തിയാല്‍ ഇപ്പോള്‍ ആരോപണം ഉന്നയിക്കുന്നവര്‍ തന്നെ പ്രതികളാകുമെന്നും ഐ ഗ്രൂപ്പ് നേതാക്കള്‍ വെളിപ്പെടുത്തി. കെ നീലകണ്ഠനെതിരെയും മറ്റും ആരോപണമുന്നയിച്ചത് കാള പെറ്റു എന്നറിഞ്ഞപ്പോള്‍ തന്നെ കയറെടുക്കുന്ന സമീപനമാണെന്നും ഇവര്‍ കുറ്റപ്പെടുത്തി. കഴിഞ്ഞ ദിവസം എ ഗ്രൂപ്പ് നേതാക്കള്‍ നീലകണ്ഠന്‍ അടക്കമുള്ളവര്‍ക്കെതിരെ വ്യാജ ആരോപണങ്ങള്‍ ഉന്നയിച്ചത് കൊണ്ടാണ് തങ്ങളും വാര്‍ത്താ സമ്മേളനം നടത്താന്‍ നിര്‍ബന്ധിതരായതെന്ന് ഐ ഗ്രൂപ്പ് നേതാക്കള്‍ പറഞ്ഞു.
കഴിഞ്ഞ യൂത്ത് കോണ്‍ഗ്രസ് തെരഞ്ഞെടുപ്പില്‍ തൃക്കരിപ്പൂര്‍, ഉദുമ, കാസര്‍കോട് മണ്ഡലങ്ങള്‍ ഐ ഗ്രൂപ്പാണ് നേടിയത്. മഞ്ചേശ്വരവും കാഞ്ഞങ്ങാടും മാത്രമാണ് എ ഗ്രൂപ്പിന് ലഭിച്ചത്. ഇത്തവണ കൂടുതല്‍ മണ്ഡലങ്ങളില്‍ ഐ ഗ്രൂപ്പിന് മുന്‍തൂക്കം ലഭിക്കുമെന്ന് വ്യക്തമായതോടെയാണ് ബോധപൂര്‍വ്വം എ ഗ്രൂപ്പിലെ യൂത്ത് കോണ്‍ഗ്രസ് നേതാക്കള്‍ പ്രശ്‌നങ്ങള്‍ സൃഷ്ടിച്ചത്.
ഇവരെ പ്രോത്സാഹിപ്പിക്കുന്ന സമീപനമാണ് ജില്ലയിലെ എ ഗ്രൂപ്പ് നേതാക്കള്‍ നടത്തിയത്. പാര്‍ട്ടിയെ ദുര്‍ബലപ്പെടുത്തുന്ന ഒരു സമീപനവും തങ്ങളുടെ പക്ഷത്തു നിന്നുണ്ടാകില്ലെന്ന് ഐ ഗ്രൂപ്പ് വ്യക്തമാക്കി. കെ. എസ്. യു സംഘടനാ തെരഞ്ഞെടുപ്പില്‍ എ ഗ്രൂപ്പിന്റെ കൈയ്യിലുണ്ടായിരുന്ന കാസര്‍കോട് മണ്ഡലം ഐ ഗ്രൂപ്പ് തിരിച്ച് പിടിച്ചിരുന്നു. യൂത്ത് കോണ്‍ഗ്രസ് തെരഞ്ഞെടുപ്പിലും ഇതാവര്‍ത്തിക്കുമെന്ന് ബോധ്യമായതോടെയാണ് ബോധപൂര്‍വം കുഴപ്പങ്ങള്‍ സൃഷ്ടിച്ചത്. നീലകണ്ഠന്‍ ഉള്‍പ്പെടെയുള്ള നേതാക്കളെ ഒറ്റപ്പെടുത്താന്‍ എ ഗ്രൂപ്പിനെ ഒരു കാരണവശാലും അനുവദിക്കില്ലെന്ന് ഐ ഗ്രൂപ്പ് നേതാക്കള്‍ ശക്തമായി തന്നെ വ്യക്തമാക്കി.
Keywords: Youth congress, Membership, Camp, Clash, A group, I group, K.Neelakandan, Press meet, Kasaragod, Kerala, Malayalam news
Tags
Share this story
