ആബിദ് വധം: മൂന്നു പ്രതികളെ കൂടി കോടതി പോലീസ് കസ്റ്റഡിയില്‍ വിട്ടു

കാസര്‍കോട്: (www.kasargodvartha.com 21/01/2015) സൈനുല്‍ ആബിദ് (22) വധക്കേസില്‍ അറസ്റ്റിലായി റിമാന്‍ഡില്‍ കഴിയുകയായിരുന്ന മൂന്നു പ്രതികളെ കൂടി കോടതി രണ്ടു ദിവസത്തേക്ക് പോലീസ് കസ്റ്റഡിയില്‍ വിട്ടു. വിദ്യാനഗര്‍ പന്നിപ്പാറയിലെ പ്രശാന്ത് (20), പെരിയടുക്കത്തെ ഉദയന്‍ എന്ന ബട്ടി ഉദയന്‍(31), ബട്ടംപാറയിലെ മഹേഷ് (19) എന്നിവരെയാണ് കാസര്‍കോട് ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതി അന്വേഷണോദ്യോഗസ്ഥനായ കാസര്‍കോട് ടൗണ്‍ സി.ഐ. പി.കെ. സുധാകരന്റെ കസ്റ്റഡിയില്‍ വിട്ടത്.

കൊലപാതകം, ആസൂത്രണം, ഗൂഢാലോചന എന്നിവ സംബന്ധിച്ചു കൂടുതല്‍ വിവരങ്ങള്‍ ശേഖരിക്കാനാണ് പ്രതികളെ കസ്റ്റഡിയില്‍ വാങ്ങിയതെന്നു സി.ഐ. പറഞ്ഞു. നേരത്തേ ഏഴു പ്രതികളെ പോലീസ് കസ്റ്റഡിയില്‍ വാങ്ങിയിരുന്നു.

ഡിസംബര്‍ 22നു രാത്രിയാണ് ആബിദിനെ എം.ജി.റോഡില്‍ ചക്കര ബസാറിനടുത്ത ബെഡ് സെന്ററില്‍ കയറി കുത്തിക്കൊന്നത്. തളങ്കര നുസ്രത്ത് റോഡിലെ കെ.എ. മുഹമ്മദ് കുഞ്ഞിയുടെ മകനാണ് ആബിദ്. ജനുവരി 22നു കൊലപാതകം നടന്നു ഒരു മാസം തികയുമെങ്കിലും ഇനിയും ചില പ്രതികളെ അറസ്റ്റു ചെയ്യാന്‍ ബാക്കിയുണ്ട്.

കൊലപാതകത്തിന്റെ ഗൂഢാലോചനയിലും ഒത്താശയിലും പങ്കെടുത്തവരും സഹായം ചെയ്തു കൊടുത്തവരുമാണ് ഇനി പിടികിട്ടാനുള്ളത്. മുഖ്യ പ്രതികളടക്കം 15 പേരെയാണ് ഇതിനകം പോലീസ് അറസ്റ്റു ചെയ്തത്.
ഞങ്ങളുടെ Facebookലും Twitterലും അംഗമാകൂ. ഓരോ വാര്‍ത്തയും കാസര്‍കോട് വാര്‍ത്തയിലൂടെ അറിയാം.