ബാങ്ക് ആവശ്യപ്പെട്ടാല്‍ എസ്‌ഐഎസ്എഫ് സുരക്ഷ ഏര്‍പ്പെടുത്തുമെന്ന് ആഭ്യന്തര മന്ത്രി

ചെറുവത്തൂര്‍: (www.kasargodvartha.com 29/09/2015) ബാങ്കുകള്‍ ആവശ്യപ്പെട്ടാല്‍ എസ്‌ഐഎസ്എഫ് (സ്‌റ്റേറ്റ് ഇന്‍ഡസ്ട്രിയല്‍ സെക്യൂരിറ്റി ഫോഴ്‌സ്) സുരക്ഷ ഒരുക്കുമെന്ന് ആഭ്യന്തരമന്ത്രി രമേശ് ചെന്നിത്തല പറഞ്ഞു. ചെറുവത്തൂരില്‍ കൊള്ളയടിക്കപ്പെട്ട വിജയ ബാങ്ക് സന്ദര്‍ശിച്ച് മാധ്യമങ്ങളോട് സംസാരിക്കുകയായിരുന്നു അദ്ദേഹം.

വിജയ ബാങ്കിലെ കവര്‍ച്ചയുടെ അന്വേഷണം ഊര്‍ജിതമായി നടക്കുന്നുണ്ട്. പ്രത്യേക അന്വേഷണ സംഘം ശരിയായ പാതയിലാണ് മുന്നോട്ടു പോകുന്നത്. കാഞ്ഞങ്ങാട് ഡിവൈഎസ്പി എം. ഹരിശ്ചന്ദ്ര നായക്കിന്റെ നേതൃത്വത്തിലുള്ള സംഘം എത്രയും പെട്ടെന്ന് കുറ്റവാളികളെ കണ്ടെത്തും. ബാങ്കുകള്‍ ഉള്‍പെടെയുള്ള ധനകാര്യ സ്ഥാപനങ്ങള്‍ സ്ഥിതി ചെയ്യുന്ന തെരുവുകളില്‍ ശ്രദ്ധ പതിയുന്ന തരത്തില്‍ പോലീസ് രാത്രികാല പട്രോളിംഗ് കൂടുതലായി നടത്തുമെന്നും അദ്ദേഹം പറഞ്ഞു.

നിലവില്‍ കൊച്ചി നഗരത്തിലെ പ്രധാന ബാങ്കുകള്‍ക്കു മാത്രമാണ് എസ്‌ഐഎസ്എഫ് സുരക്ഷ ഒരുക്കിയിട്ടുള്ളത്.