സംരക്ഷിത കുരങ്ങിനൊപ്പമുള്ള വീഡിയോ; നടൻ വിക്രമിന് വനം വകുപ്പിൻ്റെ നോട്ടീസ്, അന്വേഷണം കേരളത്തിലേക്കും
● മൂന്ന് ദിവസത്തിനകം നേരിട്ട് ഹാജരായി വിശദീകരണം നൽകാൻ നിർദേശം
● വംശനാശ ഭീഷണി നേരിടുന്ന 'ലാർ ഗിബ്ബൺ' ഇനത്തിൽപ്പെട്ട കുരങ്ങുമായാണ് വിക്രം വീഡിയോ ചെയ്തത്
● വിവാദമായതോടെ നടൻ ഇൻസ്റ്റഗ്രാമിൽ നിന്ന് വീഡിയോ ഡിലീറ്റ് ചെയ്തിരുന്നു
● വന്യജീവികളെ അനധികൃതമായി കൈമാറ്റം ചെയ്തതിൽ വനം വകുപ്പ് അന്വേഷണം ഊർജിതമാക്കി
ചെന്നൈ: (KasargodVartha) സംരക്ഷിത കുരങ്ങിനൊപ്പമുള്ള വീഡിയോയ്ക്ക് പിന്നാലെ നടൻ വിക്രമിന് തമിഴ്നാട് വനം വകുപ്പിൻ്റെ നോട്ടീസ്. മൂന്ന് ദിവസത്തിനകം നേരിട്ട് ഹാജരായി വിശദീകരണം നൽകണമെന്നാണ് അധികൃതർ ആവശ്യപ്പെട്ടിരിക്കുന്നത്. സിനിമാ ലൊക്കേഷനിൽ നേരിട്ടെത്തിയാണ് ഉദ്യോഗസ്ഥർ നോട്ടീസ് കൈമാറിയത്. വീഡിയോ ചിത്രീകരിച്ച സാഹചര്യം വിശദീകരിക്കുന്നതിനൊപ്പം കുരങ്ങിനെ ഇന്ത്യയിൽ എത്തിച്ചതുമായി ബന്ധപ്പെട്ട ഔദ്യോഗിക രേഖകളും ഹാജരാക്കണമെന്ന് നോട്ടീസിൽ പറയുന്നു. വന്യജീവി സംരക്ഷണ നിയമപ്രകാരം വ്യവസ്ഥകളുള്ളതിനാലാണ് വനം വകുപ്പ് ഈ വിഷയത്തിൽ ഇടപെട്ടിരിക്കുന്നത്.
അന്വേഷണം കേരളത്തിലേക്കും
വിക്രമിൻ്റെ ബന്ധുവിന് കുരങ്ങിനെ നൽകിയതിലെ അന്വേഷണം ഇപ്പോൾ കേരളത്തിലേക്കും നീളുകയാണ്. കുരങ്ങിനെ ചെന്നൈയിൽ എത്തിച്ചത് ഈറോഡിലെ ഒരു ബിസിനസുകാരനാണ്. ഇയാളുടെ വീട്ടിൽ നടത്തിയ പരിശോധനയിൽ ഏഴ് ആഫ്രിക്കൻ കാട്ടുപൂച്ചകളെ വനം വകുപ്പ് കണ്ടെത്തി. ഇതിൽ മൂന്ന് എണ്ണം കേരളത്തിൽ നിന്ന് എത്തിച്ചതെന്നാണ് ഇയാൾ നൽകിയിരിക്കുന്ന മൊഴി. ഇതിൻ്റെ രേഖകൾ ഹാജരാക്കാനും തമിഴ്നാട് വനം വകുപ്പ് നിർദേശം നൽകിയിട്ടുണ്ട്. അന്താരാഷ്ട്ര തലത്തിൽ വന്യജീവികളെ കടത്തുന്ന മാഫിയ ഈ സംഭവത്തിന് പിന്നിലുണ്ടോ എന്ന സംശയത്തിലാണ് നിലവിൽ അന്വേഷണ ഉദ്യോഗസ്ഥർ.
വീഡിയോ ഡിലീറ്റ് ചെയ്തു
വംശനാശ ഭീഷണി നേരിടുന്ന കുരങ്ങുമായി ഇൻസ്റ്റഗ്രാമിൽ റീൽ ചെയ്തതോടെയാണ് നടൻ വിക്രം വിവാദത്തിലായത്. റീല് വിവാദമായതോടെ നടൻ ഇത് തൻ്റെ ഇൻസ്റ്റഗ്രാം അക്കൗണ്ടിൽ നിന്നും പിന്നീട് ഡിലീറ്റ് ചെയ്തു. ലാർ ഗിബ്ബൺ എന്ന വംശനാശ ഭീഷണി നേരിടുന്ന അപൂർവയിനം കുരങ്ങുമായാണ് വിക്രം റീൽ ചെയ്തത്. ദേശീയ വന്യജീവി സംരക്ഷണ നിയമ പ്രകാരം സംരക്ഷിത പട്ടികയിലുള്ള കുരങ്ങാണിത്. സാമൂഹിക മാധ്യമങ്ങളിൽ വൈറലാകാൻ വേണ്ടി ഇത്തരം വന്യജീവികളെ ഉപയോഗിക്കുന്നത് നിയമവിരുദ്ധമാണെന്ന് വനം വകുപ്പ് നേരത്തെ തന്നെ പൊതുജനങ്ങൾക്ക് മുന്നറിയിപ്പ് നൽകിയിരുന്നതാണ്. കുരങ്ങ് ചെന്നൈയിലെത്തിയത് ഏത് സാഹചര്യത്തിലാണെന്നും വിദേശ ഇനങ്ങളെ കൈവശം വയ്ക്കുന്നതിനും കൈമാറുന്നതിനും നിയമപരമായ നടപടിക്രമങ്ങൾ പാലിച്ചിട്ടുണ്ടോ എന്നും ഉദ്യോഗസ്ഥർ പരിശോധിച്ചുവരികയാണ്.
ചെന്നൈയിൽ നിന്നുള്ള ഈ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതല് വാർത്തകള് അറിയാന് ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.
Article Summary: Tamil actor Vikram gets forest dept notice for video with endangered monkey.
#ActorVikram #TamilNaduForestDepartment #WildlifeProtection #LarGibbon #ChennaiNews #MalayalamNews #RenuNews
