ബി എം എസ് പ്രവര്‍ത്തകനെ വധിക്കാന്‍ ശ്രമിച്ച സംഭവത്തില്‍ 2 പേര്‍ കൂടി അറസ്റ്റില്‍

കാസര്‍കോട്:(www.kasargodvartha.com 22.07.2019)  തളങ്കരയിലെ എസ് ഡി പി ഐ പ്രവര്‍ത്തകനായിരുന്നു സൈനുല്‍ ആബിദിനെ കൊലപ്പെടുത്തിയ കേസിലെ മൂന്നാം പ്രതി വിദ്യാനഗര്‍ നെല്‍ക്കള കോളനിയിലെ പ്രശാന്തിനെ (33) വധിക്കാന്‍ ശ്രമിച്ച കേസില്‍ രണ്ട് എസ് ഡി പി ഐ പ്രവര്‍ത്തകരെ കൂടി പോലീസ് അറസ്റ്റു ചെയ്തു. ബെദിരയിലെ റഫീഖ് എന്ന ബെദിര റഫീഖ് (34), അണങ്കൂര്‍ ടിപ്പു നഗറിലെ മുഹമ്മദ് അഷ്‌റഫ് എന്ന അച്ചപ്പു (25) എന്നിവരെയാണ് ടൗണ്‍ സി ഐ എ വി അനില്‍ കുമാറിന്റെ നേതൃത്വത്തിലുള്ള പോലീസ് സംഘം അറസ്റ്റു ചെയ്തത്. അഡ്വ. സുഹാസിനെ കൊലപ്പെടുത്തിയ കേസടക്കം 11 ഓളം കേസുകളില്‍ പ്രതിയാണ് റഫീഖെന്ന് പോലീസ് പറഞ്ഞു.

കേസുമായി ബന്ധപ്പെട്ട് അണങ്കൂരിലെ അബ്ദുര്‍ റഹ് മാന്‍ ഫൈസല്‍ എന്ന ഫൈസല്‍ (26), മുഹമ്മദ് അഷ്‌റഫ് എന്ന അച്ചാപ്പു (25), പച്ചക്കാട്ടെ മുഹമ്മദ് അസ്ഹറുദ്ദീന്‍ (26), അണങ്കൂരിലെ അബൂബക്കര്‍ സുഹൈല്‍ (24), എര്‍മളത്തെ അബൂബക്കര്‍ സിദ്ദീഖ് (22) എന്നിവരെ നേരത്തെ അറസ്റ്റു ചെയ്തിരുന്നു.

കഴിഞ്ഞ മാസം 30 ന് രാത്രി വിദ്യാനഗര്‍ ഗവ. കോളേജിന് സമീപം വെച്ചാണ് കേസിനാസ്പദമായ സംഭവം നടന്നത്. പ്രശാന്ത് ബൈക്കില്‍ പോകുമ്പോള്‍ കണ്ണൂര്‍ രജിസ്ട്രേഷന്‍ നമ്പറിലുള്ള സ്വിഫ്റ്റ് കാറിലെത്തിയ ആറംഗ സംഘം കാര്‍ ബൈക്കിലിടിച്ച് വീഴ്ത്തിയ ശേഷം കുത്തിപരിക്കേല്‍പിച്ചുവെന്നാണ് കേസ്. പ്രശാന്ത് സമീപത്തെ ഒരു ആശുപത്രിയിലേക്ക് ഓടി കയറിയാണ് രക്ഷപ്പെട്ടത്. പരിക്കേറ്റ യുവാവ് പിന്നീട് മംഗളൂരുവിലെ ആശുപത്രിയില്‍ ചികിത്സതേടി. കാര്‍ സംഭവം നടന്ന പിറ്റേ ദിവസം വിദ്യാനഗര്‍ പോലീസ് സ്റ്റേഷന്‍ പരിധിയില്‍ ഉപേക്ഷിച്ച നിലയില്‍ കണ്ടെത്തിയിരുന്നു.