ധർമസ്ഥലയിലെ 'കൂട്ടക്കുഴിമാടങ്ങൾ'; നടുക്കുന്ന വെളിപ്പെടുത്തലുമായി സാക്ഷിയുടെ അഭിഭാഷകൻ

ബെംഗ്‌ളൂറു: (KasargodVartha) ധർമസ്ഥലയിൽ മൃതദേഹങ്ങൾ മറവുചെയ്തെന്ന വെളിപ്പെടുത്തലിൽ പ്രതികരണവുമായി സാക്ഷിയുടെ അഭിഭാഷകൻ കെ.വി. ധനഞ്ജയ്. സ്ത്രീകൾക്ക് നേരെയുണ്ടായ ക്രൂരതകൾക്കും കൊലപാതകങ്ങൾക്കും പിന്നിലുള്ളവരെക്കുറിച്ചുള്ള പൂർണ്ണ വിവരങ്ങൾ സാക്ഷി കോടതിക്ക് മുന്നിൽ വെളിപ്പെടുത്തിയിട്ടുണ്ടെന്ന് കെ.വി. ധനഞ്ജയ് മാധ്യമങ്ങളോട് പറഞ്ഞു. വിശ്വസിക്കാവുന്ന പൊലീസ് ഉദ്യോഗസ്ഥർക്ക് മുന്നിൽ മാത്രമേ ഓരോ മൃതദേഹവും എവിടെയാണ് മറവ് ചെയ്തതെന്ന് സാക്ഷി വെളിപ്പെടുത്തൂ. കേരളത്തിൽ നിന്നുള്ള ഇരകൾ അടക്കം ഇവിടെ അടക്കം ചെയ്യപ്പെട്ടിരിക്കാൻ സാധ്യതയുണ്ടെന്നും, കാര്യക്ഷമമായ അന്വേഷണം ആവശ്യപ്പെട്ട് കേരള നിയമസഭ ഏകകണ്ഠമായി പ്രമേയം പാസാക്കണമെന്നും ധനഞ്ജയ് ആവശ്യപ്പെട്ടു.

കുറ്റബോധം കൊണ്ടുള്ള വെളിപ്പെടുത്തൽ; തെളിവുകൾ പുറത്തെടുക്കാൻ തയ്യാർ

കുറ്റബോധം കൊണ്ടാണ് ഈ വെളിപ്പെടുത്തൽ നടത്തിയതെന്നാണ് സാക്ഷി പറയുന്നത്. പൊലീസിനെ ഓരോരോ ഇടത്തായി കൊണ്ടുപോയി മൃതദേഹം കുഴിച്ചെടുക്കാൻ താൻ തയ്യാറാണെന്നും സാക്ഷി വ്യക്തമാക്കി. ഓരോ കൊലയ്ക്കും ക്രൂരതയ്ക്കും പിന്നിൽ ആരൊക്കെയാണെന്ന് സാക്ഷി കോടതിയിൽ പറഞ്ഞിട്ടുണ്ട്. ക്ഷേത്രത്തിന് ചുറ്റും പലയിടങ്ങളിലായി മൃതദേഹം മറവ് ചെയ്‌തെന്നാണ് സാക്ഷി പറയുന്നത്. ഒരു ക്ഷേത്രപട്ടണത്തിൽ പലയിടങ്ങളിലായി മൃതദേഹം കുഴിച്ചിടുന്നത് സംശയകരമാണ്. കൊല്ലപ്പെട്ടവരിൽ സ്ത്രീകളും പുരുഷന്മാരുമുണ്ട്. ഈ സംശയങ്ങൾ ന്യായമാണ്, അത് ദുരീകരിക്കാൻ സാക്ഷിയെ ഓരോ ഇടത്തേക്കും കൊണ്ടുപോയി കുഴിച്ച് പരിശോധന നടത്തുകയാണ് വേണ്ടത്. എന്നാൽ പൊലീസ് അത് ചെയ്യുന്നില്ലെന്നും, സ്പെഷ്യൽ ഇൻവെസ്റ്റിഗേഷൻ ടീം (എസ്.ഐ.ടി) ഇനി എന്ത് ചെയ്യുമെന്നത് നിർണായകമാണെന്നും അഡ്വ. കെ.വി. ധനഞ്ജയ് ചൂണ്ടിക്കാട്ടി.

ഇത്തരത്തിലൊരു കേസ് ഇതുവരെ നമ്മുടെ കോടതികൾ കൈകാര്യം ചെയ്തിട്ടില്ല. കൊല്ലപ്പെട്ടത് ആരൊക്കെയാണെന്ന് ചോദ്യം ചെയ്യാൻ സാക്ഷിക്ക് കഴിയുമായിരുന്നില്ല. കൊല്ലുമെന്ന് ഭീഷണിയുണ്ടായിരുന്നു. 15 വയസ്സ് പ്രായം തോന്നിക്കുന്ന ഒരു കുട്ടിയെ സ്കൂൾ യൂണിഫോമും ബാഗും ചേർത്താണ് അടക്കം ചെയ്തതെന്ന് സാക്ഷി പറയുന്നുണ്ട്. പരിശോധന നടന്നാൽ കൊല്ലപ്പെട്ടത് ആരെന്ന സൂചന ആ വസ്ത്രം കൊണ്ടോ ബാഗ് കൊണ്ടോ ലഭിച്ചേക്കാം.

വിശ്വാസ്യതയും പ്രതീക്ഷകളും

പൊലീസിനോട് എവിടെയൊക്കെയാണ് മൃതദേഹം മറവ് ചെയ്തതെന്ന വിവരം നേരത്തേ നൽകാൻ സാക്ഷി തയ്യാറല്ല. അങ്ങനെ ചെയ്താൽ ലോക്കൽ പൊലീസ് ആ വിവരം കുറ്റവാളികൾക്ക് ചോർത്തുമെന്നും അവിടെ നിന്ന് മൃതദേഹം നീക്കം ചെയ്യുമെന്നും സാക്ഷി ഭയപ്പെടുന്നുണ്ട്. ഓരോരോ ഇടങ്ങളായി, ഒന്ന് കഴിഞ്ഞാൽ ഒന്ന് എന്ന നിലയിൽ മാത്രമേ മൃതദേഹം എവിടെയെന്ന വിവരം സാക്ഷി പൊലീസിന് നൽകൂ. അതും വിശ്വസിക്കാവുന്ന ഉന്നത പൊലീസ് ഉദ്യോഗസ്ഥന് മാത്രമേ നൽകൂ. ഇതുവരെ പൊലീസ് മൃതദേഹം കുഴിക്കാൻ ശ്രമിക്കാത്തതിന്റെ അർത്ഥം സാക്ഷി പറയുന്നത് സത്യമാണെന്ന് പ്രാദേശിക പൊലീസ് ഭയപ്പെടുകയാണ്. സാക്ഷി പറയുന്നത് ഗൗരവതരമായി എടുക്കുന്ന സംഘമാണ് വരുന്നതെന്നത് പ്രതീക്ഷ നൽകുന്നതാണെന്നും എസ്.ഐ.ടിയെക്കുറിച്ചുള്ള ചോദ്യങ്ങൾക്ക് കെ.വി. ധനഞ്ജയ് മറുപടി പറഞ്ഞു.

മിസ്സിംഗ് കേസുകൾ നിരവധി രജിസ്റ്റർ ചെയ്യപ്പെട്ടിട്ടില്ല എന്നത് ശരിയാണ്. സാക്ഷി പറയുന്നത് അനുസരിച്ച് പരിശോധന തുടങ്ങിയാൽ ആളുകൾ ധൈര്യം സംഭരിച്ച് കേസ് നൽകാൻ വരാൻ സാധ്യതയുണ്ട്. ആ നടപടിയാണ് ആദ്യം തുടങ്ങേണ്ടത്. കേരളത്തിൽ നിന്ന് നിരവധി തീർത്ഥാടകർ വരുന്ന ക്ഷേത്രമാണ് ധർമസ്ഥല. അതുകൊണ്ട് തന്നെ കേരളത്തിൽ നിന്നടക്കം ഇരകൾ ഉണ്ടാവാനുള്ള സാധ്യതയുണ്ട്. അതുകൊണ്ട് തന്നെ കേരള നിയമസഭ സമഗ്രമായ അന്വേഷണം ആവശ്യപ്പെട്ട് ഏകകണ്ഠമായ ഒരു പ്രമേയം പാസ്സാക്കേണ്ടതുണ്ടെന്നും കെ.വി. ധനഞ്ജയ് കൂട്ടിച്ചേർത്തു.
 

കേരള നിയമസഭ പ്രമേയം പാസാക്കേണ്ടത് ആവശ്യമാണോ? ധർമസ്ഥല കേസിനെക്കുറിച്ചുള്ള നിങ്ങളുടെ അഭിപ്രായം താഴെ രേഖപ്പെടുത്തുക.

Article Summary: Dharmasthala witness's advocate claims knowledge of perpetrators.

#DharmasthalaCase #KarnatakaCrime #WitnessRevelation #KeralaJustice #HumanRights #MassGrave