Youth arrested | വാഹനപരിശോധന നടത്തുന്നതിനിടെ കാറിൽ നിന്ന് മയക്കുമരുന്നും അരലക്ഷം രൂപയും പിടികൂടിയ സംഭവം: ഓടി രക്ഷപ്പെട്ട യുവാവ് അറസ്റ്റിൽ; 'പിടിയിലായയാൾ മറ്റൊരുകേസിൽ ജയിലിൽ നിന്ന് പുറത്തിറങ്ങിയത് അടുത്തിടെ'

ബദിയഡുക്ക: (www.kasargodvartha.com) വാഹനപരിശോധന നടത്തുന്നതിനിടെ കാറിൽ നിന്ന് കഞ്ചാവും അരലക്ഷവും പിടികൂടിയ സംഭവത്തിൽ സ്ഥലത്ത് നിന്ന് ഓടിരക്ഷപ്പെട്ട യുവാവ് പിടിയിൽ. മഞ്ചേശ്വരം പൊലീസ് സ്റ്റേഷൻ പരിധിയിലെ ആബിദ് (26) ആണ് അറസ്റ്റിലായത്. സീതാംഗോളിയിൽ നിന്നാണ് യുവാവിനെ പിടികൂടിയത്. നേരത്തെ രണ്ടുപേരെ കാറിൽ നിന്ന് അറസ്റ്റ് ചെയ്തിരുന്നു. മുഹമ്മദ് ഫയാസ് (28), അബൂബകർ സിദ്ദീഖ് (26) എന്നിവരാണ് പിടിയിലായത്.
  
ഇക്കഴിഞ്ഞ ബുധനാഴ്ച രാത്രി 8.30 മണിക്ക് ഇഡിയടുക്കയിൽ വാഹനപരിശോധന നടത്തവെയാണ് കെഎൽ 14 ടി 4954 നമ്പർ കാറിൽ നിന്ന് ചാക്കിൽ സൂക്ഷിച്ച നിലയിൽ 13.950 കി ഗ്രാം നിരോധിത കഞ്ചാവും, 57,350 രൂപയും പിടിച്ചെടുത്തത്. ജില്ലാ പൊലീസ് മേധാവി ഡോ. വൈഭവ് സക്സേനയുടെ നേതൃത്വത്തിൽ നടക്കുന്ന ഓപറേഷൻ ക്ലീൻ കാസർകോടിന്റെ ഭാഗമായിട്ടായിരുന്നു പരിശോധന.
  
കുമ്പള, മഞ്ചേശ്വരം എന്നിവിടങ്ങളിലും കൊല്ലം ജില്ലയിലെയും പൊലീസ് സ്റ്റേഷനുകളിൽ വിവിധ കേസുകളിൽ ആബിദ് പ്രതിയാണെന്നും ഒരുകേസിൽ കണ്ണൂർ സെൻട്രൽ ജയിലിൽ റിമാൻഡിൽ കഴിഞ്ഞിരുന്ന ഇയാൾ ഒരുമാസം മുമ്പാണ് പുറത്തിറങ്ങിയതെന്നും പൊലീസ് പറഞ്ഞു. ആബിദിനെ കോടതിയിൽ ഹാജരാക്കി റിമാൻഡ് ചെയ്തു.