അധ്യാപകന്റെ കൊലപാതകം: അയല്‍വാസികളായ രണ്ട് പേര്‍ അറസ്റ്റില്‍

By Web Desk SreMar 9, 2018, 15:06 IST

ചീമേനി: (www.kasargodvartha.com 09.03.2018) അധ്യാപകനെ തലയ്ക്കടിച്ച് കൊലപ്പെടുത്തിയ കേസില്‍ അയല്‍വാസികളായ രണ്ട് പേരെ പോലീസ് അറസ്റ്റുചെയ്തു. നാലിലാംകണ്ടം ഗവ. യു പി സ്‌കൂളിലെ അധ്യാപകന്‍ ആലന്തട്ടയിലെ രമേശനെ (50) തലയ്ക്കടിച്ച് കൊലപ്പെടുത്തിയ കേസിലാണ് കയ്യൂര്‍ ആലന്തട്ടയിലെ ജയനീഷ് (28), തമ്പാന്‍ (50) എന്നിവരെ നീലേശ്വരം സിഐ വി ഉണ്ണികൃഷ്ണനും ചീമേനി എസ്‌ഐ എം ഇ രാജഗോപാലും ചേര്‍ന്ന് അറസ്റ്റുചെയ്തത്.

ഇക്കഴിഞ്ഞ ശനിയാഴ്ച രാത്രിയാണ് മകനോടൊപ്പം വീട്ടിലേക്ക് പോകുകയായിരുന്ന രമേശനെ വീട്ടിന് സമീപം വെച്ച് തലയ്ക്കടിച്ചത്. നാല് ദിവസത്തെ ചികിത്സയ്ക്ക് ശേഷമാണ് മംഗളൂരു ആശുപത്രിയില്‍ വെച്ച് മരണപ്പെട്ടത്. നാല് പേരാണ് സംഘത്തിലുണ്ടായിരുന്നത്. ഒളിവില്‍ പോയ പ്രതികളില്‍ രണ്ട് പേരെ പോലീസ് പിടികൂടുകയായിരുന്നു. കേസിലെ മറ്റൊരു പ്രതി വിദേശത്തേക്ക് കടന്നതായി പോലീസ് സ്ഥിരീകരിച്ചിട്ടുണ്ട്. ഒളിവിലുള്ള മറ്റൊരു പ്രതിയെ പിടികൂടാനായി അന്വേഷണം ഊര്‍ജിതമാക്കി.