സി പി എം നേതാവായ പഞ്ചായത്തംഗത്തിന്റെ വീടിന് നേരെ ആക്രമണം

ആദൂര്‍ : (www.kasargodvartha.com 13.09.2017) സി.പി എം നേതാവായ പഞ്ചായത്തംഗത്തിന്റെ വീടിന് നേരെ അക്രമണം. സര്‍വ്വകക്ഷി യോഗ തീരുമാനം അനുസരിച്ച് പ്രദേശത്ത് സമാധാനം നിലനിര്‍ത്താന്‍ തീരുമാനിച്ചതിന് പിന്നാലെയാണ് വീടാക്രമണം നടന്നത്. സി പി എം കാറഡുക്ക ഏരിയാ കമ്മിറ്റി അംഗവും മുളിയാര്‍ പഞ്ചായത്ത് അംഗവുമായ എം മാധവന്റെ വീടിന് നേരെ ബുധനാഴ്ച രാത്രി 12 മണിയോടെയാണ് അക്രമണം നടന്നത്. രൂക്ഷമായ കല്ലേറില്‍ വീടിന്റെ ജനല്‍ ഗ്ലാസുകള്‍ തകര്‍ന്നു. ചുമരിനും കേടുപാടുകള്‍ സംഭവിച്ചു. മാധവന്‍ കിടന്ന മുറിക്ക് നേരെയാണ് ഏറ്റവും കൂടുതല്‍ കല്ലേറ് നടന്നത്.

ആദൂര്‍ സ്റ്റേഷനില്‍ നടന്ന ഉഭയകക്ഷി ചര്‍ച്ചയില്‍ ഇരുപാര്‍ട്ടികളും അക്രമണം അവസാനിപ്പിക്കാന്‍ തീരുമാനിച്ചിരുന്നു. തീരുമാനമെടുത്ത് മണിക്കൂറിനകം തന്നെ മാധവന്റെ  വീടാക്രമിക്കുകയായിരുന്നു. ബി ജെ പി പ്രവര്‍ത്തകരായ നാലംഗ സംഘമാണ് അക്രമണം നടത്തിയതെന്ന് സി.പി.എം.നേതൃത്വം ആരോപിച്ചു. സര്‍വ്വകക്ഷി യോഗ തീരുമാനം കാറ്റില്‍ പറത്തി മാധവന്റെ വീടിന് നേരെ നടന്ന അക്രമത്തില്‍ പ്രതിഷേധിച്ച് വ്യാഴാഴ്ച വൈകുന്നേരം 4.30 മണിക്ക് ബോവിക്കാനം ടൗണില്‍ പ്രതിഷേധ പ്രകടനം നടത്തുമെന്ന് സി.പി.എം നേതൃത്വം അറിയിച്ചു.