വീട്ടുമുറ്റത്ത് കളിച്ചുകൊണ്ടിരിക്കുകയായിരുന്ന രണ്ടര വയസുകാരനെ കാണാതായി; പുഴയില്‍ വീണതാണെന്ന് സംശയം, തിരച്ചില്‍ തുടങ്ങി

ചെങ്കള : (www.kasargodvartha.com 03.09.2017) വീട്ടുമുറ്റത്ത് കളിച്ചുകൊണ്ടിരിക്കുകയായിരുന്ന രണ്ടര വയസുകാരനെ കാണാതായി. പുഴയില്‍ വീണതാണെന്ന് സംശയത്തിന്റെ അടിസ്ഥാനത്തില്‍ നാട്ടുകാരും ഫയര്‍ഫോഴ്‌സും പോലീസും തിരച്ചില്‍ ആരംഭിച്ചു. ചെങ്കള ചേരൂരിലെ കബീര്‍ - റുഖ്‌സാന ദമ്പതികളുടെ മകന്‍ ശഅ്ബാനെയാണ് കാണാതായത്.
ഞായറാഴ്ച ഉച്ചയ്ക്ക് 2.30 മണിയോടെയാണ് സംഭവം. വീട്ടുമുറ്റത്ത് കളിച്ചുകൊണ്ടിരിക്കുകയായിരുന്ന കുട്ടിയെ പെട്ടെന്ന് കാണാതാവുകയായിരുന്നു. സമീപത്തെ വീടുകളിലും മറ്റും അന്വേഷിച്ചെങ്കിലും കണ്ടെത്താന്‍ കഴിയാതിരുന്നതോടെയാണ് കുട്ടിയെ പുഴയില്‍ കാണാതായതായി സംശയമുയര്‍ന്നത്. ഇതിന്റെ അടിസ്ഥാനത്തില്‍ വീട്ടുകാര്‍ വിദ്യാനഗര്‍ പോലീസില്‍ വിവരമറിയിച്ചതിന്റെ അടിസ്ഥാനത്തില്‍ പോലീസും ഫയര്‍ഫോഴ്‌സും സ്ഥലത്തെത്തി തിരച്ചില്‍ ആരംഭിച്ചു. വീടിനടുത്ത് തന്നെയാണ് പുഴയുമുള്ളത്. പുഴയില്‍ തിരച്ചില്‍ നടത്തുന്നതോടൊപ്പം പരിസരങ്ങളിലും മറ്റു സ്ഥലങ്ങളിലും കുട്ടിക്കു വേണ്ടിയുള്ള അന്വേഷണം നടത്തിവരുന്നുണ്ട്.