ബൈക്കില്‍ കടത്തിക്കൊണ്ടു വന്ന ഒന്നരക്കിലോ കഞ്ചാവുമായി ഏജന്റ് അറസ്റ്റില്‍; ബൈക്ക് കസ്റ്റഡിയില്‍

കാസര്‍കോട്: (www.kasargodvartha.com 24/04/2015) ബൈക്കില്‍ കടത്തിക്കൊണ്ടു വന്ന ഒന്നരക്കിലോ കഞ്ചാവുമായി ഏജന്റിനെ എക്‌സൈസ് അധികൃതര്‍ അറസ്റ്റു ചെയ്തു. വെള്ളരിക്കുണ്ട് സ്വദേശിയും പള്ളിക്കര കല്ലിങ്കാല്‍ തൊട്ടിയില്‍ വാടക ക്വാര്‍ട്ടേഴ്‌സില്‍ താമസക്കാരനുമായ അബൂബക്കറി (57)നെയാണ് എക്‌സൈസ് അധികൃതര്‍ അറസ്റ്റു ചെയ്തത്. വ്യാഴാഴ്ച രാത്രി 9.30 മണിയോടെ അബൂബക്കറിന്റെ വാടകക്വാര്‍ട്ടേഴ്‌സില്‍ റെയ്ഡ് ചെയ്താണ് കഞ്ചാവ് പിടികൂടിയത്.

കഞ്ചാവ് കൊണ്ടുവന്ന കെ.എല്‍. 60 എ. 493 നമ്പര്‍ ബൈക്കും പിടികൂടി. ഇടുക്കിയില്‍ നിന്നും കാഞ്ഞങ്ങാട്ടെത്തിക്കുന്ന കഞ്ചാവ് മൊത്തവിതരക്കാരില്‍ നിന്നും ഏറ്റെടുക്കുന്ന ഏജന്റാണ് അബൂബക്കറെന്ന് എക്‌സൈസ് അധികൃതര്‍ പറഞ്ഞു. എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ഡി. ബാലചന്ദ്രന്‍, അസി. ഇന്‍സ്‌പെക്ടര്‍ കെ.പി. ബാലകൃഷ്ണന്‍, പ്രിവന്റീവ് ഓഫീസര്‍ എം. ശ്രീധരന്‍, സിവില്‍ എക്‌സൈസ് ഓഫീസര്‍മാരായ എ.ബി. അബ്ദുല്ല, പ്രശാന്ത് കുമാര്‍, ശ്രീനിവാസന്‍ പത്തില്‍, ഡ്രൈവര്‍ സത്യന്‍ എന്നിവരാണ് എക്‌സൈസ് സംഘത്തിലുണ്ടായിരുന്നത്.


ഞങ്ങളുടെ Facebookലും Twitterലും അംഗമാകൂ. ഓരോ വാര്‍ത്തയും കാസര്‍കോട് വാര്‍ത്തയിലൂടെ അറിയാം.