കാറില്‍ കടത്തിയ 135 കുപ്പി വിദേശ മദ്യവുമായി 2 പേര്‍ അറസ്റ്റില്‍

കാസര്‍കോട്: (www.kasargodvartha.com 20.08.2014) ആള്‍ട്ടോ കാറില്‍ കടത്തുകയായിരുന്ന 135 കുപ്പി വിദേശ മദ്യവുമായി രണ്ടു പേരെ പോലീസ് അറസ്റ്റു ചെയ്തു. ചൊവ്വാഴ്ച രാത്രി മുളിയാര്‍ പാലത്തിനടുത്തു വെച്ച് എസ്.പി.യുടെ കീഴിലുള്ള ഷാഡോ പോലീസ്, ആദൂര്‍ പോലീസ് എന്നിവരുടെ നേതൃത്വത്തിലായിരുന്നു മദ്യം പിടികൂടിയത്.

തൃശ്ശൂര്‍ വടക്കേക്കാട് പുന്നയൂര്‍ അറക്കപ്പറമ്പിലെ അന്‍സിഫ് എന്ന അനൂപ്(37), മഞ്ചേശ്വരം കുളൂറിലെ നവീന്‍ ഷെട്ടി(24) എന്നിവരാണ് അറസ്റ്റിലായത്.

ഇവര്‍ സഞ്ചരിച്ച കെ.എ. 19 പി.9637 നമ്പര്‍ ആള്‍ട്ടോ കാര്‍ പോലീസ് കസ്റ്റഡിയിലെടുത്തു. കാര്‍ നമ്പര്‍ വ്യാജമാണെന്നു സംശയിക്കുന്നു. കര്‍ണാടകയില്‍ നിന്നു കാസര്‍കോട്ടേക്കു കൊണ്ടു വരികയായിരുന്നു മദ്യമെന്നാണ് സംശയം. രഹസ്യ വിവരം ലഭിച്ച് മുള്ളേരിയയില്‍ നിന്നു  കാറിനെ പോലീസ് പിന്തുടരുകയായിരുന്നു. 135 കുപ്പി ഫുള്‍ ബോട്ടില്‍ മദ്യമാണ് കാറിലുണ്ടായിരുന്നത്.


പോലീസ് ഓഫീസര്‍മാരായ കെ. നാരായണന്‍, എസ്.പി. ബാലകൃഷ്ണന്‍, സത്യനാരായണന്‍ തുടങ്ങിയവരാണ് മദ്യം പിടികൂടിയ സംഘത്തിലുണ്ടായിരുന്നത്.