7-ാമത്തെ ശസ്ത്രക്രിയ ഉടന്‍ വേണമെന്ന് ഹംസയോട് ഡോക്ടര്‍മാര്‍; അതിന് നിങ്ങളുടെ സഹായം വേണം

കാസര്‍കോട്: (www.kasargodvartha.com 20.07.2014) ശരീരവും ജീവിതവും തളര്‍ത്തിയ മാരക രോഗത്തില്‍ നിന്ന് മുക്തി നേടാന്‍ ഏഴാമത്തെ ശസ്ത്രക്രിയ്ക്ക് വിധേയനാകാന്‍ ഡോക്ടര്‍മാര്‍ നിര്‍ദേശിച്ചെങ്കിലും അതിനുള്ള വഴികാണാതെ ദുഃഖിക്കുകയാണ് ഹംസ. പരിശുദ്ധമായ റമദാന്‍ നാളില്‍ തന്നെ സഹായിക്കാന്‍ ആരെങ്കിലുമൊക്കെ എത്തുമെന്ന പ്രതീക്ഷയും അദ്ദേഹം പുലര്‍ത്തുന്നു. അര്‍ബുദമെന്ന മാരക രോഗമാണ് ഹംസയെ വേട്ടയാടുന്നത്.

രണ്ട് ദിവസം മുമ്പ് ചില മനുഷ്യ സ്‌നേഹികളുടെ സഹായത്തോടെ മുംബൈയിലെ ഹിന്ദുജാ ആശുപത്രിയില്‍ പരിശോധനയ്‌ക്കെത്തിയ ഹംസയോട് എത്രയും വേഗം ശസ്ത്രക്രിയയ്ക്ക് വിധേയനാകണമെന്ന് ഡോക്ടര്‍മാര്‍ പറയുകയായിരുന്നു. ഇതിനകം ആറ് ശസ്ത്രക്രിയയ്ക്ക് വിധേയനായ ഹംസ ഇനി ഒരു ശസ്ത്രക്രിയയ്ക്ക് കൂടി വിധേയനായാല്‍ മാത്രമേ ജീവിത്തതിലേക്ക് തിരിച്ചുവരൂ എന്നാണ് അദ്ദേഹത്തെ പരിശോധിച്ച ഡോക്ടര്‍മാര്‍ പറയുന്നത്. അതിനായി കുറഞ്ഞത് ഏഴ് ലക്ഷം രൂപയെങ്കിലും ചിലവ് വരുമെന്നും ആശുപത്രി അധികൃതര്‍ പറയുകയുണ്ടായി.

എന്നാല്‍ നിത്യവൃത്തിക്ക് തന്നെ കഷ്ടപ്പെടുന്ന കുടുംബം ഇത്രയും തുക എങ്ങിനെ സ്വരൂപിക്കുമെന്നറിയാതെ വിഷമിക്കുകയാണ്. മനുഷ്യ സ്‌നേഹികള്‍ വിചാരിച്ചാല്‍ തന്നെയും കുടുംബത്തെയും രോഗാവസ്ഥയില്‍ നിന്നും ദാരിദ്ര്യത്തില്‍ നിന്നും കരകയറ്റാന്‍ കഴിയുമെന്നും അദ്ദേഹം പ്രത്യാശിക്കുന്നു.

തന്റെ രോഗാവസ്ഥയെക്കാളും ഹംസയെ അലട്ടുന്നത് നാലു വയസുകാരനായ മകന്‍ മുഹമ്മദ് ഹൈറാഫിന്റെ അസുഖമാണ്. രക്താര്‍ബുദം ബാധിച്ച കുട്ടിയുടെ സ്ഥിതി മെച്ചപ്പെട്ടു വരുന്നുണ്ടെങ്കിലും അസുഖം പൂര്‍ണമായും മാറിയിട്ടില്ല. കുട്ടിയെയും വിദഗ്ധ ചികിത്സയ്ക്ക് വിധേയനാക്കേണ്ടതുണ്ട്.

നായന്മാര്‍മൂല പടിഞ്ഞാര്‍മൂലയിലെ വാടക ക്വാര്‍ട്ടേഴ്‌സിലാണ് 38 കാരനായ ഹംസയും ഭാര്യയും പറക്കമുറ്റാത്ത മൂന്നു കുട്ടികളും അടങ്ങുന്ന കുടുംബം താമസിക്കുന്നത്. തല ചായ്ക്കാന്‍ സ്വന്തമായി ഒരു വീടില്ലാത്തതും രോഗാവസ്ഥയിലും ഹംസയെ വീണ്ടും തളര്‍ത്തുന്നു.