മൃതദേഹങ്ങള്‍ കുഴിച്ചിടാന്‍ കൊണ്ടുപോയത് അരകിലോമീറ്റര്‍ ചുമന്നുകൊണ്ട്

റബ്ബര്‍ തോട്ടത്തിലെ കുന്നുകയറി ഇറങ്ങിയ ശേഷമേ മൃതദേഹങ്ങള്‍ കുഴിച്ചിട്ടതായി പറയപ്പെടുന്ന സ്ഥലത്ത് എത്താന്‍ കഴിയുകയുള്ളു
കുണ്ടംകുഴി: (www.kasargodvartha.com 07.07.2014) മംഗലാപുരത്ത് കള്ളകടത്തുസംഘം കൊലപ്പെടുത്തിയ കണ്ണൂര്‍ തലശ്ശേരി സൈദാര്‍പള്ളി സ്വദേശി നാഫിര്‍ (24), കോഴിക്കോട് കുറ്റിച്ചിറ സ്വദേശി ഫഹീം (22) എന്നിവരുടെ മൃതദേഹം കുഴിച്ചുമൂടാന്‍ കൊണ്ടുപോയത് അരകിലോമീറ്റര്‍ ചുമന്നുകൊണ്ട്. കുണ്ടംകുഴി ശങ്കരകാട് എന്ന സ്ഥലത്താണ് മൃതദേഹങ്ങള്‍ കുഴിച്ചിട്ടത്.

കുണ്ടംകുഴിയില്‍നിന്ന് മൂന്ന് കിലോമീറ്റര്‍ ദൂരെ സഞ്ചരിച്ചാല്‍ ഇളനീരടുക്കത്ത് എത്താം. ഇവിടെനിന്നും ഒന്നരകിലോമീറ്റര്‍ അകലെയാണ് ശങ്കരകാട്. ഇവിടേയ്ക്ക് മാത്രമേ വാഹനങ്ങള്‍ക്ക് എത്തിപ്പെടാന്‍ കഴിയുകയുള്ളു. പ്രതികളേയും കൊണ്ട് പോലീസ് രാവിലെ തന്നെ ശങ്കരകാട് എത്തിയിരുന്നു. ഇവിടെനിന്നും അരകിലോമീറ്റര്‍ കാല്‍നടയായി സഞ്ചരിച്ചുവേണം മൃതദേഹം കുഴിച്ചിട്ടതായി പറയുന്ന സ്ഥലത്തെത്താന്‍. ഒരു റബ്ബര്‍തോട്ടം കടന്നുവേണം അവിടേക്ക് ചെല്ലാന്‍. റബ്ബര്‍ തോട്ടത്തിലെ കയറ്റംകയറി ഇറങ്ങിയ ശേഷമേ മൃതദേഹങ്ങള്‍ കുഴിച്ചിട്ടതായി പറയപ്പെടുന്ന സ്ഥലത്ത് ചെല്ലാന്‍കഴിയുകയുള്ളു. പോലീസും ബന്ധപ്പെട്ട ഉദ്യോഗസ്ഥരും ഏറെ ക്ലേശമനുഭവിച്ചാണ് ഇവിടെയെത്തിച്ചേര്‍ന്നിരിക്കുന്നത്.

മൃതദേഹം പുറത്തെടുക്കാനുള്ള നടപടികള്‍ തിങ്കളാഴ്ച ഉച്ചയ്ക്ക് ഒരു മണിക്ക് ശേഷവും ആരംഭിച്ചിട്ടില്ല. ആര്‍.ഡി.ഒയും പോലീസ് സര്‍ജനും മംഗലാപുരത്തെ പോലീസ് കമ്മീഷ്ണറും എത്തിയ ശേഷം മാത്രമെ മൃതദേഹങ്ങള്‍ പുറത്തെടുക്കുകയുള്ളു. ബന്ധപ്പെട്ട ഉദ്യോഗസ്ഥര്‍ എത്താത്തതിനാല്‍ പ്രതികളെ ജീപ്പില്‍ തന്നെ ഇരുത്തിയിരിക്കുകയാണ്.