കൊലക്കേസ് പ്രതിയെ നടുറോഡില്‍ വെട്ടിക്കൊന്നു; 6 പേര്‍ പിടിയില്‍

മംഗലാപുരം: (www.kasargodvartha.com 23.06.2014) മംഗലാപുരം: കൊലക്കേസ് പ്രതിയായ യുവാവിനെ ഒരു സംഘം നടുറോഡില്‍ വളഞ്ഞു വെച്ച് വെട്ടിക്കൊലപ്പെടുത്തി. തടയാന്‍ ചെന്ന സുഹൃത്തിനെ വെട്ടിപ്പരിക്കേല്‍പ്പിച്ചു. ശനിയാഴ്ച മാരിപ്പള്ളയിലാണ് സംഭവം. 2011 ല്‍ പറങ്കിപ്പേട്ടയിലെ നൂറുദ്ദീനെ വെട്ടിക്കൊലപ്പെടുത്തിയ കേസിലെ പ്രതി നൗഷാദ് (27) ആണ് കൊല്ലപ്പെട്ടത്. സംഭവത്തില്‍ ആറ് പേരെ ബണ്ട്വാള്‍ റൂറല്‍ പോലീസ് കസ്റ്റഡിയിലെടുത്തു.

പറങ്കിപ്പേട്ടയിലെ ബലേകായി ഖാദറിന്റെ മകനാണ്. പറങ്കിപ്പേട്ടയിലെ കടയില്‍ ജോലി ചെയ്യുകയായിരുന്ന നൗഷാദ് ഒരു ഫോണ്‍ സന്ദേശം ലഭിച്ചതിനെ തുടര്‍ന്ന് സുഹൃത്തായ സമീറിനൊപ്പം മാരിപ്പള്ളയിലേക്ക് പോയതായിരുന്നു.

മാരിപ്പള്ളയില്‍ കാറില്‍ നിന്നിറങ്ങിയ ഉടന്‍ സംഘം ചാടി വീണ് വടിവാളു കൊണ്ട് തുരുതുരാ വെട്ടുകയായിരുന്നു. നൗഷാദ് മരിച്ചുവെന്ന് ഉറപ്പു വരുത്തിയ സംഘം ഉടന്‍ വാഹനത്തില്‍ കയറി സ്ഥലം വിടുകയായിരുന്നുവെന്ന് പോലീസ് പറഞ്ഞു. പരിക്കേറ്റ സമീര്‍ ആശുപത്രിയില്‍ ചികിത്സയിലാണ്. പിടിയിലായവരെ പോലീസ് വിശദമായി ചോദ്യം ചെയ്ത് വരികയാണ്.