തലശ്ശേരിയില്‍ അറസ്റ്റിലായ വ്യാജ ഡോക്ടര്‍ ചെറുവത്തൂരില്‍ 3 ദിവസം ആര്‍.എം.ഒ ആയി

ചെറുവത്തൂര്‍: തലശ്ശേരി സി.ഐ പി.വിശ്വംഭരന്‍ ബുധനാഴ്ച രാവിലെ അറസ്റ്റ് ചെയ്ത വ്യാജ ഡോക്ടര്‍ ഫജ്ഫര്‍ റസാഖ് (26) ചെറുവത്തൂരിലെ സ്വകാര്യ ആശുപത്രിയില്‍ മൂന്നുദിവസം ആര്‍.എം.ഒ ആയി ജോലി നോക്കിയിരുന്നുവെന്ന് വ്യക്തമായി.

ഇവിടെ നിന്നും 6,000 രൂപ കൈപറ്റി മുങ്ങിയതായിരുന്നു ഇയാള്‍. പാനൂര്‍ കുറ്റ്യേരി സ്വദേശിയായ റസാഖിനെ രഹസ്യ വിവരത്തെ തുടര്‍ന്ന് തലശ്ശേരി ജനറല്‍ ആശുപത്രിയില്‍ വെച്ചാണ് സി.ഐ അറസ്റ്റ് ചെയ്തത്. എട്ടുവരെ പഠിച്ച റസാഖ് കുറച്ചുകാലം പാനൂരിലെ ഒരു സ്വകാര്യ സ്‌കൂളില്‍ ഡ്രൈവറായിരുന്നു.

പിന്നീട് ഗള്‍ഫില്‍ പോയി. അവിടെ നിന്നും ഇംഗ്ലീഷ് സംസാരിക്കാന്‍ പഠിച്ച റസാഖ് നാട്ടിലെത്തി യുനാനി ചികിത്സ നടത്തിവരികയായിരുന്നു. പിന്നീടാണ് ആശുപത്രികളില്‍ കയറിയിറങ്ങിയുള്ള പരിശോധനകളും ചികിത്സയും തുടങ്ങിയത്. റസാഖിന്റെ നീക്കങ്ങള്‍ നിരീക്ഷിക്കുകയായിരുന്ന നാട്ടുകാര്‍ പോലീസില്‍ പരാതി നല്‍കിയിരുന്നു.

തലശ്ശേരി ജനറല്‍ ആശുപത്രിയില്‍ രോഗികളെ പരിശോധിക്കാനെത്തിയ റസാഖിനെ പോലീസ് കയ്യോടെ പിടികൂടി. ചോദ്യം ചെയ്തതില്‍ ഇയാള്‍ കുറ്റം സമ്മതിച്ചു. മാന്യമായി വസ്ത്രം ധരിച്ച് കഴുത്തില്‍ സ്‌റ്റെതസ്‌ക്കോപ്പും ഓവര്‍കോട്ടുമണിഞ്ഞെത്തുന്ന റസാഖ് കഴുത്തില്‍ കണ്ണൂര്‍ മെഡിക്കല്‍ കോളജിലെ ഡോക്ടറാണെന്ന തിരിച്ചറിയല്‍ കാര്‍ഡും ധരിച്ചിരുന്നു.

കോഴിക്കോട്- കണ്ണൂര്‍ ജില്ലകളിലെ വിവിധ ആശുപത്രികളില്‍ ഇയാള്‍ രോഗികളെ പരിശോധിച്ച് വന്‍ തുകയുമായി കടന്നുകളഞ്ഞതായി ആക്ഷേപമുണ്ട്.
വസ്ത്രധാരണവും പെരുമാറ്റവും ബലാത്സംഗത്തിന് കാരണമാകുന്നുവെന്ന് മഹാരാഷ്ട്രാ വനിതാ കമ്മീഷന്‍