മകന്റെ മരണത്തില്‍ ദുരൂഹതയുണ്ടെന്ന് കാണിച്ച് പിതാവിന്റെ ഹര്‍ജി

പെര്‍ള: മകന്റെ മരണത്തില്‍ ദുരൂഹതയുണ്ടെന്ന് കാണിച്ച് പിതാവ് നല്‍കിയ ഹര്‍ജിയില്‍ കോടതി നിര്‍ദേശപ്രകാരം മകന്റെ ഭാര്യയ്ക്കും വീട്ടുകാര്‍ക്കുമെതിരെ പോലീസ് അന്വേഷണം ആരംഭിച്ചു.

പെര്‍ള ചെക്‌പോസ്റ്റിനടുത്ത് താമസിക്കുന്ന രാമകൃഷ്ണ ആചാരിയാണ് മകന്‍ നാഗരാജിന്റെ മരണം കൊലപാതകമാണെന്നും അത് തെളിയിക്കാനായി അന്വേഷണം നടത്തണമെന്നും കാണിച്ച് മംഗലാപുരം കോടതിയില്‍ ഹര്‍ജി നല്‍കിയത്.

കോടതി നിര്‍ദേശപ്രകാരം ഉള്ളാള്‍ പോലീസാണ് കേസെടുത്തത്. 2013 മാര്‍ച്ച് 19 ന് ഉള്ളാള്‍ റെയില്‍വേ സ്‌റ്റേഷന്‍ ട്രാക്കിലാണ് നാഗരാജിനെ മരിച്ചനിലയില്‍ കണ്ടെത്തിയത്. ഉള്ളാള്‍ തൊക്കോട്ടെ ഭവ്യയാണ് നാഗരാജിന്റെ ഭാര്യ. ഇവര്‍ക്ക് മൂന്നുവയസ് പ്രായമുള്ള ഒരു മകനുമുണ്ട്.

നാഗരാജിനോടൊപ്പം താമസിച്ചിരുന്ന ഭവ്യ സ്വന്തം വീട്ടിലേക്ക് പോവുകയായിരുന്നു. പിന്നീട് നാഗരാജിനെ മരണം നടക്കുന്നതിന്റെ തലേദിവസം അവിടേക്ക് വിളിച്ചുവരുത്തുകയും ചെയ്തു.

അവിടെ വെച്ച് വഴക്കുണ്ടാകുകയും പിന്നീട് മകനെ അടിച്ചുകൊലപ്പെടുത്തി മൃതദേഹം ട്രാക്കിലിടുകയുമായിരുന്നുവെന്നാണ് രാമകൃഷ്ണാചാര്യ നല്‍കിയ പരാതിയില്‍ പറയുന്നത്.

ഭാര്യയേയും അവരുടെ മാതാപിതാക്കളെയും വീട്ടുകാരെയും എതിര്‍
കക്ഷികളാക്കിയാണ് ഹര്‍ജി ഫയല്‍ ചെയ്തിരിക്കുന്നത്.