റോഡു മുറിച്ചുകടക്കുമ്പോള്‍ ബൈക്കിടിച്ച് പരിക്കേറ്റ മാര്‍ബിള്‍ തൊഴിലാളി മരിച്ചു

ഉപ്പള: റോഡു മുറിച്ചുകടക്കുമ്പോള്‍ ബൈക്കിടിച്ച് പരിക്കേറ്റ യുപി സ്വദേശിയായ മാര്‍ബിള്‍ തൊഴിലാളി മരിച്ചു. ഉപ്പള കൈക്കമ്പയില്‍ താമസിച്ച് മാര്‍ബിള്‍ ജോലിചെയ്തുവന്നിരുന്ന മൊയ്‌നുദ്ദീന്‍(28) ആണ് മംഗലാപുരം ആശുപത്രിയില്‍ വെച്ച് മരിച്ചത്. ചൊവ്വാഴ്ച നാട്ടിലേക്ക് പോകാനിരിക്കവെ ആയിരുന്നു മൊയ്‌നുദ്ദീന് അപകടം സംഭവിച്ചത്.
അപകടവിവരമറിഞ്ഞ് യുപിയില്‍ നിന്നും ബന്ധുക്കള്‍ മഞ്ചേശ്വരത്തെത്തിയിട്ടുണ്ട്. ചൊവ്വാഴ്ച രാവിലെയാണ് മരണം സംഭവിച്ചത്. മംഗലാപുരം ആശുപത്രിയില്‍ പോസ്റ്റുമോര്‍ട്ടത്തിനുശേഷം വൈകിട്ടോടെ മൃതദേഹം യുപിയിലേക്ക് കൊണ്ടുപോകും. മഞ്ചേശ്വരം പോലീസ് മൃതദേഹം ഇന്‍ക്വസ്റ്റ് നടത്തി. അപകടത്തെ തുടര്‍ന്ന് ബൈക്ക് മറിഞ്ഞ് ഉപ്പള ഒളയം സ്വദേശികളായ മുസമ്മില്‍(25), മുനീര്‍(25) എന്നിവര്‍ക്കും പരിക്കേറ്റിരുന്നു. ഇവര്‍ സ്വകാര്യാശുപത്രിയില്‍ ചികിത്സയിലാണ്.