ജനസമ്പര്‍ക്ക പരിപാടിയിലേക്ക് ബി.ജെ.പി മാര്‍ച്ച്

കാസര്‍കോട്: മുഖ്യമന്ത്രിയുടെ ജനസമ്പര്‍ക്ക പരിപാടി നടക്കുന്ന വിദ്യാനഗര്‍ മുന്‍സിപ്പല്‍ സ്റ്റേഡിയത്തിലേക്ക് ബി.ജെ.പി പ്രവര്‍ത്തകര്‍ പ്രതിഷേധ മാര്‍ച്ച് നടത്തി. മറാഠികളെ പട്ടികവര്‍ഗത്തില്‍ നിന്ന് ഒഴിവാക്കാന്‍ സംസ്ഥാന സര്‍ക്കാര്‍ കേന്ദ്രസര്‍ക്കാരിന് കത്തയച്ച സംഭവത്തില്‍ പ്രതിഷേധിച്ചാണ് വെള്ളിയാഴ്ച രാവിലെ 10.30 മണിയോടെ മാര്‍ച്ച് നടത്തിയത്. ഗവ.കോളജ് പരിസരത്തുനിന്നാരംഭിച്ച പ്രകടനം അന്ധവിദ്യാലയം പരിസരത്ത് പോലീസ് തടഞ്ഞു.


പോലീസ് റോഡില്‍ നിരത്തിവെച്ച ബാരിക്കേഡുകള്‍ ബി.ജെ.പി പ്രവര്‍ത്തകര്‍ മറിച്ചിടുകയും ചാടിക്കടക്കുകയും ചെയ്തത് നേരിയ സംഘര്‍ഷാവസ്ഥ ഉണ്ടാക്കി. 200 ഓളം പ്രവര്‍ത്തകരാണ് പ്രകടനം നടത്തിയത്. തുടര്‍ന്ന് നടന്ന പ്രതിഷേധ യോഗം ബി.ജെ.പി സംസ്ഥാന ജനറല്‍ സെക്രട്ടറി കെ.സുരേന്ദ്രന്‍ ഉദ്ഘാടനം ചെയ്തു.


ജില്ലാ പ്രസിഡന്റ് സുരേഷ് കുമാര്‍ ഷെട്ടി അധ്യക്ഷത വഹിച്ചു. പ്രമീള സി.നായ്ക്ക്, മടിക്കൈ കമ്മാരന്‍, ഗോപാലകൃഷ്ണന്‍, രാമപ്പ മഞ്ചേശ്വരം, സുധാമ, വത്സരാജ്, പി.കെ.സുനില്‍, ബിജു റൈ, കൃഷ്ണന്‍ എന്നിവര്‍ പ്രസംഗിച്ചു. പി.രമേശ് സ്വാഗതം പറഞ്ഞു.


സര്‍ക്കാര്‍ പദ്ധതിയിലെ ഗുണഭോക്താക്കളെ ഗ്രാമസഭയിലൂടെ കണ്ടെത്തും: ഉമ്മന്‍ ചാണ്ടി