കാമുകിയെ കാണാനെത്തി കുടുങ്ങി; വിവാഹ വാഗ്ദാനം നല്‍കി മുങ്ങി

ബേഡകം: മൊബൈലിലൂടെ സംസാരിച്ച് പ്രണയത്തിലായ യുവാവ്, യുവതിക്ക് വിവാഹ വാഗ്ദാനം നല്‍കി മുങ്ങി. വിവാഹദിവസം ക്ഷേത്രത്തിലെത്തിയ യുവതിയും ബന്ധുക്കളും വരനെത്താത്തതിനാല്‍ നിരാശരായി സ്ഥലം വിട്ടു.

കാസര്‍കോട് കൊറക്കോട് സ്വദേശിയായ യുവാവാണ് കുണ്ടംകുഴി വേളാഴി സ്വദേശിനിയായ യുവതിക്ക് വിവാഹ വാഗ്ദാനം നല്‍കി മുങ്ങിയത്. മൊബൈല്‍ പ്രണയത്തിന്റെ അവസാന ഘട്ടത്തില്‍ യുവതിയെ നേരിട്ട് കാണാന്‍ കുണ്ടംകുഴിയില്‍ എത്തിയ യുവാവിനെ നാട്ടുകാര്‍ പിടികൂടി പോലീസിലേല്‍പിക്കുകയായിരുന്നു. യുവാവിന്റെ ഉദ്ദേശം മനസിലാക്കിയ പോലീസ് യുവാവിനെ യുവതിയെ വിവാഹം കഴിച്ചോളാം എന്ന ഉറപ്പിന്‍മേല്‍ വിട്ടയക്കുകയും ചെയ്തു.

ആ ഉറപ്പ് പ്രകാരം ബുധനാഴ്ച വിവാഹം നടക്കേണ്ടതായിരുന്നു. പോലീസിന്റെ കയ്യില്‍ നിന്ന് രക്ഷപ്പെടാനായിരുന്നു യുവാവ് വിവാഹ വാഗ്ദാനം നല്‍കിയതെന്ന് പിന്നീടാണ് വധുവിന്റെ വീട്ടുകാര്‍ക്കും നാട്ടുകാര്‍ക്കും മനസിലായത്. കഴിഞ്ഞ വെള്ളിയാഴ്ച രാത്രി ഒമ്പത് മണിയോടെയാണ് യുവാവ് കാമുകിയെ കാണാന്‍ കുണ്ടംകുഴിയില്‍ എത്തിയത്.

സംശയ സാഹചര്യത്തില്‍ യുവാവിനെ കണ്ട നാട്ടുകാര്‍ ചോദ്യം ചെയ്തപ്പോഴാണ് ആഗമനോദ്ദേശം മനസിലായത്. ഉടന്‍ നാട്ടുകാര്‍ പോലീസിനെ വിളിച്ചു വരുത്തി യുവാവിനെ കൈമാറുകയായിരുന്നു. അതോടൊപ്പം യുവതിയുടെ ബന്ധുക്കളെയും സ്റ്റേഷനിലേക്ക് വിളിച്ചു വരുത്തി. കൊറക്കോട്ട് നിന്ന് യുവാവിന്റെ ബന്ധുക്കളും സ്‌റ്റേഷനില്‍ സന്ധിച്ചു. ഒടുവില്‍ എല്ലാവരുടെയും സാന്നിധ്യത്തില്‍ വിവാഹം നിശ്ചയിരിക്കുകയായിരുന്നു.

ബേഡകം മോലോത്തുങ്കാല്‍ ക്ഷേത്രത്തില്‍ ബുധനാഴ്ച വിവാഹം നടത്താനായിരുന്നു തീരുമാനം. ഇതു പ്രകാരം വധുവിന്റെ വീട്ടുകാര്‍ രാവിലെ 10.30 മണിയോടെ ക്ഷേത്ര സന്നിധിയിലെത്തിയിരുന്നു. 25 ബന്ധുക്കളുമുണ്ടായിരുന്നു. ഉച്ചയ്ക്ക് രണ്ട് മണിയായിട്ടും വരനും ബന്ധുക്കളും എത്താത്തതിനാല്‍ വരന്റെ മൊബൈല്‍ ഫോണില്‍ ഡയല്‍ ചെയ്തു. എന്നാല്‍ ഫോണ്‍ സ്വിച്ച് ഓഫിലായിരുന്നു. ബന്ധുക്കളെ വിളിക്കാന്‍ ശ്രമിച്ചപ്പോഴും അതു തന്നെയായിരുന്നു സ്ഥിതി. അതോടെ താന്‍ വഞ്ചിക്കപ്പെട്ടുവെന്ന് ബോധ്യപ്പെട്ട യുവതിയും ബന്ധുക്കളും വീട്ടിലേക്ക് മടങ്ങുകയായിരുന്നു.