ആംബുലന്‍സ് ഒരുങ്ങി, സഞ്ചരിക്കുന്ന ആശുപത്രി ഒമ്പതിന് തുടങ്ങും

തൃക്കരിപ്പൂര്‍: നീലേശ്വരം ബ്ലോക്ക് പഞ്ചായത്ത് നടപ്പാക്കുന്ന സഞ്ചരിക്കുന്ന ആശുപത്രി ഒമ്പതു മുതല്‍ രോഗികള്‍ക്കിടയിലേക്ക് എത്തും. ഇതിനായി ആധുനിക സൗകര്യങ്ങളോടുകൂടിയ ആംബുലന്‍സ് കഴിഞ്ഞദിവസം ചെറുവത്തൂര്‍ സി എച്ച് സിയില്‍ എത്തി. ഒരു ചെറിയ ആശുപത്രിയുടെ പ്രയോജനം ഈ വാഹനത്തില്‍നിന്ന് രോഗികള്‍ക്ക് കിട്ടും. വീടുകളിലെത്തി ചികിത്സയും മരുന്നും ലഭ്യമാക്കുന്ന സംവിധാനം തദ്ദേശ സ്വയംഭരണ വകുപ്പിന് കീഴില്‍ സംസ്ഥാനത്തുതന്നെ ആദ്യമാണ്. പ്രതിവര്‍ഷം 10 ലക്ഷം രൂപ ചെലവുള്ള പദ്ധതി ജനകീയ പങ്കാളിത്തത്തോടെയാണ് നടപ്പാക്കുന്നത്. കാന്‍സര്‍, പക്ഷാഘാതം, എന്‍ഡോസള്‍ഫാന്‍ ദുരിതബാധിതര്‍, ബുദ്ധിമാന്ദ്യം സംഭവിച്ചവര്‍, ബധിരത, അന്ധത, കരള്‍, വൃക്ക സംബന്ധമായ രോഗം ബാധിച്ചവര്‍ എന്നിവര്‍ക്കാണ് ആദ്യ ഘട്ടത്തില്‍ ചികിത്സ നല്‍കുക. മരുന്നുകള്‍ സൗജന്യമായി നല്‍കും. ഒരു ഡോക്ടര്‍, രണ്ട് നഴ്‌സുമാര്‍, ആരോഗ്യപ്രവര്‍ത്തകര്‍ എന്നിവരുടെ സേവനമാണ് ഈ ആശുപത്രിയില്‍നിന്ന് രോഗികള്‍ക്ക് ലഭിക്കുക.
പി കരുണാകരന്‍ എം പിയുടെ പ്രാദേശിക വികസന ഫണ്ടില്‍നിന്ന് 10 ലക്ഷം രൂപ ചെലവഴിച്ചാണ് ആംബുലന്‍സ് വാങ്ങിയത്. നീലേശ്വരം ബ്ലോക്ക് പഞ്ചായത്ത് പരിധിയില്‍പെട്ട പിലിക്കോട്, ചെറുവത്തൂര്‍, കയ്യൂര്‍-ചീമേനി, തൃക്കരിപ്പൂര്‍, പടന്ന, വലിയപറമ്പ് പഞ്ചായത്തുകളിലെ രോഗികള്‍ക്കാണ് ഇതിന്റെ പ്രയോജനം ലഭിക്കുക. കഴിഞ്ഞ ആഗസ്റ്റ് 21ന് നടത്തിയ ഏകദിന സര്‍വേയിലൂടെ 7546 രോഗികളെ കണ്ടെത്തിയിരുന്നു. ഒമ്പതിന് കിഴക്കേമുറിയില്‍ ആശുപത്രിയുടെ പ്രവര്‍ത്തനോദ്ഘാടനം നടക്കും. 10ന് വലിയപറമ്പ്, 11ന് പടന്ന, 12ന് തൃക്കരിപ്പൂര്‍, 13ന് പിലിക്കോട്, 14ന് ചീമേനി പഞ്ചായത്തുകളില്‍ പര്യടനം നടത്തും. ഇ സി ജി, ഓക്‌സിജന്‍, ഫാര്‍മസി തുടങ്ങിയ സംവിധാനങ്ങളും ആംബുലന്‍സില്‍ ഒരുക്കിയിട്ടുണ്ട്. പ്രതിവര്‍ഷം പത്ത് ലക്ഷം രൂപ പദ്ധതിക്ക് ചിലവ് വരും.