ഔദ്യോഗിക ആവശ്യത്തിന് സ്വകാര്യവിമാനം വാടകയ്‌ക്കെടുത്തത് വിവാദമായി; യു.എസ് ആരോഗ്യസെക്രട്ടറി രാജിവെച്ചു

വാഷിംഗ്ടണ്‍: (www.kasargodvartha.com 30.09.2017) ഔദ്യോഗിക ആവശ്യത്തിന് സ്വകാര്യവിമാനം വാടകയ്‌ക്കെടുത്തത് വിവാദമായി. യു.എസ് ആരോഗ്യസെക്രട്ടറി രാജിവെച്ചു. യു.എസ് ആരോഗ്യസെക്രട്ടറി ടോം പ്രൈസാണ് രാജിവെച്ചത്. മെയ് മാസം മുതലാണ് ടോം പ്രൈസ് ഔദ്യോഗിക ആവശ്യങ്ങള്‍ക്കായി സ്വകാര്യ വിമാനയാത്ര നടത്തിയത്. 26 തവണയാണ് ഇദ്ദേഹം സ്വകാര്യവിമാനത്തില്‍ യാത്ര ചെയ്തത്.

വിമാനയാത്രയ്ക്കായി നാലുലക്ഷം ഡോളര്‍ (2.61 കോടി രൂപ) ആണ് ചെലവായത്. ഇത്രയധികം തുക ചെലവിട്ടതില്‍ പ്രസിഡണ്ട് ഡൊണാള്‍ഡ് ട്രംപ് അതൃപ്തി പ്രകടിപ്പിച്ചിരുന്നു. ഇതോടെ പ്രൈസ് ക്ഷമ പറഞ്ഞെങ്കിലും ആരോപണങ്ങള്‍ ശക്തമായി ഉയര്‍ന്നതോടെ രാജി വെക്കുകയായിരുന്നു. രാജി ട്രംപ് സ്വീകരിച്ചു. ഡോണ്‍ ജെ. റൈറ്റിനെ താല്‍ക്കാലിക ആരോഗ്യ സെക്രട്ടറിയായി നിയമിച്ചതായി വൈറ്റ് ഹൗസ് അറിയിച്ചു.