Parade | ഫ്രാൻസിൽ ബാസ്റ്റിൽ ദിനത്തോടനുബന്ധിച്ച് പരേഡുമായി ഇന്ത്യൻ സൈന്യം; അഭിമാനമായി പഞ്ചാബ് റെജിമെന്റ്; സല്യൂട്ട് സ്വീകരിച്ച് പ്രധാനമന്ത്രി നരേന്ദ്ര മോദി

പാരീസ്: (www.kasargodvartha.com) ഫ്രാൻസിൽ വെള്ളിയാഴ്ച (ജൂലൈ 14) ദേശീയ ദിനം (ബാസ്റ്റിൽ ദിനം) ആഘോഷിക്കുകയാണ്. ഇത്തവണ, ഇന്ത്യൻ പ്രധാനമന്ത്രി നരേന്ദ്ര മോദിയെ അതിഥിയായി പങ്കെടുക്കാൻ ക്ഷണിച്ചതിനാൽ ഫ്രാൻസിന്റെ ഈ ദേശീയ ദിനം ഇന്ത്യയ്ക്കും വളരെ സവിശേഷമാണ്. ബാസ്റ്റിൽ ദിനത്തോടനുബന്ധിച്ച് നടക്കുന്ന ചടങ്ങിൽ ഫ്രഞ്ച് സേനയ്‌ക്കൊപ്പം പരേഡിൽ പങ്കെടുക്കാൻ ഇന്ത്യൻ സായുധ സേനയുടെ പഞ്ചാബ് റെജിമെന്റിനെയും ക്ഷണിച്ചത് രാജ്യത്തിന് വലിയ അഭിമാനമാണ് പകർന്നത്.

പാരീസിൽ നടന്ന ബാസ്റ്റിൽ ഡേ സൈനിക പരേഡിൽ പഞ്ചാബ് റെജിമെന്റിലെ സേനാംഗങ്ങൾ ചുവടുവച്ചപ്പോൾ പ്രധാനമന്ത്രി മോദി സല്യൂട്ട് സ്വീകരിച്ചു. കൂടാതെ, ഇന്ത്യൻ വ്യോമസേനയുടെ റഫാൽ യുദ്ധവിമാനങ്ങളും ഫ്രഞ്ച് യുദ്ധവിമാനങ്ങൾക്കൊപ്പം ഫ്ലൈപാസ്റ്റിൽ പങ്കെടുത്തു. നൂറ്റാണ്ടുകൾ പഴക്കമുള്ള ധാർമികതയാൽ പ്രചോദിതരായ ഇന്ത്യ, ഭൂമിയെ സമാധാനപരവും സമൃദ്ധവും സുസ്ഥിരവുമാക്കാൻ സാധ്യമായതെല്ലാം ചെയ്യാൻ പ്രതിജ്ഞാബദ്ധമാണെന്ന് പ്രധാനമന്ത്രി മോദി ട്വീറ്റ് ചെയ്തു. 'ശക്തവും വിശ്വസ്തവുമായ പങ്കാളിയായതിന് 1.4 ബില്യൺ ഇന്ത്യക്കാർ ഫ്രാൻസിനോട് എപ്പോഴും നന്ദിയുള്ളവരായിരിക്കും. ഈ ബന്ധം കൂടുതൽ ദൃഢമാകട്ടെ', അദ്ദേഹം കുറിച്ചു.

Indian Army's Punjab Regiment march along the Champs-Élysées during the Bastille Day parade in Paris, France. The contingent is being led by Captain Aman Jagtap 🪖
🇮🇳💖🇫🇷 pic.twitter.com/yseHvCpf5G

— 𝐽𝑎𝑦𝑜𝑡𝑖 𝑆𝑎𝑟𝑘𝑎𝑟🇮🇳 (@jayoti4you) July 14, 2023

'സാരേ ജഹാൻ സേ അച്ഛാ' എന്ന ഗാനത്തിന്റെ അകമ്പടിയോടെ ഇന്ത്യൻ സായുധ സേനയുടെ 269 അംഗ ട്രൈ സർവീസസ് (ജല-കര-വായു) സംഘമാണ് പരേഡിൽ പങ്കെടുത്തത്. പരേഡിലുടനീളം, പരമ്പരാഗത പരേഡിന്റെ സവിശേഷതകൾ മോദിയോട് മാക്രോൺ വിശദീകരിക്കുന്നത് കാണാമായിരുന്നു.