അഗ്നിപർവത ചാരം ഇന്ത്യയുടെ ആകാശപരിധി വിട്ടു; മേഘങ്ങൾ ഇപ്പോൾ ചൈനയിലേക്ക്; ആശങ്ക വേണ്ടെന്ന് കേന്ദ്രം

ന്യൂഡൽഹി: (KasargodVartha) ആഫ്രിക്കൻ രാജ്യമായ ഇത്യോപ്യയിലെ ഹയ്ലി ഗുബ്ബി അഗ്നിപർവതം പൊട്ടിത്തെറിച്ചതിനെ തുടർന്നുള്ള ചാരവും പൊടിപടലങ്ങളും പടർന്നതുമൂലമുള്ള ആശങ്ക ഇന്ത്യയെ വിട്ടൊഴിയുകയാണ്. ഈ ചാരവും പൊടിപടലങ്ങളും ചൊവ്വാഴ്ച (25.11.2025) വൈകിട്ടോടെ ഇന്ത്യയുടെ ആകാശമേഖല കടന്ന് ചൈനയിലേക്കു നീങ്ങി. പൊടിപടലം സഞ്ചരിക്കുന്നത് 25,000 അടി ഉയരത്തിലായതിനാൽ വായുഗുണനിലവാരത്തെയോ കാലാവസ്‌ഥയെയോ ബാധിക്കില്ലെന്ന് കേന്ദ്ര കാലാവസ്ഥ‌ാ വകുപ്പ് അറിയിച്ചു.

വിമാനസർവീസുകളെ ബാധിച്ചു

അതേസമയം, ചില വിമാന സർവീസുകളെ ഈ പ്രതിഭാസം ബാധിച്ചു. തിങ്കളാഴ്‌ച (24.11.2025) വൈകിട്ട് എട്ടോടെയാണ് രാജസ്‌ഥാൻ വഴി ചാരമേഘങ്ങൾ ഇന്ത്യൻ ആകാശത്തേക്കു കടന്നത്. അതിനു ശേഷമുള്ള 24 മണിക്കൂറിനിടെ എയർ ഇന്ത്യയ്ക്ക് മാത്രം 13 വിമാനസർവീസുകൾ റദ്ദാക്കേണ്ടി വന്നു. ആശങ്കപ്പെടാനില്ലെന്നും സ്‌ഥിഗതികൾ സൂക്ഷ്‌മമായി നിരീക്ഷിക്കുന്നുണ്ടെന്നും കേന്ദ്ര വ്യോമയാന മന്ത്രാലയം അറിയിച്ചു.

ഉംറ തീർഥാടകർക്കായി പ്രത്യേക വിമാനം

ജിദ്ദ വിമാനം റദ്ദാക്കിയതിനെ തുടർന്ന് യാത്ര മുടങ്ങിയ ഉംറ തീർഥാടകർ അടക്കമുള്ള യാത്രക്കാരെ ബുധനാഴ്ച (26.11.2025) രാവിലെ 11ന് പ്രത്യേക വിമാനം സജ്ജമാക്കി അയച്ചു. ജിദ്ദയിൽ കുടുങ്ങിയിരിക്കുന്ന കൊച്ചിയിലേക്കുള്ള യാത്രക്കാരെ മടക്കവിമാനത്തിൽ കൊച്ചിയിലെത്തിക്കും. ഈ വിമാനം വൈകിട്ട് 3.55ന് കൊച്ചിയിലെത്തും.

പ്രത്യാഘാതങ്ങൾ നീണ്ടുനിൽക്കില്ല

വിമാനങ്ങൾ സാധാരണയായി പറക്കുന്ന അതേ ഉയരത്തിലാണ് ഈ ചാരമേഘങ്ങളും സഞ്ചരിക്കുന്നതെന്ന് കുസാറ്റിലെ അഡ്വാൻസ്‌ഡ് സെന്റർ ഫോർ അറ്റ്മോസ്ഫെറിക് റഡാർ റിസർച് ഡയറക്ടർ ഡോ.എസ്.അഭിലാഷ് പറഞ്ഞു. ഭൂനിരപ്പിലെ കാഴ്‌ചയെ നേരിട്ടു ബാധിക്കാൻ സാധ്യത കുറവാണ്.

'ഈ ചാരമേഘങ്ങൾ ഒരു ദിവസംകൊണ്ട് ഇന്ത്യയുടെ ആകാശപരിധി വിട്ടുപോകുന്നതായാണു മനസ്സിലാകുന്നത്', ഡോ.എസ്.അഭിലാഷ് വ്യക്തമാക്കി. അതിനാൽ പ്രത്യാഘാതങ്ങൾ നീണ്ടുനിൽക്കില്ല. എന്നാൽ, മെഡിറ്ററേനിയൻ മേഖലയിൽനിന്നു മഴയെത്തിക്കുന്ന കാറ്റുമായി ഇത്തരം രാസവസ്തുക്കൾ കലർന്നാൽ, ചിലയിടങ്ങളിൽ അമ്ലമഴ പെയ്യാനുമുള്ള സാധ്യതയുണ്ട്. ഇവിടെ അതിനും സാധ്യതയില്ലെന്നും അദ്ദേഹം കൂട്ടിച്ചേർത്തു.

അഗ്നിപർവത സ്ഫോടനത്തിൻ്റെ പ്രത്യാഘാതങ്ങളെക്കുറിച്ച് നിങ്ങളുടെ അഭിപ്രായം പങ്കുവെക്കുക. വിവരങ്ങൾ മറ്റുള്ളവരിലേക്ക് എത്തിക്കാൻ വാർത്ത ഷെയർ ചെയ്യുക.

Article Summary: Volcanic ash leaves India; air travel disruption ends.

#VolcanicAsh #IndiaAirspace #AirTravel #EthiopiaVolcano #AirIndia #China