സംസ്ഥാനത്ത് അതിശക്തമായ മഴ തുടരുന്നു; കാസർകോട് ഉൾപ്പെടെ 12 ജില്ലകളിൽ ഓറൻജ് ജാഗ്രത, ചുരങ്ങളിൽ ഗതാഗതം തടസ്സപ്പെട്ടു

തിരുവനന്തപുരം: (KasargodVartha) സംസ്ഥാനത്ത് ഓഗസ്റ്റ് 2 ഞായറാഴ്ച അതിശക്തമായ മഴ തുടരുമെന്ന് കേന്ദ്ര കാലാവസ്ഥ വകുപ്പിൻ്റെ മുന്നറിയിപ്പ്. തിരുവനന്തപുരം, കൊല്ലം ഒഴികെയുള്ള 12 ജില്ലകളിലാണ് നിലവിൽ ഓറൻജ് ജാഗ്രത പ്രഖ്യാപിച്ചിരിക്കുന്നത്. വടക്കൻ ജില്ലകളിൽ കൂടുതൽ മഴയ്ക്ക് സാധ്യതയുള്ളതിനാൽ പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിൽ ജനങ്ങൾ കൂടുതൽ ജാഗ്രത പാലിക്കണമെന്ന് നിർദേശമുണ്ട്. മഴ ശക്തമാകുന്ന സാഹചര്യത്തിൽ പെട്ടെന്നുള്ള മലവെള്ളപ്പാച്ചിലിനും മിന്നൽ പ്രളയത്തിനും സാധ്യതയുള്ളതിനാൽ ദുരന്ത നിവാരണ അതോറിറ്റി പ്രത്യേക ജാഗ്രതാ നിർദേശം പുറപ്പെടുവിച്ചിട്ടുണ്ട്.

നദീതീരങ്ങളിൽ ആശങ്ക, ചുരങ്ങളിൽ ഗതാഗത തടസ്സം

പത്തനംതിട്ടയിൽ ഒറ്റപ്പെട്ട ശക്തമായ മഴ തുടരുകയാണെങ്കിലും ശബരിമല വനമേഖലയിൽ മഴയുടെ അളവ് കുറഞ്ഞിട്ടുണ്ട്. പമ്പാ നദിയിൽ ജലനിരപ്പ് താഴ്ന്നേക്കും. റാന്നിയിലും ആറന്മുളയിലും വെള്ളം താഴ്ന്നു തുടങ്ങിയെങ്കിലും വെള്ളപ്പൊക്ക ഭീതി പൂർണമായും ഒഴിഞ്ഞിട്ടില്ല. 

കണ്ണൂരിൽ മലയോര മേഖലകളിൽ വ്യാപകമായ നാശനഷ്ടമാണുണ്ടായത്. തേജസ്വിനി, കാര്യങ്കോട് പുഴകൾ കരകവിഞ്ഞൊഴുകുകയാണ്. കണ്ണൂരിൽ ഒഴുക്കിൽപ്പെട്ട് കാണാതായവർക്കുള്ള തിരച്ചിൽ തുടരും. വയനാട്ടിലേക്കുള്ള 2 ചുരങ്ങളിലും മണ്ണിടിഞ്ഞ് ഗതാഗതം പൂർണമായും തടസ്സപ്പെട്ടു. താമരശ്ശേരി ചുരത്തിൽ ഗതാഗത നിയന്ത്രണം ഏർപ്പെടുത്തിയിട്ടുണ്ട്.

കോഴിക്കോട് നഗരത്തിൽ മഴയ്ക്ക് കുറവുണ്ടെങ്കിലും പലയിടത്തും വെള്ളക്കെട്ട് തുടരുകയാണ്. ജില്ലയിൽ 13 ദുരിതാശ്വാസ ക്യാമ്പുകളിലായി 364 പേരാണ് കഴിയുന്നത്. അടിയന്തര സാഹചര്യങ്ങൾ നേരിടാൻ എല്ലാ ജില്ലകളിലും താലൂക്ക് അടിസ്ഥാനത്തിൽ കൺട്രോൾ റൂമുകൾ പൂർണ സജ്ജമാക്കിയിട്ടുണ്ട്.

ഡാമുകൾ തുറന്നു, കടൽക്ഷോഭം രൂക്ഷം

ഇടുക്കിയിൽ ഇടവിട്ട് മഴ തുടരുന്നതിനാൽ മലയോര മേഖലകളിൽ മണ്ണിടിച്ചിൽ ഭീഷണി നിലനിൽക്കുന്നുണ്ട്. കല്ലാർകുട്ടി, കല്ലാർ, പാംബ്ല, മലങ്കര ഡാമുകളിൽ നിന്ന് കൂടുതൽ വെള്ളം പുറത്തേക്ക് ഒഴുക്കുന്നുണ്ട്. ജില്ലയിൽ ഏർപ്പെടുത്തിയ രാത്രി യാത്രാ നിരോധനം തുടരും. എറണാകുളത്ത് തീരദേശ മേഖലകളിൽ വലിയ ആശങ്ക നിലനിൽക്കുന്നുണ്ട്. ചെല്ലാനം, കണ്ണമാലി മേഖലകളിൽ കടൽക്ഷോഭം രൂക്ഷമാണ്. മൂവാറ്റുപുഴയാറിലെയും തൊടുപുഴയാറിലെയും ജലനിരപ്പ് അപകട നില പിന്നിട്ടു.

തിരുവനന്തപുരത്ത് കടൽക്ഷോഭത്തിൽ കാണാതായ 4 മത്സ്യത്തൊഴിലാളികൾക്കായുള്ള തിരച്ചിൽ ഇന്ന് പുനരാരംഭിക്കും. നാവികസേന, കോസ്റ്റ് ഗാർഡ്, കോസ്റ്റൽ പൊലീസ് എന്നിവരുടെ നേതൃത്വത്തിൽ സംയുക്ത തിരച്ചിലാണ് നടത്തുന്നത്. കൊല്ലത്ത് പെയ്ത മഴയിൽ വ്യാപക കൃഷിനാശമുണ്ടായി. 

തീരദേശ മേഖലകളിൽ അതിശക്തമായ കടൽക്ഷോഭം തുടരുന്നതിനാൽ ബീച്ചുകളിലേക്കുള്ള യാത്രയും വിനോദസഞ്ചാരവും പൂർണമായും ഒഴിവാക്കാൻ നിർദേശം നൽകി. മത്സ്യത്തൊഴിലാളികൾ യാതൊരു കാരണവശാലും കടലിൽ പോകരുതെന്ന് സർക്കാർ കർശന നിർദേശം നൽകിയിട്ടുണ്ട്.

ഈ വാർത്ത നിങ്ങളുടെ സുഹൃത്തുക്കൾക്കും വാട്സ്ആപ്പ് ഗ്രൂപ്പുകളിലും പങ്കുവെക്കുക. പുതിയ വാർത്തകളും വിശേഷങ്ങൾളും അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: 12 Kerala districts placed under orange alert as heavy rain continues.

#KeralaRain #OrangeAlert #IMD #KeralaWeather #KeralaFloods #KeralaNews #AparnaNews